A o Wetsa Bodiredi Jwa Gago ka Botlalo?
1 Mo bukeng ya Ditiro, re bolelelwa gore barutwa ba ga Jesu ba ne ba wetsa bodiredi jwa bone ka go naya batho “bosupi ka botlalo.” (Dit. 2:40; 8:25; 28:23) Ga go pelaelo gore jono e ne e le jone boikaelelo jwa ga moaposetoloi Paulo. (Dit. 20:24) A ga se one mokgele wa gago jaaka modiredi wa dikgang tse di molemo? O ka o fitlhelela jang?
2 Baakanyetsa Puisano ya Gago: Go baakanyetsa go botlhokwa thata gore o tlhomamise gore o naya bosupi jo bo nang le matswela mo bodireding. Go botlhokwa bogolo jang fa re tsamaisa dimakasine, e re ka diteng tsa tsone di fetoga ka metlha. Go re thusa gore re tlhomelelwe sentle, kgatiso eno ya Tirelo ya Rona ya Bogosi e simolola karolo e ntšha—kholomo e e ka fa molemeng, e e nang le lenaane la dikai tsa dipuisano tse re ka di dirisang go buelela dimakasine tsa bosheng tsa Tora ya Tebelo le Tsogang! Go tla gatelelwa setlhogo se se mo nakong se se tla kgatlhang batho ba le bantsi mo kgatisong nngwe le nngwe. O ka tsweledisa dipuisano tse dikhutshwane tseno jang?
3 Tlhopha kakantsho e o akanyang gore e tla nna le matswela thata mo tshimong ya lona. Bala ka kelotlhoko setlhogo se go buiwang ka sone, mme o tshwaye dintlha tse di rileng tse go lebegang di ka tsosa kgatlhego. Batla temana e e umakilweng mo makasineng e e tsamaisanang le se go tlotliwang ka sone le e o ka kgonang go e balela mong wa ntlo. Konela ka mafoko a sekae go kgothatsa moreetsi wa gago gore a bale makasine oo, mme fa o bona go tshwanela o bolele ka bokhutshwane gore mong wa ntlo a ka ntsha moneelo go tshegetsa tiro ya lefatshe lotlhe ya Basupi ba ga Jehofa. Jaanong, boeletsa tsela eno ya go buelela makasine gape.
4 Rulaganya go Dirisa Baebele: Fa o rulagantse sentle, gantsi o ka kgona go bala temana nngwe mo puisanong ya gago le mong wa ntlo. Ka sekai, baboledi ba ba nang le maitemogelo mo mafelong a le mantsi ba bona matswela thata ka go ya kwa matlong a batho ba tshwere Baebele, ba dumedisa mong wa ntlo ba bo ba re:
◼ “Re botsa batho gore a ba dumela seno . . . ” Bala Genesise 1:1, morago ga moo o bo o botsa jaana: “A o dumalana le polelo eno?” Fa motho yono a dumela, e re: “Le nna ke a dumela. Le fa go ntse jalo, a o akanya gore fa e le gore Modimo o bopile dilo tsotlhe, ke ene gape yo o bakang boikepo?” Morago ga go mo letla gore a arabe, bala Moreri 7:29. Bula buka ya Kitso mo tsebeng ya 71, mme o bale serapa 2. Mo kgothaletse go bala buka eno.
5 Boela Kwa Bathong Botlhe ba ba Kgatlhegang: Ga o ka ke wa wetsa bodiredi jwa gago ka botlalo fa o sa boele kwa bathong ba ba kgatlhegang. Fa o tshwere motlotlo o o monate le motho, le fa o ka mo tsamaisetsa makasine kana buka epe fela e nngwe, kwala leina la motho yoo le aterese ya gagwe. Leka ka natla go godisa kgatlhego ya motho yono ka go boela kwa go ene ka bonako. Kwantle ga go okaoka, mmolelele gore o rata go ithuta Baebele le ene.
6 Barutwa ba lekgolo la ntlha la dingwaga ba ne ba itse gore Jesu o ne a ba laetse gore ba ‘neele bosupi ka botlalo.’ (Dit. 10:42) Taelo eno e sa ntse e dira le mo go rona, ka gonne eno ke yone fela tsela e re tla kgonang go dira barutwa ka yone. (Math. 28:19, 20) A re direng bojotlhe jwa rona go wetsa bodiredi jwa rona ka botlalo.—2 Tim. 4:5.