Dipego Dikgang go Tswa mo Lefatsheng Lotlhe

Go Fitlhelela Ba-Canada Botlhe

Jaanong bidio ya Ke Eng fa o Tshwanetse go Ithuta Baebele? e ranoletswe mo dipuong di le robedi tsa kwa Canada gore e thuse batho ba ba nnang mo tshimong e e tlhokometsweng ke lekala la koo. Ka nako ya letsholo la malatsi a le lesome kwa Nunavik Arctic ka October 2014, bidio eno e ne ya bontshiwa batho mo e ka nnang mo ntlong nngwe le nngwe mo metseng e le 14 e e nang le batho ba feta 12 000, ka puo ya Se-Inuktitut.

Manejara O ne A Kgatlhegile

Ka September 2014, go ne ga tshwarwa kopano ya boditšhabatšhaba kwa Setadiamong sa Sejana sa Lefatshe sa Sangam kwa Seoul, Korea Borwa. Batho ba feta 56 000 ba ba neng ba le gone ba ne ba itumelela thulaganyo eo. Manejara wa setadiamo o ne a tlhalosa gore o lebogela boitshwaro jo bo molemo le tirisanommogo ya Basupi ka nako ya thulaganyo. O ne a re: “Mongwe le mongwe o ne a itshwere sentle. Ke ne ka gakgamadiwa ke go bona ba phepafatsa setadiamo go gaisa batho ba ba re phepafaletsang ka metlha. Ke eletsa e kete badiri ba rona ba ka bo ba dira tiro eo jaaka bone. Fa e le gore re batla go dira ditiro tsa bodumedi sentle, re tshwanetse go tshwana le Basupi ba ga Jehofa.”

Jehofa O ne A ba Naya Thapiso E ba E Tlhokang

Ka May 2012, puso ya kwa Sweden e ne ya gana kopo ya Basupi ba ga Jehofa ya go bona melemo ya ikonomi e mekgatlho mengwe ya bodumedi e neng e e itumelela. Setlhopha se se Laolang se ne sa letla gore go dirwe boikuelo kwa Kgotlatshekelo ya Botsamaisi ya naga eo.

Kgotlatshekelo e ne ya swetsa ka gore ba bodiwe dipotso pele e dira tshwetso. Bakaulengwe ba le mmalwa ba ba tswang kwa dinageng tse di farologaneng ba ne ba kopana go sekaseka kafa ba tla arabang dipotso tse ba tla di bodiwang ka gone. Ba ne ba ipaakanyetsa seo kwa Holong ya Bogosi kwa Stockholm.

Fa ba ntse ba ipaakanya, ba ne ba utlwa bele ya mojako wa holo e lela. Mokaulengwe mongwe o ne a bula setswalo mme a dumedisiwa ke basetsana ba babedi ba dingwaga di le 13 le 14. Ba ne ba re ba batla go botsa dipotso dingwe ka Basupi ba ga Jehofa. Mokaulengwe yoo o gakologelwa jaana, “Ke ne ke batla go ba raya ke re ba tle letsatsi lengwe ka gonne re ne re tshwaregile e bile re se na nako ya go araba dipotso tsa bone.”

Le fa go ntse jalo, mokaulengwe o ne a swetsa ka go bua le bone. Basetsana bao ba ne ba na le dipotso di le dintsi e bile dingwe tsa tsone e ne e le tse di amanang le setšhaba le ditlhopho. Morago ga moo, mokaulengwe o ne a boela kwa bakaulengweng mme a ba bolelela gore basetsana bao ba ne ba botsa dipotso dife le gore o di arabile jang.

Mo letsatsing le le latelang, bakaulengwe ba ne ba gakgametse ka gonne bontsi jwa dipotso tse Kgotlatshekelo e neng e di botsa, di ne di tshwana le tsa basetsana ba ba neng ba tlile kwa holong. Mokaulengwe yo o emelang mokgatlho o ne a re: “Le fa gone nkabo ke ile ka tshosiwa ke gore ke ne ke eme fa pele ga babueledi ba ba tlotlegang thata mo nageng, ke ne ka ikutlwa ke ritibetse. Mme ke ne ke tsaya gore Jehofa o setse a re bontshitse gore o na le rona ka gonne letsatsi pele ga moo, o ne a re naya thapiso e re neng re e tlhoka.”

Kgotlatshekelo e ne ya dumalana le rona, mme kgetsi e ne ya busediwa kwa pusong gore go dirwe tshwetso e ntšha.

Kgetsi ya ga Ken ya Raese

Ken wa dingwaga di le thataro o nna kwa Haiti. O ne a itumelela go utlwa gore mo bogautshwaneng phuthego ya bone e tlile go agelwa Holo ya Bogosi. O ne a swetsa ka go itirela lebokose la moneelo mo sephiring a bo a le fitlha mo phaposing ya gagwe. Go na le go dirisa madi a batsadi ba gagwe ba neng ba mo a naya fa a ya sekolong, o ne a a tsenya mo lebokoseng leo. O ne a dira jalo ka metlha go fitlha setlhopha sa go aga Holo ya Bogosi se goroga go tla go simolola tiro. Go tswa foo o ne a ba naya lebokose la gagwe le le neng le na le madi a a neng a lekane go reka kgetsi e kgolo ya raese. Go ne ga feta malatsi go jewa raese ya ga Ken ka nako ya dijo tsa motshegare fa go agiwa holo.

Ditaelo go Tswa Kwa Molaoding wa Masole

Mo dikgweding di le dintsi tsa ngwaga o o fetileng, go ne go tlhokega tetla ya go tsena kwa dikgaolong tsa Sierra Leone tse di neng di amilwe ke mogare wa Ebola. Ka sekai, balebedi ba potologo ba ne ba tlhoka dibetšhe le makwalo a go tsena ka dikoloi mo mafelong ao. Go ne go ntse jalo le ka bakaulengwe ba ba neng ba isa dikgatiso le makwalo koo. Maloko a Komiti ya Namolo a ne a tlhoka go isa dithemometara, bleach le dijo koo. Se se gakgamatsang ke gore ka metlha ba ne ba newa makwalo a a tlhokegang.

Go na le maitemogelo mangwe a a neng a nonotsha tumelo. Bakaulengwe ba ne ba romela lekwalo la kopo ya dibetšhe di le 34 le makwalo a go tsena ka dikoloi di le 11 mme ba ne ba tshwanetse go kopana le molaodi wa masole gore a amogele kopo ya bone. Bakaulengwe ba le babedi go tswa kwa ofising ya lekala ba ne ba kopana le molaodi wa masole mo letsatsing le ka lone ba neng ba solofetse gore ba tla newa dibetšhe le makwalo ao. Le fa go ntse jalo, lekwalo la kopo le ne le sa bonwe. Bakaulengwe ba ne ba kopiwa go le ipatlela mo mokoeng wa dikopo tse ba neng ba di neilwe mme ba se ka ba le bona. Ka nako eo, molaodi o ne a bolelela mokwaledi wa gagwe gore o tswala ofisi ya gagwe le gore makwalo a go kopa tetla a tla sekasekiwa fela morago ga dibeke di le pedi. Bakaulengwe ba ne ba rapela Jehofa mo pelong gore a ba thuse ka kgang eo. Molaodi wa masole o ne a leba bakaulengwe a bo a ba botsa jaana, “Lo tlhoka dibetšhe le makwalo a le kae?” Fa a ne a bolelelwa palo ya tsone, o ne a ema mo setulong a bo a goa a re, “Di dintsi thata!”

Bakaulengwe ba ne ba mo tlhalosetsa ka tiro ya rona le kafa dilwana tsa rona tsa namolo di thusang batho go lebana le bolwetse jwa Ebola ka gone. Molaodi wa masole o ne a ema go se kae, a leba mokwaledi wa gagwe, a bo a re, “Ba neye sengwe le sengwe se ba se tlhokang.”