Bodiredi Jwa Bokeresete—Tiro ya Rona ya Botlhokwa
1 Rotlhe re na le ditiro tse di farologaneng tse re tshwanetseng go di dira. Modimo o batla gore re tlamele ba malapa a rona. (1 Tim. 5:8) Le fa go ntse jalo, tiro eo e re e laelwang ke Modimo ga e a tshwanela go nna botlhokwa go feta tiro ya go rera ka Bogosi le go dira barutwa.—Math. 24:14; 28:19, 20.
2 Jesu o ne a re tlhomela sekao se re ka se latelang fa re ntse re ‘batla bogosi pele.’ (Math. 6:33; 1 Pet. 2:21) Le fa a ne a se na dithoto tse dintsi o ne a tshwaregile thata mo go direng thato ya ga Rraagwe. (Luke 4:43; 9:58; Joh. 4:34) O ne a dira maiteko a go naya bosupi nako nngwe le nngwe fa go na le sebaka sa go dira jalo. (Luke 23:43; 1 Tim. 6:13) O ne a rotloetsa barutwa ba gagwe gore le bone ba kgatlhegele tiro ya thobo fela jalo.—Math. 9:37, 38.
3 Go Etsa Jesu Gompieno: Re ka etsa sekao sa ga Jesu ka go leka go tshela botshelo jo bo sa raraanang jo bo amanang thata le bodiredi jwa Bokeresete. Fa re na le dilo tse di tlhokegang mo botshelong, a re tseyeng tsia kgakololo ya Baebele ya gore re se ka ra nnela go batla dithoto tse dintsi tsa lefatshe leno. (Math. 6:19, 20; 1 Tim. 6:8) A bo go le botoka thata jang ne gore re leke go oketsa seabe sa rona mo tirong ya go rera! Fa re lebana le maemo a a thata, a re direng ka natla fela jaaka Jesu a ne a dira, re sa letle matshwenyego a botshelo a fekeetsa tiro ya rona ya konokono ya go bolela dikgang tse di molemo tsa Bogosi.—Luke 8:14; 9:59-62.
4 Tota le batho ba ba nang le maikarabelo a mantsi ba tsaya tiro ya go rera e le botlhokwa go feta tse dingwe tsotlhe. Mokaulengwe mongwe yo o nang le lelapa le legolo, yo o nang le maikarabelo a mantsi kwa tirong ya boitshediso e bile e le mogolwane mo phuthegong ya Bokeresete a re: “Ke tsaya bodiredi e le yone tiro ya me ya botlhokwa.” Kgaitsadi mongwe wa mmulatsela a re: “Go bula tsela go botlhokwa thata go feta go atlega mo tirong ya boitshediso.”
5 E kete re ka latela sekao sa ga Jesu, le fa re ka tswa re le mo maemong afe. Jang? Ka go dira gore bodiredi jwa Bokeresete e nne yone tiro ya rona ya botlhokwa.