A Modimo o Gongwe le Gongwe?
Karabo ya Baebele
Modimo o kgona go bona le go dira sengwe le sengwe se a se batlang. (Diane 15:3; Bahebera 4:13) Le fa go ntse jalo, Baebele ga e rute gore Modimo o gongwe le gongwe kgotsa gore o nna gotlhe fela. Go na le moo, e bontsha gore Modimo o na le lefelo le a nnang kwa go lone.
Popego ya Modimo: Modimo ke moya. (Johane 4:24) Batho ga ba kgone go mmona. (Johane 1:18) Ditemana tsa Baebele tse di buang ka Modimo di mo tlhalosa a le mo lefelong le a nnang kwa go lone. Ga di mo tlhalose a le gongwe le gongwe.—Isaia 6:1, 2; Tshenolo 4:2, 3, 8.
Lefelo le Modimo a nnang kwa go lone: Modimo o nna kwa lefelong la semoya le le sa tshwaneng le le rona batho re nnang mo go lone. Modimo o na le ‘lefelo la gagwe la bonno’ kwa magodimong. (1 Dikgosi 8:30) Baebele e bua ka nako ya fa dibopiwa tsa semoya di ne di ‘tsena go tla go ema fa pele ga ga Jehofa,’a e leng se se bontshang gore Modimo o na le lefelo le a nnang kwa go lone.—Jobe 1:6.
Fa e le gore Modimo ga a gongwe le gongwe, a o itse se ke se tlhokang?
Ee. Modimo o amega thata ka mongwe le mongwe wa rona. Le fa Modimo a nna kwa lefelong la semoya, o bona batho ba ba batlang go mo itumedisa e bile o a ba thusa. (1 Dikgosi 8:39; 2 Ditiragalo 16:9) Ela tlhoko kafa Jehofa a ileng a bontsha ka gone gore o amega ka batlhanka ba gagwe ba ba ikanyegang:
Fa o rapela: Fela fa o simolola go rapela, Jehofa o utlwa thapelo ya gago.—2 Ditiragalo 18:31.
Fa o tshwenyegile thata: “Jehofa o gaufi le ba ba pelo e phatlogileng; mme o boloka ba ba moya o pitlaganeng.”—Pesalema 34:18.
Fa o tlhoka kaelo: Jehofa o tla ‘dira gore o nne le temogo le go go ruta’ a dirisa Lefoko la gagwe e leng Baebele.—Pesalema 32:8.
Dikgopolo tse di seng boammaaruri
Kgopolo e e phoso: Modimo o gongwe le gongwe.
Boammaaruri: Modimo ga a nne mo lefatsheng kgotsa mo lefelong lepe fela le re ka akanyang ka lone. (1 Dikgosi 8:27) Ke boammaaruri gore dinaledi le dilo tse dingwe di “bolela kgalalelo ya Modimo.” (Pesalema 19:1) Mme Modimo ga a nne mo dilong tse a di bopileng fela jaaka motaki a sa nne mo selong se a se takileng. Le fa go ntse jalo, selo se se takilweng se ka go ruta go le gontsi ka motho yo o se takileng. Lefatshe le dilo tse di mo go lone di re ruta ka “dinonofo tse di sa bonaleng” tsa Mmopi tse di jaaka maatla, botlhale le lorato.—Baroma 1:20.
Kgopolo e e phoso: Modimo o tshwanetse a bo a le gongwe le gongwe gore a nne maatla le go itse sengwe le sengwe.
Boammaaruri: Moya o o boitshepo ke maatla a Modimo a a dirisang. Modimo o dirisa moya o o boitshepo go bona sengwe le sengwe, go dira sengwe le sengwe, go o romela gongwe le gongwe ka nako nngwe le nngwe e a e batlang ntle le gore ene ka boene a ikise.—Pesalema 139:7.
Kgopolo e e phoso: Pesalema 139:8 e re ruta gore Modimo o gongwe le gongwe ka gonne ya re: “Fa nka tlhatlogela kwa legodimong, o ne o tla nna teng koo; le fa nka tsharolola sekanamelo sa me kwa Sheole [kgotsa Lebitla], bona! o ne o tla nna teng koo.”
Boammaaruri: Temana eno ga e bue ka lefelo le Modimo a nnang kwa go lone. E dirisa mafoko a poko go re ruta gore ga go na lefelo le Modimo a ka palelwang ke go re thusa fa re le kwa go lone.
a Baebele ya re leina la Modimo ke Jehofa.