‘Latelang Dikgato Tsa Gagwe Gaufiufi’
1. Re ka nna jang bareri ba ba nang le matswela?
1 Jesu o ne a sa tsena dikolo tsa borabi, le fa go ntse jalo e ne e le Moreri yo mogolo go gaisa botlhe. Re lesego ka gonne re na le pego e e kwadilweng e e kaga bodiredi jwa ga Jesu e e re solegelang molemo. Gore re nne bareri ba ba nang le matswela, re tshwanetse go ‘latela dikgato tsa gagwe gaufiufi.’—1 Pet. 2:21.
2. Ke eng se se tla re thusang go rata batho ka lorato lo lo tshwanang le lwa ga Keresete?
2 Bontsha go Rata Batho: Jesu o ne a tlhotlhelediwa ke go rata batho. (Mar. 6:30-34) Batho ba le bantsi mo tshimong ya rona ba “mo botlhokong” e bile ba tlhoka go utlwa boammaaruri fela thata. (Bar. 8:22) Fa re akanya ka seemo sa bone se se tlhomolang pelo le kafa Jehofa a ba kgatlhegelang ka lorato ka teng, re tla tlhotlheletsega go tswelela pele re ba rerela. (2 Pet. 3:9) Mo godimo ga moo, batho ba tla amogela molaetsa wa rona motlhofo fa ba lemoga gore ruri re amega ka bone.
3. Jesu o ne a rerela batho mo mafelong afe?
3 Dirisa Tshono Nngwe le Nngwe go Rera: Jesu o ne a dirisa tshono nngwe le nngwe go itsise ba bangwe dikgang tse di molemo. (Math. 4:23; 9:9; Joh. 4:7-10) Le rona re batla go nna re ipaakanyeditse go bua ka boammaaruri fa re ntse re dira ditiro tsa rona tsa letsatsi le letsatsi. Bangwe ba tshola Baebele le dikgatiso dingwe gore ba neele bosupi kwa tirong, kwa sekolong, fa ba le mo loetong kana fa ba le mo mabenkeleng le mo mafelong a mangwe.
4. Re ka dira jang gore Bogosi e nne kgangkgolo ya molaetsa wa rona?
4 Bua Thata ka Bogosi: Dikgang tse di molemo tsa Bogosi e ne e le kgangkgolo ya molaetsa wa ga Jesu. (Luke 4:43) Le fa re sa umake Bogosi ka bonako kana ka tlhamalalo mo puisanong ya rona, ga re batle go lebala go thusa mong wa ntlo go bona gore re tlhoka Bogosi. Le fa re umaka maemo a a bosula a lefatshe a a supang gore re tshela mo metlheng ya bofelo, re bua thatathata ka “dikgang tse di molemo tsa dilo tse di molemo.”—Bar. 10:15.
5. Baebele e tshwanetse go nna le seabe sefe fa re batla gore bodiredi jwa rona bo nne le matswela?
5 Ikaege ka Lefoko la Modimo: Jesu o ne a ikaegile ka Dikwalo mo bodireding jotlhe jwa gagwe. O ne a sa rute sepe se se tswang mo go ene. (Joh. 7:16, 18) O ne a ikotla ka Lefoko la Modimo mme a le dirisa go itshireletsa fa Satane a ne a mo tlhasela. (Math. 4:1-4) Gore re rute batho ka tsela e e nang le matswela, re tshwanetse go bala Baebele letsatsi le letsatsi re bo re dirise se re se balang. (Bar. 2:21) Fa re araba dipotso mo bodireding, re tshwanetse go tshegetsa dikarabo tsa rona ka Dikwalo le go bala ka tlhamalalo go tswa mo Baebeleng fa go kgonega. Re batla gore mong wa ntlo a bone gore ga re bue dikakanyo tsa rona mme re bua dikakanyo tsa Modimo.
6. Jesu o ne a dira eng go ama dipelo tsa bareetsi ba gagwe?
6 Ama Pelo fa o Ruta: “Ga go ise go ke go nne le motho yo mongwe yo o kileng a bua jaana.” (Joh. 7:46) Badiredi ba ne ba araba jalo fa baperesiti ba bagolo le Bafarasai ba ba botsa gore ke eng fa ba sa ka ba tshwara Jesu. Fa Jesu a ne a ruta o ne a sa tlhalose dintlha fela, go na le moo, o ne a ruta ka tsela e e neng e ama dipelo tsa batho ba a neng a ba ruta. (Luke 24:32) O ne a dirisa ditshwantsho tsa dilo tse di diregang letsatsi le letsatsi go dira gore batho ba tlhaloganye molaetsa wa gagwe. (Math. 13:34) Jesu o ne a sa imetse bareetsi ba gagwe ka tshedimosetso e ntsintsi. (Joh. 16:12) Fa a bua le batho o ne a tlotlomatsa Jehofa a sa itlotlomatse. Le rona, fela jaaka Jesu, re ka nna barutisi ba ba molemo fa re ‘tlhokometse go ruta ga rona.’—1 Tim. 4:16.
7. Ke eng fa Jesu a ile a tswelela pele ka bodiredi jwa gagwe?
7 Tswelela Pele o Rera le fa Batho ba sa Kgatlhege Kgotsa ba go Ganetsa: Le fa Jesu a ne a dira ditiro tse dintsi tse di gakgamatsang, batho ba le bantsi ba ne ba se ka ba mo reetsa. (Luke 10:13) Tota le ba lelapa la gaabo ba ne ba re o “latlhegetswe ke tlhaloganyo.” (Mar. 3:21) Le fa go ntse jalo, Jesu o ne a tswelela pele a rera. O ne a tswelela a na le boikutlo jo bo siameng ka gonne o ne a tlhatswegile pelo gore o na le boammaaruri jo bo ka gololang batho. (Joh. 8:32) Le rona, ka thuso ya ga Jehofa, re ikemiseditse gore ga re kitla re ineela.—2 Bakor. 4:1.
8, 9. Re ka etsa Jesu jang ka go intsha setlhabelo gore re bolele dikgang tse di molemo?
8 Intshe Setlhabelo Kafa go Tlhokegang ka Teng Gore o Nne le Seabe ka Botlalo: Jesu o ne a ithontsha manobonobo a botshelo gore a nne le seabe mo bodireding. (Math. 8:20) O ne a rera a sa lape, ka dinako dingwe a rera go fitlha letsatsi le phirima. (Mar. 6:35, 36) O ne a itse gore o ne a na le nako e khutshwane fela go wetsa bodiredi jwa gagwe. E re ka “nako e e setseng e khutshwafetse,” le rona re tshwane go itima dilo dingwe mme re dirise nako ya rona, maatla a rona le dilo dingwe mo bodireding, fela jaaka Jesu.—1 Bakor. 7:29-31.
9 Bakeresete ba lekgolo la ntlha la dingwaga e ne e le bareri ba ba nang le matswela ka gonne ba ne ba ithutile mo go Jesu. (Dit. 4:13) Le rona re ka wetsa bodiredi jwa rona fa re etsa Moreri yo mogolo go gaisa botlhe mo hisitoring.—2 Tim. 4:5.