Lekwalo le le Tswang Lekaleng

Baboledi ba ba rategang ba bogosi,

“Modimo o ne a nna a godisa.” (1 Bakor. 3:6) A bo go ne go itumedisa jang ne go bona kgolo e e neng e direga mo tshimong e e tlhokometsweng ke lekala la Afrika Borwa mo ngwageng wa tirelo wa 2003.

April e ne e le kgwedi e e tlhomologileng! Afrika Borwa e begile palo e ntšha ya baboledi ba le 73 456 le dithuto tsa Baebele di le 97 066; Namibia yone e begile dithuto tsa Baebele di le 1 725, diura di le 26 216, dimakasine di le 18 811 le maeto a go boela a le 9 130; Lesotho e begile palo ya baboledi ba le 2 942 le dithuto tsa Baebele di le 4 220; mme Botswana yone e begile palo ya baboledi ba le 1 288. Re akgolela bakaulengwe ba kwa Swaziland le St. Helena tiro ya bone e ba e dirileng ka natla.

Jehofa o segofatsa tiro e e dirwang mo tshimong ya bosusu. Ka July 1, go ne ga tlhomiwa phuthego e ntšha e e dirisang Puo ya Diatla kwa Johannesburg mme e tla tlhokomela bosusu ba le bantsi ba ba leng mo Gauteng. Ditlhopha tse di dirisang Puo ya Diatla kwa Cape Town, Durban, Windhoek le kwa Gaborone le tsone di gatetse pele sentle.

Fa kgwedi ya July e fela, ke fa go setse go neetswe Diholo Tsa Bogosi di le 35 mme go ne go sa ntse go agiwa tse dingwe tse dintsi. Dikomiti Tsa Kgaolo Tsa Kago di le 25 le baithaopi ba le bantsi ba lebogelwa tiro e e botlhokwa e ba e dirileng.

Gore re kgone go tlamela tshimo ya rona e e golang ka dikgatiso, kago ya bogatisetso e a atolosiwa mo Roodekrans. Tiro e e dirwang ke batho ba konteraka e gatetse pele sentle mme e tshwanetse go bo e weditswe mo masimologong a 2004. Mo e ka nnang ka April 2004, re lebeletse go amogela motšhini o mosha o o gatisang wa maemo a a kwa godimo. Motšhini ono e tla bo e le o o kgonang go gatisa dimakasine di ka nna 25 ka motsotswana. Gape, ka 2004 re tlile go tsenya motšhini o mosha o o rokaganyang dibuka.

Jaaka fa re simolola ngwaga wa tirelo wa 2004, re kopanela le lona mo go rapeleleng gore Jehofa ‘a nne a godise.’

Bakaulengwe ba lona,

Ofisi ya Lekala ya Afrika Borwa