Basupi ba ga Jehofa ba Leba Tlhalo Jang?

Re latela kgakololo ya Baebele e e malebana le lenyalo le tlhalo. Boikaelelo jwa Modimo ka lenyalo e ne e le gore monna le mosadi ba se ka ba kgaogana. Dikwalo di dumela gore motho a tlhale fa fela monna kgotsa mosadi wa gagwe a dirile boaka.—Mathaio 19:5, 6, 9.

A Basupi ba thusa banyalani ba ba nang le mathata mo lenyalong?

Ee, ka ditsela tse di farologaneng:

Dikgatiso. Di na le tshedimosetso e e ka thusang manyalo, tota le a go lebegang a se kitla a siama. Ka sekai, bona setlhogo se se reng, “Go Boloka Maitlamo a Gago mo Lenyalong” le “Kafa o ka Itshwarelang ka Gone.”
Dipokano. Re tlotla ka kgakololo ya Baebele e e malebana le lenyalo kwa dipokanong, kwa dikopanong tse dinnye le tse dikgolo.
Bagolwane. Bagolwane ba thusa banyalani le go tlotla le bone ka ditemana tse di jaaka Baefeso 5:22-25.

A bagolwane ke bone ba nayang motho tetla ya gore a tlhale?

Nnyaa. Le fa ba bagolwane ba ka kopiwa gore ba thuse banyalani ba ba nang le mathata, ga ba na tetla ya go bolelela banyalani bao gore ba dire eng. (Bagalatia 6:5) Mme gone, Baebele ya re motho yo o tlhalang kwa ntle ga mabaka a a tlhalositsweng mo Dikwalong, ga a tshwanela go nyala gape.—1 Timotheo 3:1, 5, 12.

Basupi ba leba jang kgang ya go kgaogana?

Baebele e rotloetsa banyalani gore ba se ka ba kgaogana le fa go ka nna thata jang mo lenyalong. (1 Bakorintha 7:10-16) Mathata a le mantsi a ka rarabololwa fa banyalani ba rapela mmogo, ba dirisa melaometheo ya Baebele e bile ba bontshana lorato.—1 Bakorintha 13:4-8; Bagalatia 5:22.

Mme maemo a a latelang a ile a dira gore Bakeresete bangwe ba ba ba mo lenyalong ba kgaogane:

Go gana go tlamela lelapa.—1 Timotheo 5:8.
Go itaya.—Pesalema 11:5.
Go thibela motho go direla Modimo. Ka sekai, monna kgotsa mosadi a ka leka go pateletsa molekane wa gagwe yo e leng Mosupi gore a tlole melao ya Modimo ka tsela nngwe mme yo e leng Mosupi a ka nna a dira tshwetso ya gore a kgaogane le ene gore a kgone go “utlwa Modimo e le mmusi bogolo go batho.”—Ditiro 5:29.