Re Sikarisitswe Dikgang Tse di Molemo
1 A bo e le tshiamelo e kgolo jang ne go bo re sikarisitswe dikgang tse di molemo tsa Modimo! (1 Bathes. 2:4) Le fa bangwe ba ka gana molaetsa ono o o maatla, o ngoka batho ba ba peloephepa jaaka ekete ke lonko lo lo monate. (2 Bakor. 2:14-16) Ba ba amogelang dikgang tse di molemo ba bo ba ikobela molaetsa wa tsone ba tla bolokwa. (Bar. 1:16) Re tshwanetse ra dirang ka boikarabelo jono jo re bo sikarisitsweng?
2 Jesu le Baaposetoloi: Jesu o ne a dira gore go bolela dikgang tse di molemo go tle pele. (Luke 4:18, 43) Tota le fa a ne a lapile e bile a tshwerwe ke tlala, tsela e a neng a rata batho ka yone le go anaanela molaetsa go ne ga mo tlhotlheletsa go o abela ba bangwe. (Mar. 6:30-34) Ka tsela e a neng a bua ka yone le e a neng a itshwara ka yone, o ne a gatelela mo megopolong ya barutwa ba gagwe botlhokwa jwa tiro ya go rera ka Bogosi.—Math. 28:18-20; Mar. 13:10.
3 Baaposetoloi ba ne ba etsa Jesu ka go bolela molaetsa wa Bogosi ka tlhagafalo. Tota le fa ba ne ba itewa le go laelwa gore ba tlogele go rera ‘ba ne ba tswelela ba sa kgaotse ba ruta e bile ba bolela dikgang tse di molemo.’ (Dit. 5:40-42) Moaposetoloi Paulo o ne a dira ka natla mo tirong eno. (1 Bakor. 15:9, 10; Bakol. 1:29) O ne a tshwantsha tshiamelo ya go bolela dikgang tse di molemo le sekoloto se a se kolotang ba bangwe mme o ne a ikemiseditse go latlhegelwa ke menate mengwe gore a se duele.—Dit. 20:24; Bar. 1:14-16.
4 Tshiamelo ya Rona Gompieno: Go anaanela thomo e e boitshepo e re e sikarisitsweng go tla re tlhotlheletsa gore re batle ditsela tse re ka atolosang seabe sa rona ka tsone mo tirong ya go rera. (Bar. 15:16) Edward, yo o neng a tsamaya ka setulo sa maotwana, o ne a tle a nne mo kgorong ya hotele mme a buisane le baeng ka tumelo ya gagwe. Le fa go ntse jalo, ka a ne a eletsa go oketsa tiro ya gagwe, o ne a itiretse ntlonyana mo lloring e nnye mme a dirisa llorinyana eno ka dingwaga di le dintsi a bula tsela mme a feleletsa a e dirisitse go tsamaya dikilometara di le diketekete. Jaaka Edward, ba le bantsi gompieno ba fetotse maemo a bone gore ba nne le seabe se se oketsegileng mo go anamiseng dikgang tse di molemo.
5 Ekete le rona gompieno re ka etsa Jesu le baaposetoloi ka go dira gore tiro ya go rera e nne yone e tlang pele mo matshelong a rona ka dinako tsotlhe. Ka go dira jalo, re bontsha gore re rata batho le gore re anaanela dikgang tse di molemo tse re di sikarisitsweng.