2022: Ngwaga wa Tlhakatlhakano—Baebele e a Reng ka Kgang Eno?

Ka ngwaga wa 2022, mo dikgannyeng go ne go buiwa thata ka dintwa, mathata a ikonomi le masetlapelo. Baebele ke yone fela e re tlhalosetsang gore tota ditiragalo tseno di kaya eng.

Se ditiragalo tsa 2022 di se kayang

Ditiragalo tsa ngwaga o o fetileng, di bontsha sentle gore re tshela mo nakong e Baebele e e bitsang ‘malatsi a bofelo.’ (2 Timotheo 3:1) ‘Malatsi ao a bofelo,’ a ne a simologa ka ngwaga wa 1914. Ela tlhoko kafa ditiragalo tsa bosheng di dumalanang ka gone le se Baebele e neng ya se bolelela pele ka nako e re tshelang mo go yone:

“Dintwa.”—Mathaio 24:6.

•  “Ka ngwaga wa 2022, Yuropa e ne ya lebana gape le ditlamorago tse di botlhoko tsa ntwa.”a

“Ditlhaelo tsa dijo.”—Mathaio 24:7.

•  “Ka ngwaga wa 2022 go ne ga nna le leuba le legolo.”b

“Malwetse a leroborobo.”—Luke 21:11.

•  “Bolwetse jwa polio bo ne jwa boa gape, bolwetse jwa monkeypox e ne ya nna bothata jo bogolo, mme COVID-19 e tsweletse ka go ama batho ba le bantsi. Boemo jono bo ne jwa bontsha kafa malwetse a a tshelanwang a leng kotsi ka gone le gore a kgona go tsena batho motlhofo fela.”c

“Dilo tse di tshosang.”—Luke 21:11.

•  “Mogote o o kwa godimo thata, komelelo, melelo ya naga le merwalela. Paka ya selemo ya ngwaga wa 2022 e tla gopolwa ka ditiragalo tse dintsi tse di bakilweng ke maemo a bosa a a feteletseng, tse di neng tsa baka tshenyo e kgolo, tsa bolaya batho ba le diketekete mme tsa tlogela batho ba le dimilione ba se na magae.”d

“Dikhuduego [kgotsa, “dipheretlhego; tlhakatlhakano,” ntlh.].”—Luke 21:9.

•  “Ka ngwaga wa 2022, e re ka batho ba ne ba galefisitswe thata ke mathata a ikonomi, segolobogolo go tlhatloga ga ditlhwatlhwa tsa dilo, ba ne ba dira megwanto e mentsi ba ngongorega kgatlhanong le dipuso.”e

Go tla direga eng mo ngwageng o o latelang?

Ga go na ope yo o itseng gore tota go tla direga eng ka ngwaga wa 2023. Se re se itseng ke gore go ise go ye kae, Bogosi Jwa Modimo, kgotsa puso e e kwa legodimong, bo tla tlisa diphetogo tse dikgolo mo lefatsheng. (Daniele 2:44) Puso eo e tla fedisa dilo tsotlhe tse di dirang gore batho ba boge e bile e tla tlhomamisa gore thato ya Modimo e a dirwa mo lefatsheng.—Mathaio 6:9, 10.

Re go kgothaletsa gore o tseye tsia kgakololo ya ga Jesu Keresete mme ‘o nne o disitse’ gore o bone kafa ditiragalo tsa lefatshe di diragatsang boporofeti jwa Baebele ka gone. (Mareko 13:37) Tsweetswee ikgolaganye le rona gore o ithute dintlha tse di oketsegileng tsa kafa Baebele e ka go thusa ka teng gone jaanong le kafa e ka nayang wena le ba lelapa la gago bokamoso jo bo botoka ka gone.