Karolo 10: Go Thapisa Baithuti mo Bodireding Jwa Ntlo le Ntlo
Go Tshwara Dithuto Tsa Baebele Tse di Gatelang Pele
1 Fa bagolwane ba swetsa ka go re motho yo o ithutang Baebele o tshwanelegela go nna mmoledi yo o sa kolobediwang, a ka nna a simolola go tswa le phuthego go ya bodireding jwa phatlalatsa. (Bona Re Rulaganyeditswe go Dira Thato ya ga Jehofa, dits. 79-81.) Re ka thusa jang batho ba re ithutang le bone gore ba kgone go lebana le dikgwetlho tsa go rera ka ntlo le ntlo?
2 Go Baakanyetsa Mmogo: Go baakanyetsa sentle go botlhokwa fela thata. Bontsha motho yo o ithutang le ene gore a ka bona kae dikakantsho mo kgatisong ya Tirelo ya Rona ya Bogosi le mo bukeng ya Go Fetolana, e leng dikakantsho tse a ka di dirisang fa a le mo tshimong mme o mo thuse go tlhopha puisano e e motlhofo e e tshwanelang maemo a tshimo ya lefelo la lona. Mo kgothatse go tloga fela kwa tshimologong gore a dirise Baebele mo bodireding.—2 Tim. 4:2.
3 Go botlhokwa fela thata gore mmoledi yo mosha a ikatise gore o tlile go bua jang fa a le kwa bodireding. Fa moithuti yono a ntse a ikatisa, mmontshe gore a ka araba jang ka botlhale dipotso tse batho ba ratang go di botsa mo tshimong ya lona. (Bakol. 4:6) Mo tlhomamisetse gore badiredi ba Bakeresete ga ba tlhoke gore ba bo ba itse karabo ya potso nngwe le nngwe e mong wa ntlo a e botsang. Gantsi go molemo go kopa mong wa ntlo gore o ye go dira patlisiso pele ka potso ya gagwe o bo o boela mo go ene go tla go e araba.—Dia. 15:28.
4 Go Rera Mmogo: Fa motho yo o ithutang le ene a nna le seabe mo bodireding jwa ntlo le ntlo lekgetlo la ntlha, dira gore a tseye malebela mo go wena fa o buisana le mong wa ntlo o dirisa puisano e lo e baakanyeditseng mmogo. Morago ga moo, o ka nna wa dira gore le ene a nne le seabe. Sengwe sa dilo tse o ka di dirang ke go kopa mmoledi yo mosha yono gore a bue sengwe mo puisanong eo, jaaka go bala temana a bo a e tlhalosa. Akanyetsa botho le bokgoni jwa moithuti yono. (Bafil. 4:5) Mo akgole go tswa pelong fa o ntse o mo thapisa mo dikarolong tse di farologaneng tsa tiro ya go rera.
5 Go botlhokwa go thusa mmoledi yo mosha gore a nne le thulaganyo ya ka metlha ya go nna le seabe mo bodireding, a dire jalo beke nngwe le nngwe fa go kgonega. (Bafil. 3:16) Dira dithulaganyo tsa gore lo bereke mmogo mo bodireding jwa tshimo, mme o mo kgothaletse gore gape a bereke le ba bangwe ba ba tlhagafetseng mo bodireding. Sekao sa bone le go bereka le bone go tla mo thusa gore a nne le bokgoni a bo a rate tiro ya go rera ka ntlo le ntlo.