Thulaganyo ya go Agiwa ga Diholo Tsa Bogosi
1 Jaaka re badile mo makasineng wa Tora ya Tebelo ya January 1, 2000, Afrika Borwa e nnile le koketsego e nngwe ya baboledi ya diperesente di le 3. Ka ntlha ya dikoketsego tseno, go tlhomiwa diphuthego di le dintsi mme seo se dira gore go tlhokege Diholo Tsa Bogosi ngwaga le ngwaga. Mo dingwageng tse tlhano tse di fetileng go ile ga tlhomiwa diphuthego tse disha mo Afrika Borwa, Botswana, Lesotho, Namibia le Swaziland mme ga agiwa diholo di le 150. Seno se dira gore palo ya diholo tse di neetsweng e nne kwa tlase fela ga 500. Re fopholetsa gore diphuthego tse dingwe di le 300 di ka tswa di tlhoka diholo. Ka gone re batla go akofisa thulaganyo ya go agiwa ga Diholo Tsa Bogosi. Diphuthego di le dintsi, tota le tse dikgolo, di kopanela mo mekhukhung, mo dikaratšheng, kana mo dikolong. A o ka thusa ka tsela nngwe? Go a itumedisa gore diphuthego dingwe di thusa tse dingwe ka madi a a tlhokegang, dikadimo, kana ka go di rekela dilwana tse di tlhokegang tsa go aga.—2 Bakor. 8:14.
2 Re anaanela thata moya wa go intsha setlhabelo o o bontshiwang ke Dikomiti Tsa Kago Tsa Kgaolo di le 20, ba malapa a bone le baithaopi. Le fa go ntse jalo, e re ka re tlhoka Diholo Tsa Bogosi thata, re sa ntse re tlhoka badiri ba ba oketsegileng. Fa o batla go thusa, kopa foromo ya Kingdom Hall Construction Worker Questionnaire (S-82) mo mokwaleding wa phuthego mme o tlatse tse pedi. Fa komiti ya tirelo e feditse go di tlatsa, ba tla romela e nngwe kwa Komiting ya Kago ya Kgaolo mme khopi e e salang ba tla e tsenya mo difaeleng tsa phuthego. Molebedi wa potologo o tla tlhomamisa gore o tlhatlhoba foromo eno nako le nako mme gape o tla kgothaletsa ba bangwe go dira dikopo. Fa e le gore o ka kgona go thusa mo dikgaolong tse dingwe koo ba tlhokang thuso thata gone, o kgothalediwa go kwalela Mokgatlho gore o ba neele tshedimosetso ya gago yotlhe.
3 Fa e le gore phuthego e batla go ikagela Holo ya yone ya Bogosi, kana go shafatsa e ba nang le yone, setlhopha sa bagolwane se tshwanetse ka tsweetswee go ikopanya le Komiti ya Kago ya Kgaolo ya lefelo la bone. Gape, pele lo buisana ka dikadimo le mokgatlho o o agang kana banka, ikopanyeng le Mokgatlho. Gakologelwang gore phuthego nngwe le nngwe e tshwanetse go nna le akhaonto ya banka e e leng fela ya madi a go aga, go shafatsa le go baakanya holo ya yone. (Bona lekwalo la Go Dikomiti Tsotlhe Tse di Tlhokomelang Diholo Tsa Bogosi la June 15, 1997.) Akhaonto eno le yone e tshwanetse go tlhatlhobiwa dikgwedi dingwe le dingwe tse tharo.
4 Jaaka o ka bona mo ditshwantshong, Dikomiti Tsa Kago Tsa Kgaolo di aga diholo tse di farologaneng go ya ka se phuthego e se tlhokang, ka se e kgonang go se duelela, le go ya ka maemo a tikologo. Mme tsotlhe di baka Jehofa le go mo tlotla. Le mororo re itumela fa diphuthego “di oketsega ka palo letsatsi le letsatsi,” a re boneng se mongwe le mongwe wa rona a ka se dirang gore a thuse diphuthego tse di oketsegileng go nna le Holo ya Bogosi.—Dit. 16:5.
[Pictures on page 4]
Bloemfontein South, Free State
Chatsworth West, KwaZulu-Natal
Khuma, Bokone Bophirima
Zoar, Kapa Bophirima
[Pictures on page 5]
Hillcrest, KwaZulu-Natal
Fernie Central, Mpumalanga
Robertson, Kapa Bophirima
Worcester, Kapa Bophirima