Thulaganyo e Ntšha ya Kopano ya Potologo
1 Thulaganyo e ntšha ya kopano ya potologo e e tla simololang ka September e tla bo e na le setlhogo se se reng “Nna le Boitumelo jo Bogolwane Jwa go Aba.” (Dit. 20:35) Boitumelo bo tlhalosiwa e le “boemo jwa go itekanela le kgotsofalo.” Gompieno batho ba bantsi ba phamola monate lefa e le ofe o ba ka o phamolang mo botshelong, mme fa ba o phamotse jalo, gantsi ke wa nakwana fela. Seo ga se boitumelo jwa mmatota. Lefa go ntse jalo, Jehofa o re ruta gore re ka itemofalela jang go ya go ile. (Isa. 48:17; 1 Joh. 2:17) Thulaganyo e ntšha ya kopano ya potologo e tla gatelela gore re ka bona jang boitumelo jo bogolo ka go aba ka tsela ya semoya.
2 Re tla ithuta ditsela tse di molemo tseo ka tsone re ka kgonang go ineela mo bodireding. Dingwe tsa dipuo tse di tla neelwang ke balebedi ba ba tsamayang di na le ditlhogo tse di reng: “Go Dira Ditsala ka Mahumo A a Sa Siamang,” “Tlotla Paakanyetso ya Modimo ya ‘Dimpho Tsa Banna,’” le “Itumelele Dikarolo Tse Dintsi Tsa Boitumelo Jwa Mmatota.” Ba ba batlang go kolobediwa kwa kopanong ba tshwanetse go bua le molebedi yo o okamelang gore a rulaganye gore bagolwane ba tle go tlhatlhoba dipotso tsa kolobetso le bone. Go direla Jehofa ka kamano e e phepa go tla tlisetsa ba ba sa tswang go kolobediwa boitumelo jo bogolo.
3 Go lemoga taolo ya ga Jehofa ka tsela e e tshwanetseng le gone go tlisa boitumelo jwa mmatota le polokesego. Batho botlhe ba tshwanetse go itse ka ga seno. Ka gone, puo ya phatlalatsa kwa kopanong ya potologo e tla nna le setlhogo se se reng “Nna Seoposengwe le Batho ba ba Itumetseng ba Modimo.” Tlhomamisega gore o laletsa botlhe ba ba bontshitseng go kgatlhegela boammaaruri gore ba tle go reetsa puo eno. Ga ba a bona polokesego ya mmatota le boitumelo jwa go ya go ile mo pusong ya motho mo lefatsheng leno le le kafa tlase ga taolo ya ga Satane. (Mor. 8:9) Mme a bo ba tla bona boitumelo jo bogolo jang ne fa ba itsalanya le batho ba ba itumetseng ba ga Jehofa!—Pes. 144:15b.
4 Go sa kgathalasege maemo a a ntseng a nnela maswe pele a tsamaiso eno ya dilo, bao ba iponelang boitumelo jo bogolo jwa go fa semoyeng ga ba kitla ba swabisiwa ke Modimo yo o itumetseng. (1 Tim. 1:11) Thulaganyo e ntšha ya kopano ya potologo e tla bontsha gore seno ke boammaaruri. O se ka wa e fosa!