Ke Mang yo o Tshwanelegang go Rera?
1 Fa go tsenwa mo bodireding, a o kile wa ikutlwa jaaka Moshe a ne a ikutlwa? O ne a re: “Ao, Morena, ga ke motho yo o itseng go bua sentle, le fa e le gale, le fa e le o sena go bua le motlhanka wa gago.” (Ekes. 4:10) Fa o ikutlwa ka tsela eo, o ka nna wa ikutlwa o ikgogona. Lefa go ntse jalo, Jesu o “ne a re laela go rerela batho le go neela bosupi ka botlalo.” (Dit. 10:42, NW) Ka jalo, go tla jang gore re nne bareri ba ba tshwanelegang ba mafoko a a molemo?
2 Ga se thuto ya rona ya lefatshe e e re dirang gore re tshwanelegele bodiredi. Paulo o ne a re “[ga] se bantsi ba ba botlhale ka fa nameng, . . . ba ba biditsweng” le gore “botlhale jwa lefatshe leno ke dinyana mo Modimong.” (1 Bakor. 1:26; 3:19) Jesu o ne a tlhopha baaposetoloi ba gagwe mo setlhopheng sa batho ba ba berekang—ba banè ba bone ba ne ba le batshwaraditlhapi. Baeteledipele ba ba ikgantshang ba bodumedi ba ne ba ba leba ka lonyatso jaaka “fa ba sa rutega, e le batho fela.” Fa ba atlholwa ka ditekanyetso tsa lefatshe, baaposetoloi ba ne ba sa tshwanelegele go rera. Lefa go ntse jalo, puo e e bokgeleke e Petere a neng a e neela ka letsatsi la Pentekosete e ne ya tlhotlheletsa batho ba ba 3000 gore ba kolobediwe!—Dit. 2:14, 37-41; 4:13.
3 Jehofa o re Tshwanelegisa go Rera: Paulo o ne a bolela jaana: “Go lekana ga rona go tswa mo Modimong.” (2 Bakor. 3:5) Jehofa, eleng Motswedi wa botlhale, o rutile ba ba dimilione go rerela ba bangwe ka boammaaruri jwa Bogosi. (Isa. 54:13) Tsela e tiro eno e leng molemo ka teng e bile e na le matswela e bonwa mo go ba ba 338 491 ba ba kolobeditsweng mo ngwageng o o fetileng e le ‘dikwalo tse di hakang’ tse di tshelang. (2 Bakor. 3:1-3) Re na le mabaka a mantsi a go rera ka bopelokgale le ka tsela e e tlhatswang pelo ka ga dilo tse re di ithutileng mo go Jehofa.
4 Phuthego ya Modimo e dirile gore go nne le thulaganyo ya ditšhabatšhaba ya go thapisa badiredi. Ka go dirisa Dikwalo le mefutafuta e mentsi ya dithuso tsa go ithuta Baebele, re a rutwa e bile re thapisiwa gore re ‘nne boitekanelo re iketleeletse ruri’ go rera. (2 Tim. 3:16, 17) Ba bantsi ba kgatlhilwe ke thuto e e bonwang mo dikgatisong tsa Mokgatlho. Ka sekai, kgatiso nngwe ya Se-Sweden e ne ya bolela jaana: “Tumelo e Basupi ba ga Jehofa ba e rerang e tshegetswa ke kitso ya Baebele ya maemo a a kwa godimo ka tsela e e gakgamatsang e bile e le ya boditšhabatšhaba.”
5 Ka kaelo e re e newang mo dipokanong tsa rona tse tlhano tsa beke le beke, thulaganyo ya rona ya go bala Baebele le go e ithuta, kgakololo mo Sekolong sa Bodiredi sa Puso ya Modimo, thuso e re e bonang motho ka namana go tswa go ba bangwe ba e leng badiredi ba ba nang le maitemogelo, mme mo godimo ga tseno tsotlhe, go engwa nokeng ke moya o o boitshepo wa ga Jehofa, re ka nna le tshepo ya gore Jehofa o re leba re tshwanelegela ka botlalo go rera. “Re bua mo go Keresete jaaka e le ka bopeloephepa, jaaka e le ka Modimo, jaaka e le mo ponong ya Modimo.”—2 Bakor. 2:17.
6 Fa re sola thapiso ya puso ya Modimo molemo ka botlalo e re e newang ke Modimo ka phuthego ya gagwe, ga re na lebaka la go ikgogona kana go ikutlwa re boifa. Re ka kgona go rerela ba bangwe ka boitumelo, re solofetse gore Jehofa o tla segofatsa maiteko a rona.—1 Bakor. 3:6.