Dikgatiso Tse di Dirisiwang mo Bukaneng ya Pokano ya Botshelo le Bodiredi
© 2022 Christian Congregation of Jehovah’s Witnesses
JANUARY 2-8
MATLOTLO A A MO LEFOKONG LA MODIMO | 2 DIKGOSI 22-23
“Ke Eng fa re Tshwanetse go Nna Boikokobetso?”
Josia yo o Boikokobetso O ne A Amogelwa ke Jehofa
Babaakanyi ba tiro ya tempele ba dira ka natla go tloga ka makuku a naka tsa kgomo. Ga go na pelaelo gore Josia o leboga Jehofa go bo badiri bano ba baakanya tshenyo e bangwe ba bagologolwane ba gagwe ba ba boikepo ba e dirileng mo ntlong ya Modimo. Fa tiro e ntse e tsweletse, Shafane o tla go bega sengwe. Mme ke eng se a se tshwereng? Ebu, o tshwere momeno! O tlhalosa gore Moperesiti yo Mogolo Hilekia o bone “lokwalo lwa molao wa ga Jehofa o o beilweng ke Moše.” (2 Ditirafalo 34:12-18) A bo go ribolotswe sengwe se se tlhwatlhwakgolo jang ne—ga go na pelaelo gore ke khopi ya ntlhantlha ya mokwalo wa Molao!
Josia o tlhoafaletse go utlwa lefoko lengwe le lengwe la buka eo. Fa Shafane a ntse a bala, kgosi e leka go bona gore taolo nngwe le nngwe e ama ene le batho jang. O kgatlhwa thata ke kafa buka eno e gatelelang kobamelo ya boammaaruri ka teng le kafa e bolelelang pele ka teng ka dipetso le go isiwa botshwarwa go go tla nnang teng fa batho ba inaakanya le bodumedi jwa maaka. E re ka Josia jaanong a lemoga gore ditaolo tsa Modimo ga di a latelwa tsotlhe, o ikgagola diaparo a bo a naya Hilekia, Shafane le ba bangwe taolo eno: ‘Yang lo botse Jehofa kaga lokwalo lono; gonne bogale jwa ga Jehofa jo bo re tuketseng bo bogolo, ka borraetsho ba se ka ba reetsa mafoko a buka eno.’—2 Dikgosi 22:11-13; 2 Ditirafalo 34:19-21.
Josia yo o Boikokobetso O ne A Amogelwa ke Jehofa
Barongwa ba ga Josia ba ya kwa go Huleta moporofeti wa sesadi kwa Jerusalema mme ba boa ka pego. Huleta o fetiseditse lefoko la ga Jehofa kwa pele, a supa gore masetlapelo a a kwadilweng mo bukeng e e sa tswang go bonwa a tla wela setšhaba sa batlhanogi. Le fa go ntse jalo, e re ka Josia a ile a ikokobetsa fa pele ga Jehofa Modimo, ga a kitla a bona masetlapelo ao. O tla phuthelwa kwa go borraagwemogologolwane mme o tla isiwa kwa lebitleng la gagwe ka kagiso.—2 Dikgosi 22:14-20; 2 Ditirafalo 34:22-28.
Go Ribolola Matlotlo mo Dikwalong
O ka Atlega Le fa O ka Tswa o Godisitswe ka Tsela Efe
Le fa Josia a ile a golela mo maemong a a sa itumediseng, o ile a dira se se molemo mo matlhong a ga Jehofa. Puso ya gagwe e ile ya atlega mo e leng gore Baebele ya re: “Ga go a ka ga itshupa go na le kgosi epe pele ga gagwe e e neng ya boela kwa go Jehofa ka pelo yotlhe ya yone jaaka ene le ka moya otlhe wa yone le ka maatla otlhe a yone, go ya ka molao otlhe wa ga Moshe; le gone morago ga gagwe ga go a ema ope yo o tshwanang le ene.”—2 Dikgosi 23:19-25.
A bo Josia e le sekao se se kgothatsang jang ne mo bathong ba ba ka tswang ba ile ba tshwanelwa ke go golela mo maemong a a botlhoko! Re ka ithuta eng mo sekaong sa gagwe? Ke eng se se ileng sa thusa Josia go tlhopha tsela e e tshwanetseng le go tswelela a le mo go yone?
JANUARY 9-15
MATLOTLO A A MO LEFOKONG LA MODIMO | 2 DIKGOSI 24-25
“Nna o Ntshitse Matlho Dinameng”
Letsatsi la ga Jehofa la Katlholo le Gaufi!
2 Ga go pelaelo gore go porofeta ga ga Sefania go ile ga thusa Josia yo mmotlana go lemoga botlhokwa jwa go tlosa kobamelo e e leswe mo Juda. Mme gone kgato e kgosi e neng e e tsere go fedisa kobamelo ya maaka mo nageng eo ga ya ka ya nyeletsa boikepo jotlhe mo bathong kana go bipa maleo a ga rraagwemogolo e bong Kgosi Manase yo o neng a ‘tladitse Jerusalema ka madi a a se nang molato.’ (2 Dikgosi 24:3, 4; 2 Ditiragalo 34:3) Ka jalo ruri letsatsi la ga Jehofa la katlholo le ne le tla.
Dintlhakgolo go Tswa mo Bukeng ya Jeremia
Ngwaga ke wa 607 B.C.E. Sedekia o mo ngwageng wa bo11 wa puso ya gagwe. Kgosi Nebukadenesare wa Babelona o ntse a dikanyeditse Jerusalema ka dikgwedi tse 18 tse di fetileng. Ka letsatsi la bosupa la kgwedi ya botlhano ya ngwaga wa bo19 wa puso ya ga Nebukadenesare, Nebusaradane, molaodi wa bafemedi o “tla,” kgotsa o goroga mo Jerusalema. (2 Dikgosi 25:8) Gongwe a le mo bothibelelong jwa gagwe, kafa ntle ga dipota tsa motse, Nebusaradane o sekaseka seemo mme o rulaganya gore o tla tsaya kgato efe. Malatsi a le mararo moragonyana, ka letsatsi la bolesome la kgwedi, o “tla,” kgotsa o tsena mo Jerusalema. Mme o ja motse ka molelo.—Jeremia 52:12, 13.
Go Ribolola Matlotlo mo Dikwalong
Dintlhakgolo Tsa Buka ya Dikgosi wa Bobedi
24:3, 4. Jehofa ‘o ne a se ka a dumela go itshwarela’ Juda ka ntlha ya molato wa madi a ga Manase. Modimo o tlotla madi a batho ba ba se nang molato. Re ka tlhomamisega gore Jehofa o tla busolosetsa madi a batho ba ba se nang molato ka go senya ba ba a tshololang.—Pesalema 37:9-11; 145:20.
JANUARY 16-22
MATLOTLO A A MO LEFOKONG LA MODIMO | 1 DITIRAGALO 1-3
“Baebele ke Buka ya Boammaaruri e Seng ya Ditlhamane”
Adame Le Efa—A e Ne e Le Batho ba Mmatota?
Ka sekai, akanya ka lenaane la masika a Bajuda le le begilweng mo bukeng ya Baebele ya Ditiragalo wa Ntlha kgaolo 1 go ya go 9 le mo Efangeleng ya ga Luke mo go kgaolo 3. Lenaane leno le legolo le tlhalosa dikokomana di le 48 mo go Ditiragalo wa Ntlha le di le 75 mo bukeng ya Luke. Luke e bua ka tatelano ya losika lwa ga Jesu Keresete mme buka ya Ditiragalo yone e bua ka losika lwa segosi le lwa boperesiti lwa setšhaba sa Iseraele. Manaane ao ka bobedi a na le maina a batho ba ba itsegeng thata ba ba jaaka Solomone, Dafide, Jakobe, Isake, Aborahame, Noa le Adame. Maina otlhe a a mo manaaneng ao a mabedi ke a batho ba mmatota mme Adame yo o leng teng mo manaaneng ao ke motho wa mmatota wa kwa tshimologong.
Kgang ya ga Noa le Morwalela—Ke Boammaaruri, ga se Tlhamane Fela
Dipego tse pedi tsa tatelano ya masika tse di mo Baebeleng di tlhomamisa gore Noa e ne e le motho wa mmatota. (1 Ditiragalo 1:4; Luke 3:36) Batho ba ba neng ba kwala dipego tseo tsa tatelano ya masika, e bong Esera le Luke, e ne e le babatlisisi ba ba kelotlhoko. Luke o ne a latedisa losika lwa ga Jesu Keresete go ya go fitlha kwa go Noa.
Adame Le Efa—A e Ne e Le Batho ba Mmatota?
Ka sekai, akanya ka thuto ya Baebele e batho ba ba tsenang dikereke ba e tsayang e le botlhokwa—thekololo. Go ya ka thuto eno, Jesu Keresete o ne a ntsha botshelo jwa gagwe jo bo itekanetseng go nna thekololo gore a boloke batho ba le bantsi mo maleong a bone. (Mathaio 20:28; Johane 3:16) Jaaka re itse, thekololo ke tuelo e e lekanang le sengwe se se rekololwang kgotsa ke go reka gape sengwe se se latlhegileng. Ke gone ka moo Baebele e tlhalosang Jesu e le “thekololo e e lekanang.” (1 Timotheo 2:6) Gongwe re ka ipotsa gore, e e lekanang le eng? Baebele e araba jaana: “Fela jaaka mo go Adame botlhe ba swa, jalo le mo go Keresete botlhe ba tla tshedisiwa.” (1 Bakorintha 15:22) Botshelo jo bo itekanetseng jo Jesu a neng a bo ntsha setlhabelo go rekolola batho ba ba kutlo bo lekana le jo bo itekanetseng jo Adame a neng a bo latlha ka ntlha ya go leofa kwa Edene. (Baroma 5:12) Eleruri fa e le gore Adame ga a ise a nne gone, seno se kaya gore setlhabelo sa ga Keresete sa thekololo ga se na molemo wa sepe.
Go Ribolola Matlotlo mo Dikwalong
it-1-E 911 ¶3-4
Tatelano ya Masika
Maina a Basadi. Bogologolo basadi ba ne ba tsenngwa mo tatelanong ya masika fa go ne go na le mabaka mangwe a a neng a pateletsa gore go dirwe jalo. Mo go Genesise 11:29, 30, go umakiwa Sarai (Sara), ka gonne Losika lo lo solofeditsweng lo ne lo tla tla ka ene mme e seng ka mosadi yo mongwe wa ga Aborahame. Mileka a ka tswa a umakilwe mo ditemaneng tseno ka gonne e le mmaagwemogolo wa ga Rebeka, mosadi wa ga Isake. Mme seno ke bosupi jwa gore Rebeka o tswa mo losikeng lwa ga Aborahame, e re ka go ne go boleletswe pele gore Isake ga a kitla a nyala basadi ba ditšhaba tse dingwe. (Ge 22:20-23; 24:2-4) Mo go Genesise 25:1, go buiwa ka mosadi yo mongwe wa ga Aborahame e bong Ketura. Seno se bontsha gore Aborahame o ne a nyala gape fa Sara a sena go tlhokafala le gore o ne a sa ntse a kgona go tshola bana dingwaga di feta 40 Jehofa a sena go dira gore ene le Sara ba tshole ngwana ka kgakgamatso. (Bar 4: 19; Ge 24:67; 25:20) Gape seno se bontsha gore Baiseraele ba ne ba amana le Bamidiana le Baarabia.
Baebele e bua ka Lea, Ragele le bagadingwana ba ga Jakobe, mmogo le barwa ba bone. (Ge 35:21-26) Seno se re thusa go tlhaloganya sentle tsela e Jehofa a neng a dirisana le barwa bano ka yone moragonyana. Ka ntlha ya mabaka a a tshwanang le ano, go na le basadi ba bangwe ba ba umakilweng mo tatelanong ya masika. Fa ba ne ba abelwa boswa, maina a bone a ne a ka kwalwa. (Dip 26:33) Mme gone lebaka la go bo Tamare, Rahabe le Ruthe ba umakilwe mo tatelanong ya masika, le a kgatlha. Go na le sengwe se se kgethegileng mo tseleng e ba nnileng karolo ya tatelano ya losika lwa ga Mesia, e bong Jesu Keresete ka yone. (Ge 38; Ru 1:3-5; 4:13-15; Mat 1:1-5) Gape go kwa tswa go na le maemo mangwe a a neng a dira gore basadi ba umakiwe mo tatelanong ya masika mo go 1 Ditiragalo 2:35, 48, 49; 3:1-3, 5.
JANUARY 23-29
MATLOTLO A A MO LEFOKONG LA MODIMO | 1 DITIRAGALO 4-6
“Dithapelo Tsa me di Senola Gore ke Motho yo o Ntseng Jang?”
“Moutlwi wa Thapelo”
Jabese o ne a rata go rapela. O ne a simolola thapelo ya gagwe ka go kopa gore Modimo a mo segofatse. Go tswa foo o ne a kopa dilo tse tharo tse di bontshang gore o ne a na le tumelo e e nonofileng.
Sa ntlha, Jabese o ne a rapela Modimo a re: “Oketsa karolo ya me ya naga.” (Temana 10) Monna yono yo o tlotlegang o ne a sa batle naga e nngwe ka bogagapa, a eletsa naga ya mong ka ene. Kopo ya gagwe e a e dirileng ka tlhoafalo e ka tswa e ne e amana le batho go na le naga ka boyone. O ka tswa a ne a kopa gore naga ya gagwe e okediwe mme seo se dirwe ka kagiso gore baobamedi ba ba oketsegileng ba Modimo wa boammaaruri ba nne mo go yone.
Sa bobedi, Jabese o ne a rapelela gore “seatla” sa Modimo se nne le ene. Seatla sa Modimo sa tshwantshetso ke maatla a gagwe a a a dirisang go thusa baobamedi ba gagwe. (1 Ditiragalo 29:12) E le gore Jabese a bone se a se eletsang, o ne a ya kwa Modimong yo seatla sa gagwe se seng sekhutshwane mo bathong ba ba bontshang tumelo mo go ene.—Isaia 59:1.
Sa boraro, Jabese o ne a rapela jaana: “Mpoloka mo masetlapelong, gore a se ka a nkutlwisa botlhoko.” Mafoko a a reng “gore a se ka a nkutlwisa botlhoko” a ka tswa a kaya gore Jabese o ne a sa rapelele gore a tswe mo masetlapelong mme o ne a rapelela gore a thusiwe gore a se ka a hutsafadiwa kgotsa a fekeediwa ke ditlamorago tsa bosula.
Thapelo ya ga Jabese e ne e bontsha gore o amega ka kobamelo ya boammaaruri le gore o ikanya Moutlwi wa thapelo e bile o na le tumelo mo go ene. Jehofa o ne a araba thapelo eo jang? Pego eno e khutshwane e konela ka mafoko ano: “Ka jalo Modimo a diragatsa se a neng a se kopile.”
Go Ribolola Matlotlo mo Dikwalong
Dintlhakgolo Tsa Buka ya Ditiragalo wa Ntlha
5:10, 18-22. Mo motlheng wa ga Kgosi Saulo, ditšhaba tse di kafa botlhaba jwa Joredane di ne tsa fenya Bahagere le fa Bahagere ba ne ba ba feta gabedi ka palo. Go ne ga nna jalo ka gonne banna ba ba diganka ba ditšhaba tseno ba ne ba ikanya Jehofa e bile ba mo kopile gore a ba thuse. Le rona re tshwanetse go ikanya Jehofa ka botlalo fa re ntse re lwa ntwa ya semoya kgatlhanong le baba ba rona ba ba re fetang kgakala.—Baefeso 6:10-17.
JANUARY 30–FEBRUARY 5
MATLOTLO A A MO LEFOKONG LA MODIMO | 1 DITIRAGALO 7-9
“Jehofa A ka Go Thusa Gore o Dire Dikabelo Tse di Thata”
Dintlhakgolo Tsa Buka ya Ditiragalo wa Ntlha
9:26, 27. Batlhokomedi ba dikgoro ba Balefi ba ne ba filwe maikarabelo a magolo. Ba ne ba filwe dilotlolo tse di neng di bula mafelo a a boitshepo a tempele. Ba ne ba bula dikgoro ka boikanyegi letsatsi le letsatsi. Rona re filwe boikarabelo jwa go batla batho mo tshimong ya rona le go ba thusa go obamela Jehofa. A le rona ga re a tshwanela go ikanyega fela jaaka batlhokomedi bao ba dikgoro ba Balefi?
A o Ka Tshwana le Finease fa o Lebana le Dikgwetlho?
Finease o ne a sikere morwalo o mogolo wa maikarabelo kwa Iseraele wa bogologolo, le fa go ntse jalo ka ntlha ya bopelokgale, temogo le go ikaega ka Modimo, o ne a kgona go atlega fa a lebane le dikgwetlho. Mme Jehofa o ne a amogela tsela e Finease a neng a dira ka natla go tlhokomela phuthego ya Modimo ka yone. Mo e ka nnang dingwaga di le 1 000 moragonyana, Esera o ne a tlhotlhelediwa go kwala jaana: “Finease morwa Eliasare ke ene yo e neng e le moeteledipele wa bone mo nakong e e fetileng. Jehofa o ne a na le ene.” (1 Ditir. 9:20) E kete go ka nna fela jalo ka botlhe ba ba etelelang pele mo gare ga batho ba Modimo gompieno, tota e bile, e kete go ka nna jalo ka Bakeresete botlhe ba ba direlang Modimo ka boikanyegi.
Go Ribolola Matlotlo mo Dikwalong
Opelela Jehofa!
6 Ee, Jehofa o ne a ntsha taelo ka baporofeti gore baobamedi ba gagwe ba mmake ka pina. Baopedi ba e neng e le ba lotso lwa boperesiti ba ne ba sa dire ditiro tse Balefi ba bangwe ba neng ba laetswe go di dira e le gore baopedi bao ba kgone go nna le nako e e lekaneng ya go tlhama dipina le go nna ba di opela go fitlha ba di itse sentle.—1 Ditir. 9:33.
FEBRUARY 6-12
MATLOTLO A A MO LEFOKONG LA MODIMO | 1 DITIRAGALO 10-12
“Nonotsha Keletso ya Gago ya go Dira Thato ya Modimo”
“Nthuta go Dira Thato ya Gago”
12 Tsela e Dafide a neng a tlhaloganya ka yone melaometheo e e tlhalosiwang ke Molao, le keletso e a neng a na le yone ya go tshela ka melao eo, ke sengwe gape se re ka se etsang. Ela tlhoko se se neng sa direga fa Dafide a ne a re o eletsa go “nwa metsi a mogobe wa Bethelehema.” Banna ba le bararo ba ga Dafide ba ne ba pateletsa go tsena mo motseng—o ka nako eo go neng go nna Bafilisitia mo go one—mme ba tla le metsi. Le fa go ntse jalo, “Dafide [o ne] a se ka a dumela go a nwa, mme a a tshololela kwa go Jehofa.” Ka ntlha yang? Dafide o ne a tlhalosa jaana: “Go ka se direge ka nna, malebana le Modimo wa me, gore ke dire selo seno! A ke tshwanetse go nwa madi a banna bano ka go baya meya ya bone mo kotsing? Gonne ba ne ba a tlisitse ka go baya meya ya bone mo kotsing.”—1 Ditir. 11:15-19.
13 Dafide o ne a itse gore Molao wa ga Moshe o ne o re madi a tshwanetse go tshololelwa kwa go Jehofa mme a se ka a jewa. Gape o ne a tlhaloganya lebaka la go bo seno se tshwanetse go dirwa. Dafide o ne a itse gore “moya wa nama o mo mading.” Le fa go ntse jalo, seno e ne e le metsi e seng madi. Ke eng fa Dafide a ne a gana go a nwa? O ne a tlhaloganya se tota Molao ono o neng o se kaya. Mo go Dafide, metsi a ne a le botlhokwa jaaka madi a banna bao ba bararo. Ka jalo, o ne a se kitla a nwa metsi ao. Go na le gore a a nwe, o ne a dira tshwetso ya gore a a tshololele fa fatshe.—Lefi. 17:11; Dute. 12:23, 24.
Letla Melao le Melaometheo ya Baebele Gore e Thapise Segakolodi sa Gago
5 Fa re batla gore melao ya Modimo e re thuse, ga re a tshwanela go e bala kgotsa go e itse fela. Re tshwanetse go ithuta go e rata le go e tlotla. Lefoko la Modimo la re: “Tlhoang se se bosula, mme lo rate se se molemo.” (Amos. 5:15) Re ka dira seo jang? Ka go ithuta go leba dilo ka tsela e Jehofa a di lebang ka yone. A re re o na le bothata jwa go robala. Ngaka e go bolelela gore o je dijo tse di rileng, o ikatise le go tlogela dilo dingwe. Fa o sena go dira jalo, bothata jwa gago jwa go robala bo a fela. A ga o kitla o leboga ngaka go bo e go thusitse go tokafatsa botshelo jwa gago?
6 Ka tsela e e tshwanang, Mmopi wa rona o re neile melao e e ka re thusang go tila dilo tse di sa siamang le go re thusa go tokafatsa matshelo a rona. Akanya kafa melao ya Baebele e ka re thusang ka gone mo dilong tse di jaaka go bua maaka, go logela ba bangwe maano, go utswa, go tlhakanela dikobo pele ga lenyalo, go rata dikgoka le go dirisana le madimona. (Bala Diane 6:16-19; Tshen. 21:8) Fa re dirisa melao eno e bile re bona tsela e e re thusang ka yone, seo se dira gore re rate Jehofa le melao ya gagwe.
Go Ribolola Matlotlo mo Dikwalong
it-1-E 1058 ¶5-6
Pelo
Direla Jehofa “ka Pelo e e Feletseng.” Gore pelo ya mmatota e kgone go bereka sentle, e tshwanetse ya bo e feletse, mme pelo ya tshwantshetso yone e kgona go bereka le fa e kgaogane. Fa Dafide a ne a rapela a re: “Dira gore ke boife leina la gago ka pelo yotlhe,” o ne a bontsha gore pelo ya motho e kgona go kgaoganngwa ke maikutlo le dilo tse a di boifang. (Ps 86:11) Motho yo o ntseng jalo a ka tswa a na le “pelo e e sa felelang,” a direla Modimo a le mololo fela. (Ps 119:113; Tsh 3:16) Gape motho a ka nna “pelopedi” ka go leka go direla batlhanka ba babedi kgotsa ka go bua sengwe mme gone a akantse se se farologaneng. (1Dt 12:33; Ps 12:2, ntlh.) Jesu o ne a kgala mokgwa oo wa boitimokanyi wa go nna pelopedi.—Mat 15:7, 8.
Motho yo o batlang go itumedisa Jehofa ga a a tshwanela go nna le pelo e e sa felelang kgotsa go nna pelopedi, mme o tshwanetse go direla Jehofa ka pelo e e feletseng. (1Dt 28:9) Ka jalo, re tshwanetse go tsaya matsapa go tlhatlhoba dipelo tsa rona ka gonne di boferefere e bile di gagamalela se se bosula. (Jer 17:9, 10; Ge 8:21) Fa re batla go nna le pelo e e feletseng, re tshwanetse go rapela go tswa pelong (Ps 119:145; Sfi 3:41), go ithuta Lefoko la Modimo ka metlha (Esr 7:10; Dia 15:28), go rera dikgang tse di molemo ka matlhagatlhaga (bapisa le Jer 20:9) le go itsalanya le batho ba dipelo tsa bone di feletseng mo go Jehofa.—Bapisa le 2Dk 10:15, 16.
FEBRUARY 13-19
MATLOTLO A A MO LEFOKONG LA MODIMO | 1 DITIRAGALO 13-16
“Go Latela Kaelo go Dira Gore re Atlege”
A o A Tle o Botse Gore, “O Kae Jehofa?”
12 Fa letlole la kgolagano le sena go boela kwa Iseraele mme le beilwe dingwaga di le dintsi kwa Kiriathe-jearime, Kgosi Dafide o ne a batla go le fudusetsa kwa Jerusalema. O ne a gakololana le dikgosana tsa setšhaba mme a re Letlole le tla fudusiwa fa ‘go bonala go le molemo mo go bone e bile go amogelesega mo go Jehofa.’ Mme ga a ka a batlisisa sentle go tlhomamisa gore thato ya ga Jehofa ke eng mo kgannyeng eno. Fa a ka bo a dirile jalo, Letlole le ka bo le ne la se ka la pegwa mo koloing. Le ne le ka bo le rwelwe ke Bakohathe ba Balefi mo magetleng a bone ka tsela e Modimo a neng a laetse sentle ka yone. Le mororo Dafide a ne a tlhola a botsa Jehofa, ga a ka a dira jalo ka tshwanelo mo lekgetlhong leno. Ditlamorago tsa gone di ile tsa utlwisa botlhoko. Moragonyana Dafide o ne a dumela jaana: “Jehofa Modimo wa rona o ne a re galefela, gonne ga re a ka ra mmatla kafa mokgweng.”—1 Ditiragalo 13:1-3; 15:11-13; Dipalo 4:4-6, 15; 7:1-9.
A o A Tle o Botse Gore, “O Kae Jehofa?”
13 Fa kgabagare Balefi ba ne ba rwala Letlole go tswa kwa ntlong ya ga Obede-edome ba le isa kwa Jerusalema, go ne ga opelwa pina e e neng e tlhamilwe ke Dafide. E ne e na le kgakololo eno e e tswang pelong: “Batlang Jehofa le nonofo ya gagwe, batlang sefatlhego sa gagwe ka metlha. Gakologelwang ditiro tsa gagwe tse di gakgamatsang tse a di dirileng, dikgakgamatso tsa gagwe le ditshwetso tsa boatlhodi tsa molomo wa gagwe.”—1 Ditiragalo 16:11, 12.
Go Ribolola Matlotlo mo Dikwalong
Obamela Jehofa, Kgosi ya Bosakhutleng
14 Dafide o ne a isa letlole la kgolagano le le boitshepo kwa Jerusalema. Mo nakong eno e e itumedisang, Balefi ba ne ba opela pina ya pako e e neng e na le mafoko a a tlhomologileng a a kwadilweng mo go 1 Ditiragalo 16:31: “Buang mo gare ga ditšhaba lo re, ‘Jehofa ka boene ke Kgosi jaanong!’” Mongwe a ka ipotsa gore, ‘E re ka Jehofa e le Kgosi ya bosakhutleng, o ne a nna jang Kgosi ka nako eo?’ Jehofa o nna Kgosi fa a tlhoma mongwe yo o tla nnang moemedi wa gagwe ka nako e e rileng kgotsa mo maemong a a rileng. Ntlha eno e e malebana le tsela e Jehofa a busang ka yone e botlhokwa thata. Pele ga Dafide a swa, Jehofa o ne a mo solofetsa gore bogosi jwa gagwe bo tla nnela ruri, o ne a re: “Ke tla tsosa losika lwa gago morago ga gago, lo lo tla tswang mo teng ga gago; mme ruri ke tla tlhomamisa bogosi jwa gagwe ka thata.” (2 Sam. 7:12, 13) Seno se ne sa diragadiwa dingwaga tse di fetang 1 000 morago ga foo, fa “losika” lwa ga Dafide lo ne lo tlhagelela. Losika loo e ne ya nna mang, mme o ne a tla nna Kgosi leng?
FEBRUARY 20-26
MATLOTLO A A MO LEFOKONG LA MODIMO | 1 DITIRAGALO 17-19
“Tswelela o Itumetse Le fa O sa Kgone go Dira Dilo Dingwe”
Akanya Thata ka Molemo wa Phuthego ya ga Jehofa
DAFIDE wa Iseraele wa bogologolo ke mongwe wa batho ba ba tlhomologileng thata ba go buiwang ka bone mo Dikwalong tsa Sehebera. Motho yono yo e neng e le modisa, seopedi, moporofeti e bile e le kgosi o ne a ikanya Jehofa Modimo ka pelo yotlhe. Kamano e e molemo e Dafide a neng a na le yone le Jehofa e ne ya dira gore a eletse go agela Modimo ntlo. Ntlo eo, kgotsa tempele, e ne e tla nna boremelelo jwa kobamelo ya boammaaruri kwa Iseraele. Dafide o ne a itse gore dithulaganyo tsa kwa tempeleng di ne di tla tlisetsa batho ba Modimo boipelo le masego. Ka jalo, Dafide o ne a opela jaana: “Go itumela yo [wena Jehofa] o mo tlhophang o bo o mo dira gore a atamele, gore a tle a nne mo malwapeng a gago. Ruri re tla kgotsofadiwa ke molemo wa ntlo ya gago, lefelo le le boitshepo la tempele ya gago.”—Pesalema 65:4.
Itumelele se o Kgonang go se Direla Jehofa
11 Ka tsela e e tshwanang, le rona re ka itumela le go feta fa re dira sotlhe se re ka se kgonang mo tirong epe e re e newang mo phuthegong ya ga Jehofa. “Tlhoma mogopolo thata” mo tirong ya go rera mme o dire ka natla mo phuthegong. (Dit. 18:5; Baheb. 10:24, 25) Baakanyetsa dipokano sentle gore o kgone go araba dikarabo tse di kgothatsang. Tsaya dikabelo dipe fela tse o di newang mo dipokanong tsa mo gare ga beke di le botlhokwa thata. Fa o kopiwa gore o dire tiro nngwe mo phuthegong, tshwara nako mme o bontshe gore o ka ikanngwa. O se ka wa akanya gore kabelo epe e o e newang ga e botlhokwa e bile ga o tlhoke go fetsa nako ya gago mo go yone. Leka ka natla go tokafatsa tsela e o dirang tiro ya gago ka yone. (Diane 22:29) Fa o nna o direla Jehofa ka natla, o tla atamalana thata le ene mme o tla itumela le go feta. (Bagal. 6:4) E bile go tla nna motlhofo gore o itumele le ba bangwe fa ba newa maikarabelo a o neng o ka rata go nna le one.—Bar. 12:15; Bagal. 5:26.
Go Ribolola Matlotlo mo Dikwalong
w20.02 12, lebokoso
Re Rata Jehofa Fela Thata
A Jehofa o a Mpona?
A o kile wa ipotsa jaana: ‘Lefatshe le tletse ka batho ba bantsi tota, a mme Jehofa o a mpona?’ Ga se wena fela o kileng wa ipotsa jalo. Kgosi Dafide o ile a re: “Wena Jehofa, motho ke eng gore o mo tseye tsia, morwa motho yo o nang le go swa gore o mo tlhokomele?” (Pes. 144:3) Dafide o ne a itse gore Jehofa o a mo itse. (1 Ditir. 17:16-18) Jehofa o dirisa Baebele le phuthego ya gagwe go go bontsha gore o bona tsela e o mo ratang ka yone. Baebele e re tlhomamisetsa seno:
• Jehofa ga a bolo go go itse pele o tsholwa.—Pes. 139:16.
• Jehofa o itse gore o ikutlwa jang e bile o itse gore o akanya eng.—1 Ditir. 28:9.
• Jehofa o reetsa dithapelo tsotlhe tsa gago.—Pes. 65:2.
• Dilo tse o di dirang di ka itumedisa Jehofa kgotsa di ka mo utlwisa botlhoko.—Dia. 27:11.
• Jehofa o go gogetse mo phuthegong ya gagwe.—Joh. 6:44.
• Jehofa o go itse sentle, ka jalo fa o tlhokafala, o tla kgona go go tsosa. O tla go naya mmele o mosha le botho jo o nang le jone gone jaanong.—Joh. 11:21-26, 39-44; Dit. 24:15.
FEBRUARY 27–MARCH 5
MATLOTLO A A MO LEFOKONG LA MODIMO | 1 DITIRAGALO 20-22
“Thusa Basha Gore ba Atlege”
“Dilo Tseno di Neye Banna ba ba Ikanyegang”
8 Bala 1 Ditiragalo 22:5. Dafide a ka tswa a ne a akanya gore Solomone ga a tshwanelege go okamela tiro e e botlhokwa jalo. Kana e bile, tempele e ne e tlile go nna “kgolo [go] gaisa” mme ka nako eo, Solomone o ne a le “mmotlana e bile [a le] bokoa [kgotsa a se na maitemogelo].” Le fa go ntse jalo, Dafide o ne a itse gore Jehofa o ne a tla thusa Solomone gore a kgone go dira tiro e a e abetsweng. Ka jalo, Dafide o ne a tlhoma mogopolo mo tirong e a neng a ka kgona go e dira, e leng go phutha dilwana tse dintsi tsa go aga.
“Dilo Tseno di Neye Banna ba ba Ikanyegang”
7 Dafide o ne a thusa morwawe mme ga a ka ngongoregela gore ga a newa tshiamelo ya go aga tempele. Tota e bile, tempele eo e ne ya bidiwa ka leina la ga Solomone e seng la ga Dafide. Le fa gone Dafide a ne a kgobegile marapo, o ile a tshegetsa tiro eo ya go aga. O ne a rulaganya badiri ba ba tla agang mme a phutha tshipi, kgotlho, selefera, gouta le dikota tsa mosedara. Mo godimo ga moo, o ne a kgothatsa Solomone jaana: “Jaanong morwaaka, e kete Jehofa a ka nna le wena, mme o atlege o age ntlo ya ga Jehofa Modimo wa gago, fela jaaka a buile kaga gago.”—1 Ditir. 22:11, 14-16.
Batsadi, Thusang Bana ba Lona go Gatela Pele le go Kolobediwa
14 Bagolwane ba ka thusa batsadi ka go kgothaletsa bana gore ba ipeele mekgele mo tirelong ya ga Jehofa. Kgaitsadi mongwe yo o neng a nna mmulatsela dingwaga di feta 70 o gopola kafa Mokaulengwe Charles T. Russell a neng a mo kgothatsa ka gone fa a ne a na le dingwaga di le thataro. A re: “O ne a dirisa metsotso e le 15 a bua le nna ka mekgele ya me mo tirelong ya ga Jehofa.” Eleruri, go kgothatsa ba bangwe go ka ama matshelo a bone fela thata. (Dia. 25:11) Gape bagolwane ba ka kopa batsadi le bana ba bone go thusa ka diporojeke dingwe mo Holong ya Bogosi go ya ka bokgoni le dingwaga tsa bana bao.
15 Maloko a phuthego a ka thusa batsadi ka go bontsha basha gore ba a ba kgatlhegela. Seno se akaretsa go lemoga fa basha bangwe ba dira bontle mo phuthegong. A mosha mongwe o ile a arabela monate, a bontsha gore o akanyeditse karabo ya gagwe sentle, kgotsa a o ile a nna le kabelo mo dipokanong tsa mo gare ga beke? A mosha mongwe o ile a fenya teko nngwe kgotsa a rerela bana ba bangwe kwa sekolong? Fa go le jalo, mo akgole. Gape o ka bontsha gore o kgatlhegela basha ka go bua le bone pele ga dipokano le morago ga tsone. Fa re dira jalo, basha ba tla lemoga gore le bone ke karolo ya ‘phuthego e kgolo.’—Pes. 35:18.
Go Ribolola Matlotlo mo Dikwalong
Dintlhakgolo Tsa Buka ya Ditiragalo wa Ntlha
21:13-15. Jehofa o ne a laela moengele go emisa petso ka gonne o ne a utlwela batho ba Gagwe botlhoko. Ee ruri, “o mautlwelobotlhoko mantsi thata.”