Thulaganyo e Ntšha ya Kopano ya Potologo

Ke melemo efe e o e bonang gone jaanong ka go tsamaya le Jehofa? O ka dira jang gore o se ka wa raelesega go letla dilo tse e seng tsa puso ya Modimo di kgoreletsa dilo tse di direlwang Bogosi go tla pele mo botshelong jwa gago? (Math. 6:33) A o palelwa ke go lemoga se se siameng mo go se se sa siamang mo lefatsheng leno le le dirang gore dilo tse di sa siamang di lebege di siame? (Baheb. 5:14) Go tlile go tlotliwa ka dintlha tseno kwa kopanong ya potologo ya setlhogo se se reng “Solegelwa Molemo Gone Jaanong ka go Tsamaya mo Ditseleng Tsa Modimo,” e e simololang ka September 1999.—Pes. 128:1.

Karolo e ntšha ya kopano eno ya potologo ka Matlhatso e tla bo e le go dira dipontsho ka Pokano ya Tirelo. Molebedi wa lona wa potologo o tla itsise diphuthego ka se se rulagantsweng gore botlhe ba tle ba ipaakanyeditse mme ba itumelele thulaganyo eno ka botlalo.

Karolo e e reng “Babulatsela—Nnang le Tlhokometse ka Kelotlhoko e Kgolo Kafa lo Tsamayang ka Gone” e tlile go re bontsha tsela ya go nna batho ba ba botlhale le ba ba akanyetsang e le gore re ithekele nako e e re siametseng mo bodireding jwa bobulatsela. (Baef. 5:15-17) Setlhogo se se reng “Elang Tlhoko Ditsela Tse di Lebegang e Kete di Siame” se tla re ruta go tlhomamisa se Modimo a se amogelang mo karolong nngwe le nngwe ya botshelo. Puo e e reng “Kafa Boporofeti jo bo Diragaditsweng bo re Amang ka Gone” e tla re thusa gore megopolo le dipelo tsa rona di rate Lefoko la Modimo. Puo ya phatlalatsa e e reng “Ditsela Tsa Modimo—A bo Di le Molemo Jang Ne!” e tla gatelela melemo e re e amogelang gone jaanong fa re ntse re tsamaisana le ditekanyetso tse di siameng tsa ga Jehofa.

A o eletsa go bontsha phatlalatsa ka go kolobediwa mo metsing gore o batla go tsamaya mo ditseleng tsa Modimo o le mongwe wa batlhanka ba gagwe ba ba ineetseng? Ka gone he, buisana le molebedi yo o okamelang gore a dire dithulaganyo tse di tlhokegang.

Tlhomamisa gore o se ka wa fetwa ke kopano eno ya potologo e e tshwanelang. Nna gone mo thulaganyong yotlhe ya malatsi a mabedi, ka gonne “go sego mongwe le mongwe yo o boifang Jehofa, yo o tsamayang mo ditseleng tsa gagwe.”—Pes. 128:1.