Go Tlhokega Bakaulengwe ba ba Oketsegileng mo Tirelong ya Bobulatsela
1 Paulo o ne a re rotloetsa gore re ‘totafale mo tirong ya Morena ka metlha yotlhe.’ (1 Bakor. 15:58) Mo go ba le bantsi seno se raya go tsaya tirelo ya bobulatsela. Mo ngwageng o o fetileng wa tirelo, batho ba ba fetang 800 ba ne ba okediwa mo bobulatseleng mo Afrika Borwa fela!
2 Gompieno palo e kgolwane ya bao ba direlang e le babulatsela mo nageng eno ke bokgaitsadi. (Pes. 68:11) Abo e tla nna selo se se itumedisang thata jang ne mo phuthegong fa bakaulengwe ba bantsi ba ne ba ka nna batlhanka ba nako e e tletseng! (Pes. 110:3) Go a utlwala gore bakaulengwe ba bantsi ba tshwanelwa ke go tlhokomela maikarabelo a a botlhokwa kwa tirong le a lelapa. Ba bangwe gape ba dira ka natla go tlhokomela ditlhoko tsa moya tsa phuthego. Re itumelela banna bano ba ba itekang ka natla mo dilong tse di malebang le Bogosi.—1 Tim. 4:10.
3 Lefa go ntse jalo, a ba ba oketsegileng ba lona bakaulengwe lo ka se tseye tirelo ya bobulatsela? Fa e le gore mosadi wa gago ke mmulatsela, a o ka se kopanele le ene? Fa e le gore o setse o tlogetse tiro, a ga o dumalane gore tsela fela e e kgotsofatsang eo o ka dirisang nako ya gago ka yone ke bodiredi jwa nako e e tletseng? Fa e le gore o a fetsa kwa sekolong monongwaga, a o kile wa akanyetsa ka tlhoafalo le ka thapelo go tsaya tirelo ya bobulatsela e le kgato e e go thusang go bona ditshiamelo tse di oketsegileng tsa tirelo?—Baef. 5:15-17.
4 Mokaulengwe yo mongwe o ne a rekisa kgwebo ya gagwe e e atlegileng thata mme a dira tiro e e seng ya letsatsi lotlhe e le gore a kgone go bulatsela. Ka ntlha ya sekao sa gagwe se se molemo, ba le bararo ba bana ba gagwe ba banè, ba ne ba nna babulatsela ka bonako fela fa ba fetsa kwa sekolong. Wa bonè le ene o ne a eletsa go bulatsela le bone. Mokaulengwe yono le lelapa la gagwe ba ile ba segofadiwa fela thata.
5 Kgoro e Kgolo e Bulegile: Tirelo ya bobulatsela e ka bula ‘kgoro e go nang le tiro mo go yone.’ (1 Bakor. 16:9) Bakaulengwe ba e leng babulatsela ba ka nna ba dirisiwa thata mo phuthegong. Go tlhagafalela tirelo ya tshimo go oketsa kgolo ya bone ya semoya e bile go oketsa kgatelopele ya bone mo dilong tsa puso ya Modimo. Bobulatsela bo ka bula tsela e e isang kwa ditshiamelo tse di oketsegileng tsa tirelo. Fa o sena go bula tsela ka sebaka sa ngwaga, go na le lesego la go tsena Sekolo sa Tirelo ya Bobulatsela. Batlhanka ba bodiredi le bagolwane ba ba sa nyalang, ba ka leka ka natla gore ba kgone go tsena Sekolo sa Thapiso sa Bodiredi. Banyalani ba ba tshwanelegang ba ka dira kopo ya go ya Sekolong sa Gileade. Bakaulengwe morago ba ka tshwanelegela tiro ya go potologa. Ee, bodiredi jwa bobulatsela bo bula kgoro e e isang kwa ditshiamelong tseno tse dikgolwane tsa tirelo mo phuthegong ya ga Jehofa.
6 Bakaulengwe ba ba ka kgonang go rulaganya mabaka a bone e le gore ba ka tsaya tirelo ya bobulatsela jwa ka metlha, ba ka nna le boitumelo jo bogolwane jo bo lerweng ke go aba mo gogolwane.—Dit. 20:35.