Pokano le Balebedi ba Kgaolo

Ka February 11, 1997, balebedi ba kgaolo ba le barataro ba ba direlang ka fa tlase ga lekala la Afrika Borwa ba ne ba nna le pokano ya bone ya ngwaga le ngwaga mo Bethele ba tlile go tlotla ka dilo tse di tlhokegang mo tshimong ya rona, gape le gore ba bege ka kgatelopele e e dirilweng mo ngwageng o o fetileng. Ka lebaka la puisano eo, re rata go tlhomolola dintlha tse tharo tse di kgethegileng tse di tlhokang go tlhokomelwa mo tshimong ya rona.

1) Go aga bomoya jwa mmoledi mongwe le mongwe. Go tlhokega gore motho mongwe le mongwe, malapa le ba ba eteletseng pele ba leke ka tlhoafalo go ithuta ka bobone le jaaka lelapa, le go bala Lefoko la Modimo, Baebele, letsatsi le letsatsi.

2) Go nna teng kwa dipokanong tse tlhano tsa phuthego ka metlha. Seno ke bothata segolobogolo mo tshimong ya ba ba buang Seesemane le Seburu.

3) Go dira gore o nne le seabe se segolwane mo tirelong mme o bege tirelo ya gago ka bonako fa kgwedi nngwe le nngwe e fela. Mo diphuthegong tse dintsinyana tirelo ya tshimo e ile kwa tlase. Balebedi botlhe ba kgaolo ba ne ba akanya gore go fetola thulaganyo ya dithuto tsa Sontaga gore di nne mo mosong go nnile le matswela a a sa itumediseng fela thata mo tirelong ya tshimo ya Sontaga.

O arabela jang mo dilong tseno tse di tlhokafalang? A o ka tlhatlhoba boemo jwa gago mme o bone gore ke kae koo wena ka bowena kgotsa jaaka lelapa, lo ka tokafatsang gone? Satane o leka ka thata go koafatsa bakaulengwe le go dira gore re se ka ra dira ka matlhagatlhaga mo tirelong. Lefatshe le lone le tseneletse mo matshelong a bakaulengwe bangwe. Ka jalo, go tlhokega ka potlako gore rotlhe re nne re nonofile semoyeng le gore re itshoke mo tseleng e e isang kwa botshelong jo bo sa khutleng.—Baheb. 10:35-39.