Tsela ya go Baakanyetsa Matseno a a Nang le Matswela
1. Go botlhokwa go le kana kang gore o nne le matseno a a molemo?
1 Fela jaaka sejonyana se se monate se se jewang pele ga dijo se dira gore motho a lebelele pele go ja dijo tse di latelang morago ga moo, matseno a a molemo a dira gore go nne le motlotlo wa Baebele o o nang le matswela. Matseno a a nang le matswela a ka farologana ka boleele le ka gore a bua ka eng, mme fela jaaka dijo tse di rokotsang mathe, ka metlha a tlhoka go akanyediwa le go baakanyediwa go sa le gale. (Dia. 15:28) Ke eng se se dirang gore matseno a nne le matswela?
2. Re ka baakanyetsa jang matseno a a ngokang kgatlhego?
2 Tlhopha Dikgang Tse di Ngokang Kgatlhego: Matseno a rona a tshwanetse go ngoka kgatlhego, e seng jalo mong wa ntlo a ka kgaosetsa motlotlo. Ka jalo, fa o ntse o baakanyetsa, akanya ka dilo tse di ka kgatlhang batho mo lefelong la lona. A batho mo lefelong la lona ba kgatlhegela go nna le puso e e siameng, botshelo jo bo itumedisang jwa lelapa kgotsa go fela ga ntwa? Batho ka kakaretso ba rata go tlhalosa maikutlo a bone, ka jalo baakanyetsa potso e e fatang maikutlo. A o ka dirisa sengwe sa dikai tsa matseno a a mo kgatisong ya Tirelo ya Rona ya Bogosi mme o a fetola gore a tsamaisane le tshimo ya lona? Ke eng fa ka dinako dingwe lo sa ikatise go dira matseno mo maitseboeng a lona a Kobamelo ya Lelapa?
3. Re ka dira jang gore matseno a rona a tshwanele setso sa batho ba ba mo tshimong ya rona kgotsa tsela e ba godileng ka yone?
3 Akanyetsa Setso le Tsela e Batho ba Godileng ka Yone: Kwa mafelong mangwe go lebeletswe gore re tlhalose se re se tletseng di tloga fela. Kwa go a mangwe, go tsewa e le go tlhoka maitseo gore moeng a se ka a botsa pele gore a botlhe mo lelapeng ba tsogile sentle le go itlhalosa gore ke mang. Mme kwa go a mangwe, lebaka la go bo batho ba le mo madumeding mangwe le re letla gore re bue ka Baebele mo matsenong a rona. (Dit. 2:14-17) Le fa go ntse jalo, kwa mafelong a mo go one batho ba leng mo bodumeding jo e seng jwa Bokeresete kgotsa ba seng mo bodumeding gotlhelele, go ka nna botoka go umaka Baebele mo loetong lwa go boela, e seng kwa tshimologong.—Dit. 17:22-31.
4. Ke eng se re tshwanetseng go se akanyetsa fa re baakanyetsa mafoko a re simololang matseno a rona ka one?
4 Mafoko a o Simololang ka One: Baakanyetsa ka kelotlhoko mafoko a o tla simololang ka one. Gantsi go molemo go simolola ka diele tse dikhutshwane e bile di le motlhofo. Tsela e re buang mafoko a a simololang ka yone, le yone e botlhokwa. Nna matlhagatlhaga. Nyenya go tswa pelong ka tsela e e botsalano e e bontshang gore o kgatlhegela mong wa ntlo. Go latela dikakantsho tseno go tla re thusa go baakanyetsa matseno a a ngokang kgatlhego a a tla kgothaletsang batho ba tshimo ya rona gore ba je mo “tafoleng ya ga Jehofa.”—1 Bakor. 10:21.