Se se Tlang Pele mo go Rona
1. Jesu o ne a bontsha jang gore bodiredi bo ne bo le botlhokwa mo go ene?
1 Bodiredi e ne e le selo se se tlang pele mo go Jesu. O ne a dira ka natla, a tsamaya dikilometara di le makgolokgolo go ralala Palesetina a rerela batho ba le bantsi ka mo a neng a ka kgona ka teng. O ne a tshela botshelo jo bo sa raraanang e le gore a kgone go dirisa nako e ntsi mo bodireding le go tlhoma mogopolo mo go jone. (Math. 8:20) Fa boidiidi bo ne bo batla go mo tshwara gore a fodise balwetse ba bone, o ne a re: “Le kwa metseng e mengwe ke tshwanetse go bolela dikgang tse di molemo tsa bogosi jwa Modimo, ka gonne ke ne ka romelwa ka ntlha ya seno.”—Luke 4:43.
2. Ke ka ntlha yang fa bodiredi bo ne bo le botlhokwa thata jaana mo go Jesu?
2 Ke ka ntlha yang fa bodiredi bo ne bo le botlhokwa thata jaana mo go Jesu? O ne a tshwenyegile thata ka go itshepisiwa ga leina la ga Jehofa. (Math. 6:9) O ne a rata Rraagwe wa kwa legodimong mme e bile a eletsa go diragatsa thato ya gagwe le go ikobela melao ya gagwe yotlhe. (Joh. 14:31) Mo godimo ga moo, o ne a amega tota ka batho ba bangwe e bile o ne a batla go ba thusa.—Math. 9:36, 37.
3. Re ka bontsha jang gore re tlhomile mogopolo mo bodireding?
3 Etsa Jesu: Go nna le boikutlo jo Jesu a neng a na le jone e ka nna kgwetlho, ka gonne lefatshe le re jela nako e ntsi e bile le re itaya tsebe ka ditsela tse dintsi. (Math. 24:37-39; Luke 21:34) Ka jalo, re tshwanetse go tlhomamisa dilo tse di botlhokwa thata, re rulaganye nako ya go ipaakanyetsa bodiredi le go nna le seabe ka metlha mo tirong ya go rera. (Bafil. 1:10) Re leka go tshela botshelo jo bo sa raraanang le go tila go dirisa lefatshe ka botlalo.—1 Bakor. 7:31.
4. Ke ka ntlha yang fa go le botlhokwa go dira gore bodiredi e nne selo se se tlang pele mo go rona gone jaanong?
4 Fa nako e le khutshwane, motho yo o botlhale o dira gore dilo tsa botlhokwa di tle pele. Ka sekai, fa a utlwile gore go na le setsuatsue se se tlang, o tla dirisa nako le maatla a gagwe go dira dithulaganyo tsa go sireletsa ba lelapa la gagwe le go tlhagisa baagelani ba gagwe. O tla beela ditiro tse di seng botlhokwa thata kwa thoko. Nako e e setseng pele setsuatsue sa Haramagedona se goroga e khutshwafetse. (Sefa. 1:14-16; 1 Bakor. 7:29) E le gore re ipoloke le go boloka batho ba ba re reetsang, re tshwanetse go nna re itlhokometse le go tlhokomela go ruta ga rona, e ka ne e le mo phuthegong kgotsa kwa ntle ga phuthego. (1 Tim. 4:16) Ee, go falola ga rona go ikaegile ka gore re dire gore bodiredi e nne selo se se tlang pele mo botshelong jwa rona!