Itlwaetse go Tshwara Nako
1. Jehofa o re tlhomela sekao sefe malebana le go tshwara nako?
1 Ka metlha Jehofa o tshwara nako. Ka sekai, o neela batlhanka ba gagwe “thuso ka nako e e tshwanetseng.” (Baheb. 4:16) Gape o aba ‘dijo tsa semoya ka nako e e tshwanetseng.’ (Math. 24:45) Ka jalo, re ka tshepa gore letsatsi le le tlang la bogale jwa gagwe ga le ‘kitla le tla morago ga nako.’ (Hab. 2:3) Ruri go tshwara nako ga ga Jehofa go re solegela molemo! (Pes. 70:5) Le fa go ntse jalo, e re ka re sa itekanela e bile re nna re tshwaregile, go tshwara nako e ka nna kgwetlho mo go rona. Ke eng fa re tshwanetse go itlwaetsa go tshwara nako?
2. Ke eng fa go tshwara nako go tlotlomatsa Jehofa?
2 Go tshwara nako ga go tlhole go tlwaelegile mo metlheng eno ya bofelo e mo go yone batho ba le bantsi e leng baithati e bile ba se na boikgapo. (2 Tim. 3:1-3) Ka jalo, fa Bakeresete ba tshwara nako kwa tirong, fa ba beile nako ya go kopana le ba bangwe le fa ba ya dipokanong, batho ba bangwe ba lemoga seno mme seno se tlotlomatsa Jehofa. (1 Pet. 2:12) A gantsi re tshwara nako fa re ya tirong ya boitshediso mme gantsi re nna thari fa re ya dithulaganyong tsa puso ya Modimo? Go nna gone ka nako kwa dipokanong tsa Bokeresete, go akaretsa le pina le thapelo e e simololang, go bontsha gore re batla go etsa Rraarona yo o kwa legodimong yo o dirang dilo ka thulaganyo.—1 Bakor. 14:33, 40.
3. Ke eng fa go tshwara nako go bontsha gore re akanyetsa batho ba bangwe?
3 Gape go tshwara nako go bontsha gore re akanyetsa batho ba bangwe. (Bafil. 2:3, 4) Ka sekai, fa re tshwere nako mo dipokanong tsa Bokeresete, go akaretsa dipokano tsa tirelo ya tshimo, badumedi ka rona ga ba iteege tsebe go sa tlhokege. Ka fa letlhakoreng le lengwe, fa re na le mokgwa wa go tla thari, seo se dira gore ba bangwe ba akanye gore re tsaya nako ya rona e le botlhokwa go feta ya bone. Go tshwara nako go bontsha gore re ka ikanngwa, re bothakga le gore re a ikanyega—e leng dinonofo tse di anaanelwang ke batho ba ba dirisanang le rona.
4. Fa e le gore re nna re le thari, re ka tokafatsa jang?
4 Fa e le gore o nna o le thari, sekaseka mabaka a a dirang gore o nne thari. Ithulaganye ka go dira thulaganyo e o ka kgonang go e latela e e tla go thusang go dira ditiro ka nako e di e tlhometsweng. (Mor. 3:1; Bafil. 1:10) Kopa Jehofa gore a go thuse. (1 Joh. 5:14) Go tshwara nako ke nngwe ya ditsela tsa go bontsha gore re tlhaloganya ditaelo tse pedi tse dikgolo go gaisa tsa Molao—go rata Modimo le go rata moagelani wa rona.—Math. 22:37-39.