Lebokoso la Rona la Dithulusu
1. Bakeresete ba tshwana jang le batho ba ba dirang tiro ya diatla?
1 Batho ba ba dirang tiro ya diatla ba dirisa dithulusu tse di farologaneng. Go na le dithulusu tse ba di dirisang fa ba dira tiro nngwe e e kgethegileng mme go nne le tse dingwe tse ba di dirisang gangwe le gape. Motho yo o nang le maitemogelo a go dira tiro ya diatla o a itse gore go na le dithulusu tse a tshwanetseng go nna a ntse a na le tsone e bile ke tsone tse a leng setswerere thata mo go di diriseng. Baebele e kgothaletsa Mokeresete mongwe le mongwe gore a ntshe ga tshwene mo bodireding le gore a nne “modiri yo o se nang sepe se se ka mo tlhabisang ditlhong.” (2 Tim. 2:15) Ke thulusu efe ya botlhokwa thata e re nang le yone mo lebokosong la rona? Ke Lefoko la Modimo le re le dirisang go ‘dira batho barutwa.’ (Math. 28:19, 20) Ka jalo, re tshwanetse go leka ka natla go nna ditswerere e bile re ‘tshware lefoko la boammaaruri sentle.’ Mme gone, go na le dithulusu tse dingwe tse re di dirisang gangwe le gape tse Bakeresete botlhe ba tshwanetseng go ithuta go di dirisa sentle go ruta batho boammaaruri.—Dia. 22:29.
2. Ke dithulusu dife tse re di dirisang go ruta batho?
2 Dithulusu Tse re di Dirisang go Ruta: Ntle le Baebele, ke dithulusu dife tse dingwe tse re tshwanetseng go di dirisa? Thulusu e re e dirisang thata fa re ruta batho Baebele ke buka ya Totatota Baebele e Ruta Eng? Fa re feditse ka buka eno, re dirisa buka ya “Ipolokeng mo Lorato Lwa Modimo” go thusa moithuti gore a dirise melaometheo ya Baebele mo botshelong jwa gagwe. Ke ka moo go leng botlhokwa gore re itse go dirisa dibuka tseno tse pedi sentle. Go na le diboroutšhara dingwe tse re tshwanetseng go nna le tsone mo lebokosong la rona la dithulusu. Boroutšhara jwa Dikgang Tse di Molemo Tse di Tswang Kwa Modimong! ke nngwe ya dithulusu tsa botlhokwa tse re di dirisang go simolola thuto ya Baebele. Fa batho ba mo tshimong ya rona ba sa itse go bala kgotsa ba bua puo e re senang dikgatiso tsa yone, re ka dirisa boroutšhara jwa Reetsa Modimo Mme o Tshelele Ruri. Thulusu e re e dirisang go thusa batho go tlhaloganya phuthego ya Modimo ke boroutšhara jwa Ke Bomang ba ba Dirang Thato ya ga Jehofa Gompieno? Bidio ya Ke Eng fa o Tshwanetse go Ithuta Baebele?, Go Dirwang Kwa Holong ya Bogosi? le ya A Modimo O na Le Leina? le tsone ke dithulusu tse re tshwanetseng go itse go di dirisa sentle gore re kgone go dira barutwa.
3. Ditlhogo tse di tla nnang gone mo kgatisong ya Tirelo ya Rona ya Bogosi di tla re thusa go dira eng?
3 Ditlhogo tse di tla nnang gone mo kgatisong ya Tirelo ya Rona ya Bogosi di tla re thusa go nna ditswerere mo go diriseng dithulusu tse di mo lebokosong la rona. Fa re leka ka natla go nna ditswerere fa re dirisa dithulusu tseno, re tla bo re reetsa kgakololo eno: “Nna o itlhokometse e bile o tlhokometse go ruta ga gago. Nna mo dilong tseno, gonne ka go dira seno o tla ipoloka o bo o boloka ba ba go reetsang.”—1 Tim. 4:16.