Etsa Tshiamiso ya ga Jehofa
1 “Jehofa ke morati wa tshiamiso.” (Pes. 37:28) Ka jalo, le fa a laotse gore lefatshe leno le le se nang tshiamo le senngwe, o rulagantse gore batho ba tlhagisiwe pele. (Mar. 13:10) Seno se neela batho tshono ya gore ba ikwatlhaye mme ba bolokiwe. (2 Pet. 3:9) A re leka ka natla go etsa tshiamiso ya ga Jehofa? A tsela e batho ba sotlegang le go boga ka yone e re tlhotlheletsa gore re bue le bone ka tsholofelo ya Bogosi? (Dia. 3:27) Fa re rata tshiamiso re tla tlhotlheletsega go nna le seabe ka botlalo mo tirong ya go rera.
2 Rera o sa Tlhaole: Fa re bolelela mongwe le mongwe ditsholofetso tsa Modimo re sa tlhaole re ‘dira tshiamiso.’ (Mik. 6:8) Re tshwanetse go gana mokgwa o batho ba ba sa itekanelang ba nang le one wa go rata go atlhola ba bangwe re lebile tsela e ba lebegang ka yone ka fa ntle. (Jak. 2:1-4, 9) “Thato ya ga [Jehofa] ke gore batho ba mefuta yotlhe ba bolokwe mme ba tle mo kitsong e e leng yone, ya boammaaruri.” (1 Tim. 2:4) Lefoko la Modimo la boammaaruri le ka dira gore go nne le diphetogo tse dikgolo mo matshelong a batho. (Baheb. 4:12) Fa re lemoga ntlha eno seno se ka re tlhotlheletsa gore re bue le batho re na le tsholofelo, tota le mo go ba ba neng ba gana go re reetsa mo nakong e e fetileng.
3 Kgaitsadi mongwe yo o berekang mo lebenkeleng o ne ka tsela nngwe a tshosiwa ke tsela e moreki mongwe yo o neng a reka ka metlha mo lebenkeleng la bone a neng a lebega ka yone. Le fa go ntse jalo, fa a ne a bulegelwa ke tshono o ne a leka go rerela monna yono ka Paradaise e Modimo a e solofeditseng. O ne a mo araba ka go phatloga fela a mmolelela gore ga a dumele mo ditlhamaneng e bile ene ke lehipi mme o dirisa diokobatsi. Mme kgaitsadi yono ga a ka a ineela. Letsatsi lengwe monna yono o ne a botsa kgaitsadi yono gore o akanyang ka moriri wa gagwe o moleele, ka jalo kgaitsadi yono o ne a mo tlhalosetsa ka botlhale se Baebele e se bolelang ka kgang eno. (1 Bakor. 11:14) Kgaitsadi yono o ne a gakgamala tota mo letsatsing le le latelang fa a bona monna yono a beotse ditedu e bile a na le moriri o mokhutshwane! O ne a ikopela thuto ya Baebele, mme kgaitsadi yono a mo rulaganyetsa mokaulengwe mongwe yo o neng a itumelela go ithuta le ene, mme monna yono o ne a gatela pele mme a ineela le go kolobediwa. Fela jaaka monna yono, batho ba le bantsi ba ba direlang Jehofa gompieno ba itumelela gore batho ba ba neng ba ba ruta ka molaetsa wa Bogosi ga ba a ka ba ba tlhaola, e bile ba ne ba le pelotelele tota le bone.
4 Go ise go ye kae, Jehofa o tla tlosa tshiamololo mo lefatsheng lotlhe. (2 Pet. 3:10, 13) Mo nakong e e sa ntseng e setse, a re etseng tshiamiso ya ga Jehofa ka go neela batho botlhe tshono ya gore ba falole timetso e e tlang ya lefatshe leno le le sa siamang la ga Satane.—1 Joh. 2:17.