A Baebele e Ile ya Bolelela Pele Tsela e Batho ba Akanyang ka Yone Le e Ba Itshwarang ka Yone Gompieno?

Karabo ya Baebele

Ee, Baebele e ile ya bolelela pele gore mo nakong e re tshelang mo go yone, tsela e batho ba akanyang ka yone le e ba itshwarang ka yone e tla nna maswe le go feta. E bontsha gore seno se ne se tla dira gore maitshwaro a batho a nne maswe thata le gore ba ne ba tla tlhoka botho.a (2 Timotheo 3:1-5) Gape Baebele e ile ya bolelela pele gore batho ba bangwe ba ka se fetolwe ke mekgwa e e bosula e batho ba e dirang. Ka thuso ya Modimo, ba ithuta go akanya le go itshwara ka tsela e e itumedisang Modimo.​—Isaia 2:2, 3.

Mo setlhogong seno:

• Ke eng se Baebele e ileng ya se bolelela pele ka tsela e batho ba akanyang ka yone le e ba itshwarang ka yone gompieno?

• Batho ba ba pelotshetlha ba ka ama ba bangwe jang?

• Goreng mekgwa ya batho e nna maswe le go feta?

• Re tshwanetse go itshwara jang fa bangwe ba dira dilo tse di bosula?

• A batho botlhe ba tla dira dilo tse di bosula?

• A dilo di tla nna maswe le go feta?

Ke eng se Baebele e ileng ya se bolelela pele ka tsela e batho ba akanyang ka yone le e ba itshwarang ka yone gompieno?

Baebele e tlhalosa mekgwa e e farologaneng le maitshwaro a a sa siamang a a tla tlwaelegang a a bakwang ke bopelotshetlha. Batho ba “tla ikakanyetsa ba le bosi,” “ba sa ithibe mo go sepe,” “ba rata menate go na le go rata Modimo.”​—2 Timotheo 3:2-4.

Batho gompieno ba diragatsa boporofeti jono, ba ikakanyetsa ba le bosi, gore ke eng se se tla ba solegelang molemo, ke eng se se tla dirang gore ba itumele le gore ke eng se se tla dirang gore botshelo jwa bone bo nne le bokao. Fela jaaka boporofeti jono bo boleletse pele, batho ba le bantsi gompieno ba ikakanyetsa ba le bosi mme e bile seno se nna maswe le go feta. Batho ba le bantsi ba ikakanyetsa ba le bosi mo eleng gore ga ba “rate se se molemo,” e bile ga ba kgone go rata dinonofo tse di molemo. Ga ba “leboge,” e bile ga ba bone go le botlhokwa gore ba bontshe tebogo ka dilo tse ba nang le tsone kana tse ba di direlwang.​—2 Timotheo 3:2, 3.

Bopelotshetlha bo di goga kwa pele mme bo baka mangwe a maitshwaro a a diragalang gompieno:

• Bogagapa. Batho ba le bantsi “ba rata madi” e bile ba dumela gore go nna le madi kana dithoto go bontsha gore ba atlegile.​—2 Timotheo 3:2.

• Boikgogomoso. Batho ba le bantsi ‘ba ikgantsha, ba mabela,’ e bile “ba ikgogomosa.” (2 Timotheo 3:2, 4) Batho ba ba ntseng jalo ba ikgantsha, le go feteletsa bokgoni, dinonofo le dikhumo tsa bone.

• Go senya batho maina. Batho ba ‘ba tlhapatsang’ le ba ‘ba senyang batho maina’ ba bantsi mo lefatsheng. (2 Timotheo 3:2, 3) Seno se ka raya batho ba ba tlhapatsang ba bangwe kana Modimo kana ba bua maaka ka bone.

• Botlhogoethata. Batho ba le bantsi ga ba“ikanyege,” ga ba“batle go dumalana le ba bangwe ka sepe,” “ba tsietsa ba bangwe,” e bile ba“tlhogoethata.” (2 Timotheo 3:2-4) Ba bontsha mekgwa eno ka go se batle go ineela, go tsena mo tumalanong epe kana go diragatsa se ba se solofeditseng.

• Go rata ntwa. Batho ba le bantsi gompieno ba “bogale jo bo tshabegang,” ba nna fela ba ikemiseditse go galefa mme seo se dira gore ba tshwarane setlhogo kana ba lwantshe ba bangwe.​—2 Timotheo 3:3.

• Go tlola molao. Jesu o ile a bolelela pele gore “bosula bo tla bo bo oketsegile” ka nako ya rona. (Mathaio 24:12) Gape o ile a bolelela pele gore go tla nna le “dikhuduego,” kana “tlhakatlhakano.”​—Luke 21:9, ntlha e e kwa tlase.

• Go tlhoka lorato mo lelapeng. Batho ba ‘ba sa utlweng batsadi’ le ba ‘ba sa rateng ba bangwe[ba malapa a bone]’ ba dirile gore batho ba tlhokomologiwe mo lelapeng le go tshwarwa setlhogo.​—2 Timotheo 3:2, 3.

• Boitimokanyi jwa Bodumedi. Go oketsega ga batho ba ba ‘itirang e kete ba boifa Modimo.’ (2 Timotheo 3:5) Go na le go ikobela Modimo, ba latela baeteledipele ba bone ba bodumedi ba ba ba bolelelang se ba batlang go se utlwa.​—2 Timotheo 4:3, 4.

Batho ba ba pelotshetlha ba ka ama ba bangwe jang?

Ka ntlha ya batho ba ba pelotshetla, batho ba le bantsi ba na le malwetse a tlhaloganyo le seterese. (Moreri 7:7) Ka sekai, batho bangwe ba ba ratang madi ba tsietsa ba bangwe. Batho ba ba sa rateng ba malapa a bone ba ka ba tshwara setlhogo mme maloko ao a ka feleletsa a nna le kgatelelo ya maikutlo kgotsa ba ka batla go ipolaya. Batho ba ba tsietsang ba bangwe ba bakela ba ba ba tsietsang kgatelelo ya maikutlo.

Goreng mekgwa ya batho e nna maswe le go feta?

Baebele e tlhalosa mabaka a go bo batho ba fetoga:

• Lorato lwa mmatota mo Modimong le mo baagelaning lo ntse lo a fokotsega. (Mathaio 24:12) Ka ntlha ya seno, bopelotshetlha bo a oketsega.

• Satane Diabolo o ntshitswe kwa legodimong mme o latlhetswe mo lefatsheng. (Tshenolo 12:9, 12) Fa e sa le seno se direga, o tlhotlheleditse batho go nna pelotshetlha le e leng go feta.​—1 Johane 5:19.

Re tshwanetse go itshwara jang fa bangwe ba dira dilo tse di bosula?

Lefoko la Modimo le a re: “Bano o ikgaoganye le bone.” (2 Timotheo 3:5) Seno ga se reye gore re tshwanetse go itlhaola mo bathong. Mme gone, ga re a tshwanela go itsalanya le batho ba ba sa tsheleng go ya ka melao ya Modimo.​—Jakobe 4:4.

A batho botlhe ba tla dira dilo tse di bosula?

Nnyaa. Baebele e ile ya bolelela pele gore go tla nna le ba ba “bogisiwang le ba ba hutsafadiwang ke dilo tsotlhe tse di makgapha tse di dirwang.” (Esekiele 9:4) Ba tla gana bopelotshetlha mme ba tla batla kaelo mo melaong ya Modimo. Puo ya bone le ditiro tsa bone di tla farologana le tsa ba bangwe. (Malaki 3:16, 18) Ka sekai, ba ne ba tla leka go agisana le batho botlhe gape ba ne ba se kitla ba tsaya karolo mo dintweng le mo thubakanyong.​—Mika 4:3.

A dilo di tla nna maswe le go feta?

Nnyaa. Dilo ga di kitla di nna maswe le go feta mo e leng gore go tla bo go tletse tlhakatlhakano le thubakanyo fela. Go na le moo, Modimo o tla fedisa batho botlhe ba ba sa ikobeleng melao ya gagwe. (Pesalema 37:38) O tla dira “lefatshe le lesha” le batho ba ba bonolo ba tla tshelelang ruri mo go lone ka kagiso. (2 Petere 3:13; Pesalema 37:11, 29) Tsholofelo eno ga se go ijesa dijo tsa ditoro. Tota le gompieno, Baebele e thusa batho go fetola matshelo a bone go dumalana le ditsela tsa Modimo tse di siameng.​—Baefeso 4:23, 24.