Rapelela Thuso ya ga Jehofa
1 Jesu o ne a lemotsha barutwa ba gagwe botlhokwa jwa go segofadiwa ke Jehofa mo bodireding jwa bone. (Math. 9:37, 38) Dithapelo tsa rona tsa pako tse di tswang pelong le ditebogo mmogo le ditopo tse di tlhoafetseng le mekokotlelo di bontsha gore re ikaegile ka botlalo mo go Jehofa gore a re thuse. (Bafil. 4:6, 7) Dikwalo di re kgothaletsa gore re tswelele pele re rapela “ka mofuta mongwe le mongwe wa thapelo le mokokotlelo,” mme re tla dira jalo le fa re rapelela bodiredi jwa rona.—Baef. 6:18.
2 Re baka Jehofa ka thapelo ka ntlha ya dinonofo tsa gagwe tse di tlhomologileng le dilo tse a di dirileng. Gape re a mmaka ka e le Moabi wa dikgang tse di molemo tse re di rerang. Re tshwanetse go mmaka ka gonne ke ene fela yo o dirang gore bodiredi jwa rona bo atlege.—Pes. 127:1.
3 Dithapelo tsa rona tsa ditebogo di bontsha gore re anaanela gore Jehofa o re thusitse go tlhaloganya thato ya gagwe le boikaelelo jwa gagwe. A ga se tshiamelo go abela ba bangwe boammaaruri jwa Bogosi? Re leboga Jehofa ka sotlhe se re kgonang go se dira mo bodireding.—Pes. 107:8; Baef. 5:20.
4 Ke gone ka moo re kopang Jehofa gore a re thuse go bona batho ba ba tla dumelang go ithuta Baebele le go kopa thuso gore re fitlhelele dipelo tsa bone ka boammaaruri. Ka go dira ditopo tse di ntseng jalo re supa gore re tsaya Modimo e le ene fela yo o ka dirang gore tiro ya rona mo bodireding e nne le matswela.—1 Bakor. 3:5-7.
5 Kgaitsadi mongwe o ne a akanya gore mosadi yo o mo tselaneng ya gagwe ya dimakasine o ne a sa bale Tora ya Tebelo le Tsogang! E re ka a ne a sa batle gore makwalopaka ano a a botlhokwa a senyege fela, o ne a kopa Jehofa gore fa mosadi yono a sa a bale, bogolo a a gane. Fa kgaitsadi yono a mo etela mo nakong e e latelang, monna wa mosadi yono o ne a bolela jaana: “Ke lebogela go bo o re tlisetsa dimakasine tseno ka metlha. Ke a di bala mme ke di rata fela thata.”
6 Ka thapelo e e bontshang boikokobetso le e e tlhoafetseng, re ka rapela Jehofa gore a re thuse go itshoka fa batho ba sa bontshe kgatlhego le fa ba re sotla le gore re se ka ra tshaba batho e le gore re tswelele pele re neela ba bangwe bosupi ka bopelokgale. (Dit. 4:31) Fa re tswelela pele re rapela “ka mofuta mongwe le mongwe wa thapelo le mokokotlelo” fa re ntse re dira tirelo ya rona e e boitshepo ka go ikoba, re ka tlhomamisega gore Jehofa o tla re thusa.—1 Joh. 3:22.