Go Ithuta Buka ya Boporofeti Jwa ga Daniele
1 Go simolola ka beke ya April 17, re tla bo re ithuta buka ya Ela Tlhoko Boporofeti Jwa ga Daniele! mo Thutong ya Buka ya Phuthego. Batho ba le bantsi ba setse ba badile buka eno e e kgatlhang, mme jaanong re na le sebaka sa go itumelela melemo ya go tlotla ka yone re le setlhopha. Go lalediwa baboledi botlhe, batho ba ba kgatlhegang le bana, ee, ba kgothalediwa go nna gone beke le beke mo thutong eno e e tseneletseng ya Baebele ya buka ya Daniele.—Dute. 31:12, 13.
2 Thulaganyo ya Thuto le Ditaelo: Thulaganyo ya thuto e e feletseng ya buka ya Boporofeti Jwa ga Daniele e mo kgatisong eno ya Tirelo ya Rona ya Bogosi. Tlhomamisa gore o tsenye khopi ya yone mo bukeng e o ithutang yone. Thulaganyo eno e bontsha kgaolo le dirapa tsa buka mmogo le ditemana tsa Daniele tse go tlileng go tlotliwa ka tsone mo thutong nngwe le nngwe ya beke. Dintlhanyana tse di kwa tlase di tlhalosa ka fa dintlha tse dingwe mo bukeng di tlileng go sekasekiwa ka gone le gore di tla sekasekiwa leng. Kwa bokhutlong jwa thuto nngwe le nngwe ya beke, motshwari o kgothalediwa go boeletsa ditemana dingwe tsa Daniele tse di kwadilweng mo thulaganyong ya beke eo le setlhopha. Fa nako e letla, ditemana tseno di ka balwa mme ga akgelwa ka tsone. Ditemana tse dingwe di tla balwa mo dibekeng tse di latelanang ka gonne tlhaloso ya tsone e tla bo e tswelela pele.
3 Baakanyetsa Thuto Sentle: Go dirilwe boiteko jwa go tlogela nako e e lekaneng beke nngwe le nngwe gore dintlha tse di balwang mo bekeng eo di se ka tsa tlotliwa go itlhaganetswe. Go na le dithuto tse nnè tse dikhutshwane thata. Ka gone, kwa bokhutlong jwa thuto ya beke ya June 5, motshwari a ka akaretsa poeletso ya Daniele 2:1-40. Mo bekeng ya June 26, a ka boeletsa Daniele 3:1-30. Mo bekeng ya September 4 go tshwanetse ga tlotliwa ka botlalo ka ditshwantsho le dikwalo tse di mo tsebeng ya 139. Go tshwanetse ga tlotliwa ka tšhate e e mo ditsebeng tsa 188 le 189 mo thutong ya beke ya October 2.
4 Ipaakanyetse thuto ya beke nngwe le nngwe sentle, mme o itumelele go nna le seabe mo go yone. Anaanela tshiamelo e o nang le yone ya go kopanela le phuthego ya ga Jehofa e e bonalang le go solegelwa molemo ke kitso le temogo tse re di neelwang ke batlodiwa ba gagwe ba ba ikanyegang. (Dan. 12:3, 4) Kgothaletsa ba bangwe ka lorato go nna gone ka metlha mo thutong ya buka. E kete rotlhe re ka ela tlhoko lefoko la Modimo la boporofeti jaaka le senotswe mo bukeng ya Daniele e e kgatlhang thata.—Baheb. 10:23-25; 2 Pet. 1:19.