Thulaganyo ya Rona e e Tlhofofaditsweng ya go Aba Dibuka
1 Ka October le ka November 1999, go ne ga tlhalosiwa gore go tloga ka January 1, 2000, makala otlhe go ralala lefatshe a tla dirisa thulaganyo e e tlhofofaditsweng ya go aba dibuka, go akaretsa le lekala la Afrika Borwa. Seno se bolela gore baboledi le batho ba bangwe ba ba kgatlhegang ba tla newa dimakasine le dibuka ba sa di duedisiwe. Ga re kitla re tlhola re akantsha gore go ntshiwe moneelo o o rileng. Fa mongwe yo o kgatlhegang a amogela dibuka, re tla mo tlhalosetsa gore tiro ya rona ya lefatshe lotlhe e tshegediwa ka meneelo e e dirwang ka go rata mme le bone fa ba batla, ba ka nna ba ntsha moneelo. Re tla naya batho ba ba kgatlhegang dibuka ba ka tswa ba ntshitse moneelo kana nnyaa.
2 Legale, ga re patelesege kana gone go eletsa go naya mongwe le mongwe fela yo o tla amogelang dibuka re se kelotlhoko. Fela jaaka re dirisa dilo tsa rona ka botlhale, mmoledi mongwe le mongwe o na le boikarabelo jwa go dirisa dibuka tse a di amogelang kwantle ga go di duela go tswa go Mokgatlho ka botlhale. Le fa gone Mokgatlho o naya baboledi dibuka tsa one kwantle ga go ba duedisa, ka phepafalo seno ga se bolele gore di gatisiwa le go abiwa kwantle ga ditshenyegelo dipe. Botlhe ba tshwanetse go anaanela thata kafa dibuka tsa rona di leng botlhokwa ka teng go thusa batho ba ba dipelo di ikanyegang ba ba nyoretsweng kitso ya boammaaruri e e kaga Jehofa Modimo le Morwawe Jesu Keresete.—Joh. 17:3.
3 Mokgatlho o kgona jang go abela batho dibuka tsa one kwantle ga go ba duedisa? Ditshenyegelo tse di ka se tilweng tsa go gatisiwa le go abiwa ga tsone di duelwa ka meneelo. Batlhanka ba ba ineetseng ba ga Jehofa ke bone ba segolobogolo ba o tshegeditseng. Basupi ba ga Jehofa ga ba ise ba ke ba kope batho ba bangwe madi go tshegetsa tiro eno e e potlakileng ya go itsise ka Bogosi. Ga go ise go ko go direge gore re tsamaye re kopa madi mo setšhabeng mo nakong e e fetileng le e leng gone jaanong. Le fa go ntse jalo, re anaanela meneelonyana e e abiwang ka bopeloephepa ke batho ba ba kgatlhegang le ba ba anaanelang ba re kopanang le bone mo tshimong.
4 Phetogo eno mo mokgweng o re dirang ka one e bontsha bosupi jo bongwe jo bo oketsegileng jwa gore “ga re babapatsi ba lefoko la Modimo.” (2 Bakor. 2:17) Gape e supa gore re arogane le lefatshe.—Joh. 17:14.
5 E re ka tshenyego ya Babelona o Mogolo e ntse e atamela, go na le dikgatelelo tse di ntseng di oketsega tsa go nna kgatlhanong le madumedi otlhe. Selo se re amegileng thata ka sone ke gore tiro e e botlhokwa ya go rera ka Bogosi mo lefatsheng lotlhe e tswelelepele e sa kgorelediwe ke sepe, e lere ba le bantsi mo polokong.—Math. 24:14; Bar. 10:13, 14.