Karolo 1: Thuto ya Baebele ke Eng?
Go Tshwara Dithuto Tsa Baebele Tse di Gatelang Pele
1 Kgwedi le kgwedi batho ba Modimo ba tshwara dithuto tsa Baebele tse di ka nnang dimilione di le thataro lefatshe ka bophara. Fa re dirisa mekgwa e e nang le matswela ya go ruta, re ka thusa baithuti bano ba Baebele gore ba gatele pele go fitlha ba ineela le go kolobediwa mme ba nne ba ba “tshwanelegang sentle go ruta ba bangwe.” (2 Tim. 2:2) A o ka rata go thusa motho yo o ithutang le ene gore a gatele pele jalo? Go simolola ka kgatiso eno ya Tirelo ya Rona ya Bogosi go tla nna le motseletsele wa ditlhogo tse di tla tlhalosang dintlha tsa konokono tse di ka thusang go tshwara dithuto tsa Baebele tse di gatelang pele.
2 Nako E o Ka Simololang go Bega Thuto ya Baebele ka Yone: Fa o tshwara motlotlo wa Baebele le motho ka metlha, le fa o le mokhutshwane, o dirisa Baebele le nngwe ya dikgatiso tsa rona tse di akantshiwang, o a bo o tshwere thuto ya Baebele. E tsewa e le thuto le fa gone e ka tswa e tshwaretswe mo kgorong kgotsa ka founu. O ka nna wa simolola go bega thuto eo fa e le gore e setse e tshwerwe makgetlo a le mabedi morago ga gore o bontshe motho gore thuto e tshwarwa jang le fa go bonala e tla nna thuto e e tswelelang.
3 Boroutšhara jwa Re Direng le buka ya Kitso ke dikgatiso tse re di dirisang go tshwara dithuto di le dintsi tsa Baebele. Fa lo feditse go di bala, mme go bonala motho yoo a gatela pele, le fa a ka tswa a le bonya, mme a supa gore o anaanela se a ithutang sone, thuto e ka tswelediwa ka buka ya Obamela Modimo. Go ka nna ga dirisiwa boroutšhara jwa O ka Kgona go Nna Tsala ya Modimo! fa o ithuta le motho yo o sa rutegang kgotsa yo o nang le mathata a go bala.
4 Tiro ya go tshwara dithuto tsa Baebele e nnile le matswela tota go thusa dimilione tsa batho gore ba nne barutwa ba ga Jesu Keresete. (Math. 28:19, 20) Fa o ka dirisa dikakantsho tse di tla neelwang mo metseletseleng e e tlang ya ditlhogo tseno, o tla kgona go tshwara dithuto tsa Baebele tse di gatelang pele.