Go Baakanyetsa Go sa Le Gale go a Itumedisa
1 Go nna le seabe mo bodireding jwa tshimo go re itumedisa fela thata. (Pes. 89:15, 16) Ke boammaaruri gore go baakanyetsa ke gone go dirang gore re itumelele seo ka botlalo. Fa re baakanyetsa sentle, re a atlega, mme fa re atlega, re itumela fela thata.
2 Dirisa Didirisiwa Tse re di Neilweng: Simolola go baakanyetsa ka go bala le go sekaseka ditlhogo tsa Tirelo ya Rona ya Bogosi. Gantsi e na le dipuisano tse di akanyeditsweng sentle tse di diretsweng go go thusa go neela molaetsa wa Bogosi ka tsela e e motlhofo le e e nang le matswela. O tla bona dikai tse o ka di dirisang go fenya dikganetso tse di tlwaelegileng. Go neelwa dikakantsho tsa kafa o ka dirang loeto lwa go boela le le molemo ka gone, ka boikaelelo jwa go simolola thuto ya Baebele. O gololesegile go ka fetola dikakantsho tseno e le gore o ikutlwe o phuthologile fa o di dirisa. Mo godimo ga moo, o na le buka ya Go Fetolana, e e nang le diketapele tse dintsi mmogo le dikarabo tse o ka di dirisang go araba batho ba ba kgoreletsang puisano, ka gone di go thusa gore o atlege mo maemong a mantsi a o kopanang le one.
3 Sekaseka buka e o tla bong o e tsamaisa, mme o tlhophe ntlha e le nngwe kana di le pedi tse di kgatlhang thata tse o ka di bontshang mong wa ntlo. Dikgang tse di dirang gore motho a akanye tse o di utlwileng kana tse o di badileng di ka nna tsa go thusa gore o simolole motlotlo. Akanya ka dilo dingwe tse o ka ganediwang mo go tsone, mme o akanye ka dintlha di sekae tsa kafa o ka arabang ka gone. Go tswa foo dirisa metsotso e sekae o baakanyetsa se o tlileng go se bua mo matlong.
4 Nna Gone Kwa Pokanong Nngwe le Nngwe ya Tirelo: Reetsa ka kelotlhoko mo Pokanong ya Tirelo fa go tlotliwa, go boelediwa, le fa go dirwa dipontsho ka dikakantsho tse di leng go Tirelo ya Rona ya Bogosi. Ela tlhoko dintlha tse o akanyang gore o ka di dirisa mo puisanong ya gago. Ikgakolole maemo a a tlwaelegileng a o kileng wa kopana le one mo bodireding, mme o akanye ka ditsela tse o ka neelang bosupi ka tsela e e molemo ka tsone. Buisana le baboledi ba bangwe ka dilo tseno pele ga pokano le morago ga yone.
5 O ka tlhomamisega gore fa o “ipaakanyeditse tiro nngwe le nngwe e e molemo,” o tla duelwa ka go bona boitumelo jo bogolo le go atlega mo go thuseng batho ba bangwe go bona tsela ya botshelo.—2 Tim. 2:21.