A o Mmoledi wa ka Metlha wa Bogosi?
1 Rotlhe re ile ra itumela fa re utlwa gore Afrika Borwa e fitlheletse palo e e di fetang tsotlhe ya baboledi ba le 67 069 ka August 1999. Eleruri e ne e le ka go dira mmogo le ka go ikemisetsa! Go bonala gore mo dikgweding tse di neng tsa latela, bangwe ba baboledi bano ba ile ba palelwa ke go nna baboledi ba ka metlha ba Bogosi, ka gonne palogare ya kgwedi le kgwedi fa e sa le ka nako eo e ile ya nna mo e ka nnang 63 300. Seno se bontsha gore mmoledi a le 1 mo go ba le 16 o ile a se ka a bega gore o nnile le seabe mo bodireding kgwedi nngwe le nngwe. Re dumela gore kgothatso e e latelang e tla thusa go fedisa seemo seno.
2 Anaanela Tshiamelo: Re tshwanetse go anaanela thata tshiamelo e re nang le yone ya go abela ba bangwe dikgang tse di molemo tsa Bogosi. Tiro eno e itumedisa pelo ya ga Jehofa e bile e thusa batho ba ba dipelo tse di ikanyegang go bona tsela e e isang botshelong. (Dia. 27:11; 1 Tim. 4:16) Go neela bosupi ka metlha go dira gore re nne le boitemogelo mo bodireding mme seno se tla dira gore re itumele le go ikutlwa re fitlheletse sengwe.
3 Bega Tiro: Batho bangwe ba ba nnang le seabe mo tirelong ya tshimo ga ba bege tiro ya bone ka nako. Le ka motlha re se ka ra akanya gore tiro e re e dirileng e ka se tlhoke go begwa. (Bapisa Mareko 12:41-44.) Re tshwanetse go leka ka natla yotlhe go bega se re se dirileng! Fa o na le thulaganyo kwa gae ya go kwala nako e o e dirisang mo bodireding, jaaka go dirisa khalendara, e tla nna e go gakolola go kwala pego e e boammaaruri ka bonako fa kgwedi nngwe le nngwe e fela.
4 Thusa ka Tsela e e Tshwanetseng: Phuthego e ka nna ya baakanya dithulaganyo tsa yone gore e thuse batho ba ba tlhokang go thusiwa gore ba nne le seabe ka metlha mo bodireding. Mokwaledi wa phuthego le batshwari ba thuto ya buka ba tshwanetse go rulaganya le baboledi ba ba nang le boitemogelo gore ba thuse. Fa o na le bana kana baithuti ba bangwe ba Baebele ba e leng baboledi ba ba sa kolobediwang, ba rute go bega tiro ya bone kgwedi nngwe le nngwe.
5 Gakologelwa kgang eno ya botshelo, “Ke Leboga Go Bo Ke Na Le Lobaka Lo Loleele Ke Direla Jehofa,” e e mo makasineng wa Tora ya Tebelo ya October 1, 1997. Kgaitsadi Ottilie Mydland wa Norway o ne a nna mmoledi wa ka metlha wa dikgang tse di molemo pele a kolobediwa ka 1921. Dingwaga di le 76 morago ga moo, a na le dingwaga di le 99, o ne a re: “Ke itumelela go bo ke sa ntse ke kgona go nna mmoledi wa ka metlha.” A bo e le boikutlo jo bo molemo jang ne jo batlhanka botlhe ba ga Jehofa ba ka bo etsang!