Kopa Thuso
1 Mafoko ano a a tlhotlheleditsweng a a reng “tse go leng boima go dirisana le tsone” a tlhalosa sentle dinako tseno tsa rona tsa mathata. (2 Tim. 3:1) Ka gone, ke eng se o tshwanetseng go se dira fa o kopana le dikgwetlho tse di boima tsa semoya, tse o akanyang gore ga o a nonofa sentle go lebana le tsone?
2 A o ka rata go bua le mongwe yo o godileng semoyeng mo phuthegong? Batho bangwe ba ka nna ba etsaetsega go dira jalo ka gonne ba tlhabiwa ke ditlhong, ba sa batle go imetsa motho yo mongwe, kana ba belaela gore a ba tla bona thuso. Ke boammaaruri gore re tshwanetse go gagamalela go dira maikarabelo a rona sentle ka mo re ka kgonang ka gone, mme ka metlha re tshwanetse go gololesega go batla thuso mo dikgannyeng tse di amanang le bomoya jwa rona.—Bagal. 6:2, 5.
3 Mo o Ka Simololang Teng: O ka nna wa batla go buisana le motshwari wa gago wa thuto ya buka mme o mo kope go dira le ene mo tirelong ya tshimo. Seno se tla go naya sebaka sa go mmolelela gore o rata go gola semoyeng. Fa e le gore ke motlhanka wa bodiredi, mo itsise gore o batla go thusiwa semoyeng mme ene o tla kopa bagolwane gore ba go thuse. Kana o ka nna wa buisana le ope fela wa bagolwane ka dilo tse di go tshwenyang.
4 O tlhoka go thusiwa ka tsela efe? A sengwe se koafaditse tlhagafalo ya gago? A o motsadi yo o se nang molekane yo o lekang gore bana ba gago ba nne gaufi le phuthego? A o motho yo o godileng yo o tlhokang go thusiwa? Kana a go na le mathata a a go kgobang marapo? Go ka nna thata go itshokela dinako tsa rona tsa mathata—mme gone o ka kgona. O ka kgona go thusiwa.
5 Tsela e Banna ba ba Godileng ba Thusang ka Yone: Bagolwane ba thusa go tswa pelong. Ba tla reetsa mathata a gago. Fa baboledi bangwe ba kopana le dikgoreletsi tse di tshwanang, bagolwane ba tla akanyetsa seno fa ba ntse ba disa le go ruta phuthego. E re ka e le “dikao mo letsomaneng,” ba nna ba ipaakanyeditse go dira mmogo le wena ka boitumelo. (1 Pet. 5:3) Go reetsa bakaulengwe bano ba ba nang le maitemogelo fa ba ntse ba buisana le wena ka melaometheo ya Baebele, go ka tokafatsa bodiredi jwa gago le go go thusa mo botshelong.—2 Tim. 3:16, 17.
6 Jesu o re neile “dimpho tsa banna” di le dintsi. (Baef. 4:8, ntlhanyana e e kwa tlase mo go NW) Seno se kaya gore bagolwane ba tla go thusa. Ba teng go go thusa. Tota, ‘ke ba gago.’ (1 Bakor. 3:21-23) Ka jalo mo boemong jwa go didimala, bua. Kopa thuso e o e tlhokang.