Go Apara ka Tsela e e Rulagantsweng Sentle go Bontsha Gore re Boifa Modimo
1. Re ka bontsha jang gore re anaanela kopano ya rona e e tlang?
1 Mo bogautshwaneng re tla nna le tshiamelo ya go nna baeng ba ga Jehofa kwa Kopanong ya Ditšhabatšhaba kgotsa ya Kgaolo ya 2003 ya setlhogo se se reng, “Nayang Modimo Kgalalelo.” A bo re leboga jang ne go bo Jehofa a re laleditse kwa moketeng o mogolo jaana wa semoya! Re ka bontsha gore re a mmoifa e bile re anaanela dithulaganyo tsa gagwe tsa semoya ka tsela e re aparang le e re ipaakanyang ka yone.—Pes. 116:12, 17.
2. Ke ka ntlha yang fa go le botlhokwa gore re nne phepa re bo re ipaakanye ka bothakga?
2 Go Nna Phepa le go Apara ka Tsela e e Rulagantsweng Sentle: Tsela e re lebegang ka yone e tshwanetse ya tsamaisana le ditekanyetso tsa Modimo wa rona, yo o phepa e bile a na le thulaganyo. (1 Bakor. 14:33; 2 Bakor. 7:1) Mmele wa rona, moriri wa rona le dinala tsa rona di tshwanetse go nna phepa mme re tshwanetse go ipaakanya ka tsela e e bothakga. Gompieno go tlwaelegile gore batho ba ipaakanye ka tsela e e botlhaswa. Le fa go ntse jalo, fela ka gonne motshameki mongwe yo o tumileng wa difilimi kgotsa mogaka mongwe wa metshameko a lebega botlhaswa, seno ga se reye gore le Mokeresete a lebege jalo. Fa re latela difeshene, batho ba ka nna ba palelwa ke go bona pharologano fa gare ga batho ba ba direlang Modimo wa boammaaruri le ba ba sa mo direleng.—Mal. 3:18.
3. Re ka tlhomamisa jang gore tsela e re lebegang ka yone e tla tsamaisana le kgakololo e e mo go 1 Timotheo 2:9, 10?
3 Moaparo o o Tshwanelang Badiredi ba Bakeresete: Fa moaposetoloi Paulo a ne a kwalela molebedi wa Mokeresete e bong Timotheo, o ne a kgothaletsa gore “basadi ba ikgabise ka diaparo tse di rulagantsweng sentle, ka boingotlo le go itekanela sentle ga mogopolo, . . . ka tsela e e tshwanelang basadi ba ba ipolelang fa ba tlotla Modimo, e leng, ka ditiro tse di molemo.” (1 Tim. 2:9, 10) Fa re batla go tlhomamisa gore diaparo tsa rona di rulagantswe sentle, re tshwanetse go akanyetsa kgang eno ka kelotlhoko. Diaparo di tshwanetse go nna bothakga, di le phepa e bile e le tse di tlotlegang—di se botlhaswa e bile di sa tsose keletso ya tlhakanelodikobo.—1 Pet. 3:3.
4, 5. Banna le basadi ba Bakeresete ba tshwanetse go tsaya ditlhagiso dife tsia?
4 Gape Paulo o ne a tlhagisa gore re se ka ra feteletsa dilo “ka ditsela tsa go loga moriri loetse le ka gouta kgotsa diperela kgotsa moaparo wa tlhwatlhwa e e kwa godimo thata.” (1 Tim. 2:9) Basadi ba Bakeresete ba tshwanetse go nna tekatekano fa ba dirisa dibenyane, ditlolo tsa go intlafatsa (makeup), le mekgabo e mengwe.—Dia. 11:2.
5 Kgakololo e Paulo a neng a e naya basadi ba Bakeresete e na le molaomotheo o o dirang le mo banneng ba Bakeresete. Bakaulengwe ba tshwanetse go tila mokgwa wa go apara o o tsamaisanang le tsela e lefatshe le dirang dilo ka yone. (1 Joh. 2:16) Ka sekai, mo dinageng dingwe, go tsene feshene ya go apara diaparo tse di maburabura, mme mokgwa ono wa go apara ga o dire gore motho a nne le tebego e e tshwanelang modiredi wa Modimo.
6. Ke ka ntlha yang fa re tshwanetse go nna re apere le go ipaakanya ka manontlhotlho fa re ya kopanong le fa re boa, fa re le kwa kopanong le morago ga thulaganyo ya letsatsi le letsatsi?
6 Fa re Iketlile Morago ga Thulaganyo: Bontsi jwa bakaulengwe le bokgaitsadi ba tlhoma sekao se se molemo thata mo kgannyeng ya moaparo le go ikgabisa fa ba le mo kopanong. Le fa go ntse jalo, dipego di bontsha gore bangwe ba apara botlhaswa fa ba ya le fa ba tswa kwa kopanong kgotsa fa ba iketlile morago ga thulaganyo. Tota tsela e re lebegang ka yone, e ka tswa e le ka nako ya thulaganyo kgotsa ka dinako tse dingwe, e tlhotlheletsa tsela e batho ba bangwe ba lebang batho ba Modimo ka yone. E re ka re tsenya dibetšhe tsa rona tsa kopano, re tshwanetse go apara ka tsela e e tshwanelang badiredi ba Bakeresete ka dinako tsotlhe. Seno gantsi se dira gore ba bangwe ba re akgole e bile se re bulela tsela ya gore re kgone go naya bosupi.—1 Bakor. 10:31-33.
7. Fa re apere e bile re ipaakantse ka tsela e e rulagantsweng sentle, seo se ka ama batho ba bangwe jang?
7 Fela jaaka monyenyo o o botsalano o tokafatsa tsela e re lebegang ka yone mo sefatlhegong, diaparo tse di rulagantsweng sentle le tsone di dira gore molaetsa o re o tshwereng le phuthego e re e emelang di nne le seriti. Bangwe ba ba re bonang ka nako ya Dikopano tsa “Nayang Modimo Kgalalelo” monongwaga, ba ka nna ba tlhotlheletsega go botsa gore ke ka ntlha yang fa re farologane le batho ba bangwe mme gongwe kgabagare ba re: “Re tla tsamaya le lona, gonne re utlwile [e bile re bone] gore Modimo o na le lona.” (Seka. 8:23) E kete rotlhe re ka bontsha go boifa Jehofa ka tsela e re aparang le go ipaakanya ka yone.
[Box on page 5]
Apara ka Tsela e e Nang le Seriti
▪ Fa o le mo mosepeleng
▪ Fa o le kwa kopanong
▪ Fa o iketlile morago ga thulaganyo