Go Neela Bosupi “mo Bathong ba Mefuta Yotlhe”
1 Fa re kopana le batho ba dingwao kana madumedi a a farologaneng, ga re lebale gore Jehofa o rata gore “batho ba mefuta yotlhe ba bolokwe mme ba tle mo kitsong e e leng yone, ya boammaaruri.” (1 Tim. 2:4) Mo godimo ga dipampitshana le diboroutšhara tse di kgethegileng tse re nang le tsone, re na gape le dikgatiso tse pedi tse di ka dirisiwang nako nngwe le nngwe go thusa batho ba madumedi a bone a sa ba rutang boammaaruri ka Modimo le Keresete.
2 Buka ya Matsapa a a Tserweng ke Motho go Batla Modimo e re naya lesedi ka tshimologo ya madumedi a magolo a lefatshe mme ka jalo e ka thusa batho gongwe le gongwe fela gore ba kgone go bona pharologano mo dithutong tse ba di dumelang le se Baebele e se rutang kaga Modimo o o osi wa boammaaruri. Ka fa letlhakoreng le lengwe, ka go bua thata ka botshelo jwa ga Jesu Keresete, buka ya Monna yo Mogolo go Gaisa Botlhe ba ba Kileng ba Tshela e ka thusa motho go itse Morwa Modimo botoka le go mo rata thata fela jaaka go ne go ntse ka batho ba lekgolo la ntlha la dingwaga. (Joh. 12:32) Gongwe le gongwe fela kwa go tshwanelang teng, o ka leka go dirisa dikakantsho tse di latelang fa o buelela dibuka tseno.
3 Fa o bona go le molemo go tsamaisetsa motho buka ya “Monna yo Mogolo,” o ka nna wa re:
◼ “Ke eng se se tlang mo mogopolong wa gago fa o akanya ka Jesu Keresete? [Letela karabo.] Borahisitori ba le bantsi ba tsaya Jesu e le monna yo mogolo go gaisa botlhe ba ba kileng ba tshela. [Nopola sekai go tswa mo matsenong a buka ya Monna yo Mogolo.] Baebele e bontsha gore tsela e Jesu a neng a tshela ka yone ke sekao se re ka se latelang.” Bala 1 Petere 2:21 le serapa sa ntlha mo tsebeng ya bofelo ya matseno a buka ya Monna yo Mogolo. Fa mongantlo a kgatlhegela go ithuta ka Jesu, mo tsamaisetse buka ka moneelo wa R15,00. Pele ga o tsamaya, bala Johane 17:3 o bo o botsa jaana, “Re ka anya jang kitso e e isang botshelong jo bo sa khutleng?” Dira dithulaganyo tse di tlhomameng tsa go boa gape go tla go araba.
4 Fa o boa gape go ya go tlhalosa kafa re ka anyang kitso e e ka re nayang botshelo, o ka nna wa re:
◼ “Ke ne ka go solofetsa gore ke tla boa gape go tla go go bontsha kafa re ka anyang kitso e e ka re nayang botshelo jo bo sa khutleng ka teng.” Mo neele buka ya Kitso o bo o mmontsha kafa thuto e tshwarwang ka teng o dirisa kgaolo ya ntlha.
5 Fa o batla go tsamaisetsa motho buka ya “Matsapa a a Tserweng ke Motho go Batla Modimo,” o ka nna wa botsa jaana:
◼ “E re ka go na le madumedi a mantsi jaana a a farologaneng gompieno, a ga o ise o ipotse gore re ka lemoga jang jo bo amogelwang ke Modimo?” Fa a sena go araba, bula buka ya Matsapa a a Tserweng ke Motho go Batla Modimo mo go tsebe 377. Gatelela ntlha ya 7, mme o botse mongantlo gore a wa dumela gore bodumedi jwa boammaaruri bo tshwanetse go kopanya batho ba ditso tsotlhe. Leba lengwe la dikwalo tse di umakilweng, mme fa nako e letla, o tlotle ka dintlha tse dingwe tse di mo lenaaneng leo. Mo tsamaisetse buka ka moneelo wa R7,50. Fa o kgaogana le ene, o ka nna wa mmotsa jaana, “Bodumedi jwa boammaaruri bo tshwanetse go ama boitshwaro jwa motho jang?” Rulaganya go dira loeto lwa go boela go tla go araba potso eo.
6 Fa o boela gape go ya go tlhalosa kafa bodumedi jwa boammaaruri bo tshwanetseng go ama boitshwaro jwa motho ka teng, o ka nna wa botsa jaana:
◼ “O akanya gore bodumedi bo tshwanetse go ama boitshwaro jwa motho jang? [Mo letle gore a arabe.] Keresete o re neile tsela e bodumedi bo ka tlhatlhobiwang ka yone.” Bala Mathaio 7:17-20 ka tlhamalalo go tswa mo go tsebe 12 ya buka ya Matsapa a a Tserweng ke Motho go Batla Modimo. Go tswa foo kopa mongantlo go bala serapa 20 mo go tsebe 13-14. Fa nako e letla, tlotla ka dirapa 25-9 mo go tsebe 16-18. Seno se ka felela ka gore lo simolole thuto ka boroutšhara jwa Re Direng kana ka buka ya Kitso.
7 Dilo Tse di ka Simololang Motlotlo: Go na le didirisiwa di le dintsi tsa go ithuta mo bukeng ya Matsapa a a Tserweng ke Motho go Batla Modimo, tse di ka dirisiwang go simolola motlotlo ka tsone mo loetong lwa ntlha kana mo loetong lwa go boela. O ka simolola motlotlo ka go botsa potso fela e e maleba. Ka sekai, ela tlhoko dipotso, ditlhogo le ditsebe tseno tse dintlha di tserweng mo go tsone:
“Dipotso Tseo di Tlhokang go Arabiwa”—ditsebe 17-18.
“A Jesu e ne e le Motho wa Tlhamane?”—tsebe 237.
“Ke Mang yo o Ileng a Kwala Bibela?”—tsebe 241.
“Qur’ān le Bibela”—tsebe 285.
“Bosupi Jwa Gore Bibela E Boammaaruri”—ditsebe 340-1.
“Seo Basupi ba ga Jehofa ba se Dumelang”—ditsebe 356-7.
“Tsela Eo O Ka Lemogang Bodumedi jwa Boammaaruri ka Yone”—tsebe 377.
8 O ka bula (di)tsebe tse o di tlhophileng tsa buka ya Matsapa a a Tserweng ke Motho go Batla Modimo o bo o tlhalosa kgang e go tlotlwang ka yone. Morago ga moo rulaganyetsa loeto lwa go boela ka go mmotsa potso e e maleba e e ka arabiwang ka boroutšhara jwa Re Direng kana buka ya Kitso. Tlhomamisa gore o laletsa mongantlo go tla Puong ya Phatlalatsa mme o mo tlogelele pampitshana ya taletso.
9 Batho ba mefuta yotlhe ba ba dipelo di ikanyegang ba senka boammaaruri ka Modimo le Keresete. Re ka ba thusa ka tiro ya rona ya go neela bosupi. Ka jalo he, a re tsweleleng pele “re dira ka natla e bile re iteka go dira seno, ka gonne re aegile tsholofelo ya rona mo Modimong o o tshelang, o o leng Mmoloki wa batho ba mefuta yotlhe.”—1 Tim. 4:10.