Ke Eng se se Botlhokwa Thata mo go Wena?

¹ Mekgatlho e le mentsi ya bodumedi e gatelela thata go dira ditiro tsa bopelontle, tse di tshwanang le go thusa ka mafelo a thuto kgotsa ka dilo tsa kalafi. Mme Basupi ba ga Jehofa bone, le fa ba sa lebale “go dira molemo le go abalana dilo le ba bangwe,” ba leba go thusa batho semoyeng e le gone go go botlhokwa thata.—Baheb. 13:16.

² Sekao sa mo Lekgolong la Ntlha la Dingwaga: Jesu o ne a dira ditiro di le dintsi tse di molemo ka nako ya bodiredi jwa gagwe jwa mo lefatsheng, mme tiro ya gagwe e kgolo e ne e le go neela bosupi ka boammaaruri. (Luke 4:43; Joh. 18:37; Dit. 10:38) O ne a laela balatedi ba gagwe gore ba ‘tsamaye mme ba dire batho ba ditšhaba tsotlhe barutwa, . . . ba ba rute.’ (Math. 28:19, 20) Gape o ne a bontsha gore ba ba dumelang mo go ene ba ne ba tla dira tiro e a e simolotseng mme e le ka selekanyo se segolo thata. (Joh. 14:12) Jesu o ne a tsaya tiro ya go rera e le e e botlhokwa thata ka gonne e thusa batho go ithuta ka tsela e e isang polokong.—Joh. 17:3.

³ Moaposetoloi Paulo o ne a leba tiro ya gagwe ya go rera e le selo se a ‘patelesegang’ go se dira, se a ka se kang a se itlhokomolosa. (1 Bakor. 9:16, 17) O ne a iketleeditse go itima dilo le fa e le dife, go itshokela diteko le fa e le dife kgotsa mathata le fa e le afe a go neng go tlhokega gore a a itshokele gore a wetse bodiredi jwa gagwe. (Dit. 20:22-24) Moaposetoloi Petere le ditsala tsa gagwe le bone ba ne ba bontsha moya o o tshwanang. Tota le fa ba ne ba latlhelwa mo kgolegelong le go itewa, ba ne “ba tswelela ba sa kgaotse ba ruta e bile ba bolela dikgang tse di molemo kaga Keresete, e bong Jesu.”—Dit. 5:40-42.

⁴ Go tweng ka rona? A re tsaya tiro ya go bolela dikgang tse di molemo tsa Bogosi le go dira barutwa e le botlhokwa thata? A re tshwana le Jesu mo go bontsheng go amega ka mmatota ka ba ba ‘sotlegileng e bile ba gasame jaaka dinku tse di se nang modisa’? (Math. 9:36) Ditiragalo tsa lefatshe tsa bosheng jaana le boporofeti jwa Baebele di bontsha sentle gore tsamaiso eno e e boikepo e felelwa ke nako! Fa re nna re akantse ka botlhokwa jwa tiro eno ya go rera, seno se tla dira gore re tswelele pele re rera ka tlhoafalo.

⁵ Sekaseka Maemo a Gago: E re ka maemo a rona a fetofetoga, go molemo gore nako le nako re bone gore a re ka kgona go dira diphetogo dingwe gore re nne le seabe ka botlalo mo tirong ya go rera. Kgaitsadi mongwe yo e neng e le mmulatsela wa ka metlha mo dingwageng tsa bo1950, tsa bo1960, le tsa bo1970 o ne a bona go tlhokega gore a tlogele ka ntlha ya bolwetse. Le fa go ntse jalo, fa nako e ntse e ile, o ne a ikutlwa botoka. Bosheng jaana o ne a sekaseka maemo a gagwe gape mme a bona gore a ka kgona go nna mmulatsela gape. O ne a itumetse tota gore a bo a ne a ile Sekolong sa Tirelo ya Bobulatsela a na le dingwaga di le 90! Go tweng ka wena? A o gaufi le go tlogela tiro kgotsa go aloga kwa sekolong? A o ka kgona go tsaya bobulatsela fa maemo a gago a fetoga?

⁶ E ne ya re fa Jesu a lemoga gore Maratha “o ne a itewa tsebe ke go dira ditiro tse dintsi,” o ne a mo akantsha ka bonolo gore o ne a tla solegelwa molemo thata fa a ne a ka boloka dilo di sa raraana. (Luke 10:40-42) A o ka kgona go dira gore botshelo jwa gago bo se ka jwa raraana? A ruri go a tlhokega gore monna le mosadi mo lelapeng ba bereke ka bobedi? Fa go dirwa diphetogo dingwe a lelapa le ka kgona go tshela ka lotseno lwa motho a le mongwe fela? Ba le bantsi ba ile ba dira diphetogo gore ba nne le seabe se segolwanyane mo bodireding mme seno se ba solegetse molemo thata semoyeng.

⁷ E kete rotlhe re ka latela sekao se re se tlhometsweng ke Jesu le baaposetoloi ba gagwe! Re ka tlhomamisega gore Jehofa o tla segofatsa maiteko a re a dirang ka tlhoafalo gore re nne le seabe mo tirong e e botlhokwa thata eno ya go rera dikgang tse di molemo tsa Bogosi.—Luke 9:57-62.