Bodiredi Jwa Rona—Bosupi Jwa Lorato Lwa Mmatota
1 Fa re dira bodiredi jwa rona re supa gore re utlwa ditaelo tse pedi tse dikgolo go di feta tsotlhe. (Math. 22:37-39) Tsela e re ratang Jehofa ka yone e re tlhotlheletsa go bua molemo ka ene. Tsela e re ratang baagelani ba rona ka yone e re tlhotlheletsa go ba kgothaletsa gore ba batle kitso ya se e leng thato ya Modimo le maikaelelo a gagwe gore, jaaka rona, le bone ba rate Jehofa mme ba dire gore ba tshwanelwe ke tuelo ya botshelo jo bo sa khutleng. Ka jalo, he, ka bodiredi jwa rona re tlotla leina la ga Jehofa mme re naya baagelani ba rona tsholofelo e e sa tshwaneng le epe ya Bogosi. Ee, bodiredi jwa rona ke bosupi jwa lorato lwa rona lwa mmatota mo Modimong le mo bathong.
2 Lorato lwa rona lo re pateletsa go bua le batho ba mefuta yotlhe, mo maemong a mefuta yotlhe. (1 Bakor. 9:21-23) Ka sekai: Fa a ne a le mo sefofaneng, mogolwane mongwe wa Mokeresete o ne a bapile le moruti wa Roma ya Katoliki. Mogolwane yono o ne a simolola motlotlo le moruti yono ka go mmotsa dipotso dingwe ka botlhale, mme morago a dira gore motlotlo o nne ka ga Bogosi. Ka nako ya fa moruti a ne a fologa sefofane, o ne a tsere dibuka tsa rona tse pedi. A bo mogolwane yono a ile a nna le matswela a a molemo jang ne ka ntlha ya go supa lorato lwa mmatota mo moagelaning wa gagwe!
3 Lorato Lwa Mmatota lo re Tlhotlheletsa go Rera: Ba e leng babulatsela ba ba thusang le ba ka metlha ruri ba supa lorato lwa mmatota mo Modimong le mo baagelaning. Babulatsela ba tswelela go dirisa nako ya bone le maatla a bone go thusa ba bangwe semoyeng. Ke eng se se ba tlhotlheletsang go dira seno? Mmulatsela mongwe o ne a re: “Ke itse gore lorato ke loungo lwa moya wa Modimo. Ka jalo fa e ne e se ka lone nkabo ke se mo boammaaruring gotlhelele, ke sa bue sepe ka go atlega mo bobulatseleng. Lorato lo dira gore ke kgathalele batho, ke lemoge dilo tse ba di tlhokang le go lemoga gore batho ba rata go ratiwa.” Jesu o ne a bontsha batho lorato lo lo ntseng jalo. Ka nako nngwe fa ene le barutwa ba gagwe ba ba lapileng ba ne ba ya gongwe go ya go “ikhuts[a] go sekae,” batho ba ne ba fitlha koo pele ga bone. Jesu o ne a dira eng? Ka go “tlhotlheletsega go ba tlhomogela pelo,” o ne a itima dilo tse ene a di tlhokang “go ba ruta dilo di le dintsi.”—Mar. 6:30-34.
4 Le fa batho ba gana dikgang tse di molemo tse re ba bolelelang tsone, re nna le boipelo jo bogolo ka go itse gore, e re ka re tlhotlheleditswe ke lorato, re dirile bojotlhe jwa rona go ba thusa go bona poloko. Fa kgabagare rotlhe re atlholwa ke Keresete, re tla itumela thata ka go bo re ile ra supa lorato lwa mmatota ka go ‘wetsa bodiredi jwa rona ka botlalo.’—2 Tim. 4:5.