Tlotla Leina le Lentle la ga Jehofa
1 Satane o ne a senya leina la Modimo fa a ne a tlhotlheletsa batsadi ba rona ba ntlha go leofa. Diabolo o ne a bolela boferefere jwa gore Jehofa o akeditse Adame. (Gen. 3:1-5) E re ka leina la Modimo le amana le gore Modimo o kgona go diragatsa se a se buileng, tatofatso ya ga Satane e ne e le go mo senya leina ka tsela e e maswe tota. Jehofa o ne a tlosa kgobo mo leineng la gagwe a bo a le ntlafatsa ka go diragatsa boikaelelo jwa gagwe jwa bomodimo kgato ka kgato.—Isa. 63:12-14.
2 Re batho ba Jehofa a ba ‘biditseng ka leina la gagwe.’ (Dit. 15:14, 17) Seno se re neela tshono ya go bontsha kafa re le tsayang le le boitshepo ka teng. Re tsaya leina la ga Jehofa le le lentle thata, e re ka le kaya sengwe le sengwe se se molemo, se se pelonomi, se se lorato, se se kutlwelobotlhoko le se se siameng. Bogolo jwa leina le le molemolemo la Modimo bo dira gore re le tlotle. (Pes. 8:1; 99:3; 148:13) Re tshwanetse ra tlhotlheletsega go dira eng?
3 Itshepise Leina la Modimo: Re ka se itshepise leina la Modimo go feta kafa le leng boitshepo ka teng. Mme ka boitshwaro jwa rona jo bo phepa le go rera ka Bogosi, re ka bontsha gore re tlotla leina la Modimo fela thata. A re boleleng jaana: “Ntshetsang Jehofa malebogo, bitsang leina la gagwe, kakanyang ditirotiro tsa gagwe mo ditšhabeng, umakang, go re, leina la gagwe le goletsegile.” (Isa. 12:4) Re ka dira seno jang?
4 Re ka sola sebaka sengwe le sengwe molemo gore re bolele ka leina la ga Jehofa le sotlhe se le se kayang. Tiro ya rona ya go rera e tlotla Jehofa, e ka tswa e le ya go rera ka tsela ya tlwaelo kana e e seng ya tlwaelo, ka ntlo le ntlo kana mo mabenkeleng, mo mmileng kana ka thelefouno. Fa re kopana le batho ba ba kgatlhegang ba ba reetsang, re tshwanetse ra rulaganya le bone dinako tse di tlhomameng gore re boele kwa go bone mme re ba rute mo gontsi ka ga Jehofa. Seo se kaya gore re tshwanetse go boloka dinako tseo re di rulagantseng le go tswelela pele re dira maiteko a go simolola dithuto tsa Baebele tsa magae. Se se itumedisang ke gore, ngwaga le ngwaga batho ba le dikete di le makgolokgolo ba simolola go itse, go tlotla le go itshepisa leina le lentle la ga Jehofa.
5 Go dira ga rona ka pelo yotlhe mo tirong ya go itshepisa leina la Modimo go bontsha sentle gore re eme fa kae malebana le kgang e e tsositsweng ke Satane kwa Edena. Tiro eno e re e dirang ke ya maemo a a kwa godimo, e e tlotlegang go feta tsotlhe. A re tlotleng le go baka leina le le galalelang la ga Jehofa ka tlhagafalo!—1 Ditir. 29:13.