Thusa ba Bangwe go Nna Ditsala Tsa Modimo
1 Gompieno, batho ba ba tswang mo ditšhabeng tsotlhe ba rutiwa ditsela tsa ga Jehofa. (Isa. 2:2, 3) Le fa go ntse jalo, gore batho bano ba “ungwe maungo ka boitshoko,” ba tshwanetse go rata Jehofa. (Luke 8:15; Mar. 12:30) Kwantle ga lorato lono, ga ba kitla ba nna le nonofo ya go lwantsha ditlhotlheletso tse di bosula kgotsa bopelokgale jwa go dira se se siameng. Tsela nngwe e re ka thusang ba bangwe go nna le kamano e e molemo le Jehofa ke go dira gore ba anaanele dinonofo tsa gagwe. Ba kgothaletse go akanyetsa ka kelotlhoko tshedimosetso e e mo bukeng ya Atamalana le Jehofa.
2 Sekao sa Gago: Ditiro tsa gago di ka ama dipelo tsa diithuti tsa Baebele ka tsela e e maatla. Fa ba bona gore o anaanela botsalano jwa gago le Jehofa mme ba bona kafa bo amang botshelo jwa gago ka gone, ba ka nna ba tlhotlheletsega gore le bone ba nne le botsalano jo bo ntseng jalo le Modimo. (Luke 6:40) Gantsi sekao sa rona se tlhotlheletsa ba bangwe thata go feta se re se buang.
3 Selo se segolo se batsadi ba rutang bana ba bone go rata Jehofa ka sone ke ka sekao sa bone. (Dute. 6:4-9) Banyalani bangwe ba ba neng ba batla go godisetsa bana ba bone mo boammaaruring ba ne ba kopa kgakololo mo batsading ba ba atlegileng go godisa bana. Monna a re: “Mongwe le mongwe yo ke neng ke bua le ene o ne a re selo sa botlhokwa ke sekao sa batsadi.” Ka jalo, tsela e batsadi ba tshelang ka yone e ka nna sekao mo baneng ba bone gore go nna “tsala ya ga Jehofa” go bolela eng.—Jak. 2:23.
4 Thapelo e e Tswang Pelong: Gape o ka thusa ba bangwe go nna le botsalano le Jehofa ka go ba ruta go rapela go tswa pelong. O ka ba lemotsha thapelo ya ga Jesu ya sekao le dithapelo tse dingwe tse di rapelwang ka pelo yotlhe tse di kwadilweng mo Dikwalong. (Math. 6:9, 10) O ka ruta bana ba gago le diithuti tsa Baebele kafa ba ka rapelang ka gone ka go reetsa dithapelo tsa gago. Fa ba utlwa o rapela go tswa pelong, ba tla lemoga tsela e o ikutlwang ka yone ka Jehofa. Ba kgothaletse go ‘nnela ruri mo thapelong.’ (Bar. 12:12) Fa ba bona Jehofa a ba thusa mo dinakong tsa mathata, ba tla simolola go mo ikanya le go mo rata jaaka tsala ya boammaaruri.—Pes. 34:8; Bafil. 4:6, 7.