Maikutlo a Bibela

Boleo jwa kwa Tshimologong E ne E Le Eng?

BOLEO jwa kwa tshimologong e ne e le eng? “Go tlhakanela dikobo,” batho ba le bantsi ba tla araba jalo. Ba dumela gore loungo lo lo neng lo ileditswe lwa kwa tshimong ya Edene le ne le emela dikamano tsa bonna le bosadi le gore Adame le Efa ba ne ba leofa ka go nna le dikamano tsa kafa dikobong.

Kgopolo eno ga e ntšha. Go ya ka rrahisitori ebong Elaine Pagels, “polelo ya gore boleo jwa ga Adame le Efa e ne e le go tlhakanela dikobo” e ne e “le e e tumileng mo gare ga baruti ba Bokeresete [ba lekgolo la bobedi la dingwaga] ba ba jaaka Tatian wa Mosiria, yo o neng a ruta gore loungo lwa setlhare sa kitso le ne le raya go itse ka boitshwaro jwa kafa dikobong.” Gape mo go Rre wa Kereke ya Labodumedi ebong Augustine wa lekgolo la botlhano la dingwaga C.E., boleo bo simologile fa Adame a ne a nna le keletso ya go tlhakanela dikobo. Totatota, Psychology Today e ne ya bolela gore “boleo jwa ga Adame e ne e le go itse ka tlhakanelo dikobo.”

Ba bangwe ba ile ba akanya gore setlhare sa kitso ya molemo le bosula se ne se emela kitso ka boyone. Encyclopædia Britannica e bolela gore “kitso ya molemo le bosula” e ne e le “polelo eo e neng e dirisiwa ka nako eo go bolela kitso yotlhe.” Seo se ne se tla raya gore Modimo o ne o batla gore Adame le Efa ba seka ba itse sepe le gore ba ne ba mo tsuologela ka go batla go atolosa kitso ya bone.

Ditlhaloso tseno ka bobedi jwa tsone eleruri di tlhalosa Mmopi jaaka yo o sa siamang le yo o sa tlhomamang. Ke ka ntlhayang fa a ne a ka bopa motho a na le dikeletso tsa kafa dikobong le tsa mogopolo mme a bo a sa mo letle go kgotsofatsa dikeletso tseo kwantle ga gore a bone kotlhao ya loso ka go dira jalo? Ke mang yo o neng a tla ikutlwa a tlhotlheletsega go rata Modimo wa go nna jalo le go mo direla?

A Go Tlhakanela Dikobo E Ne E le Gone Boleo jwa kwa Tshimologong?

Batho ba le bantsi ga ba itse gore ditlhaloso tseno tsoopedi di ganetsana gotlhelele le seo pego ya Genesise e se bolelang. A pele re sekasekeng kgopolo ya gore seo Modimo a neng a se iletsa kwa Edena totatota e ne e le gore go seka ga nniwa le dikamano tsa kafa dikobong. Molao o go buiwang ka one fano o mo go Genesise 2:16, 17: “U ka ya hèla setlhare señwe le señwe sa tshimo ka go rata: Me setlhare sa kicō ea molemō le boshula, shōna u se ka ua se ya: gonne ka tsatsi ye u yañ ga shōna rure u tla shwa.”

A fano tota go ne go buiwa kaga boitshwaro jwa kafa dikobong ka tsela e e sa tlhamalalang? Jaaka fa go begilwe mo go Genesise 1:27, 28, Modimo o ne wa laela monna le mosadi gore ba ‘ate ba ntsifale ba tlale ka lefatshe.’ Adame le Efa ba ne ba ka ikobela taolo eo jang kwantle ga gore ba nne le dikamano tsa kafa dikobong? A tota re tshwanetse ra akanya gore Modimo o ne wa ba neela taolo mme morago ga moo wa ba atlholela loso fa ba ne ba leka go e ikobela?

Mo godimo ga moo, pego ya Genesise e bontsha gore Adame le Efa ba ne ba leofa ba se mmogo, ga ba leofa ka nako e le nngwe. Kgaolo 3, temana 6, e tlhalosa ka phepafalo gore Efa o ne a raelwa gore a je leungo leno pele mme gore “morago ga moo o ne a neela monna wa gagwe le ene fa a ne a na nae mme le ene a simolola go ja.” (NW) Ka jalo go ja leungo le le thibetsweng e ne e tla nna selo sa boeleele le se se itswelang fela mo tlhogong se se emelang go tlhakanela dikobo.

A E Ne E Le Kitso?

Go tweng ka polelo ya gore loungo lo lo ileditsweng loo lo ne lo emela kitso yotlhe? Totatota, Adame le Efa ba ne ba setse ba na le kitso e ntsi pele ga ba tlola molao o o mo go Genesise 2:16, 17. Mmopi wa bone, Jehofa ka boene, o ne a nna le seabe ka tlhamalalo mo go ba ruteng. Ka sekai, o ne a tlisa diphologolo tsotlhe le dinonyane mo monneng gore a di reye maina. (Genesise 2:19, 20) Kwantle ga pelaelo Adame o ne a tla tshwanelwa ke gore a ithute nngwe le nngwe ka kelotlhoko e le gore a tle a e neye leina le le e tshwanetseng. Abo a ne a tla ithuta ka diphologolo thata jang ne! Efa, lemororo a ne a bopiwa moragonyana, le ene e ne e se gore o ne a sa itse sepe. Fa a ne a bodiwa ke noga, o ne a bontsha gore o ne a rutilwe molao wa Modimo. O ne a itse pharologanyo magareng ga se se siameng le se se sa siamang, ebile o ne a itse le ditlamorago tsa go dira selo se se phoso.—Genesise 3:2, 3.

Go tlhalosa boleo jwa ntlha gore e ne e le boitshwaro jwa kafa dikobong kana gore e ne e le kitso—ke ditlhaloso tsa batho fela, ga se sepe se se fetang seo. Makoa a tsone a bontshiwa ke potso eno eo monna yo o ikanyegang ebong Josefa a neng a e botsa: “Diphuthololō a ga se tsa Modimo?” (Genesise 40:8) Bibela e tlhaloganyesega bonolo fa re sa e tle re tsenya dikgopolo tsa motho mo go yone, mme, go na le moo, re e letla gore e itlhalose. He boleo jwa kwa tshimologong e ne e le eng? Pego ya Genesise e re neela mabaka a a utlwalang sentle go dumela gore setlhare sa kitso ya molemo le bosula e ne e le setlhare sa mmatota. Re bolelelwa koo gore ke eng se se neng se le gone mo tshimong eo, mme go buiwa ka sone jaaka fa go buiwa ka ditlhare tse dingwe. Loungo lwa sone e ne e le la mmatota, ebile Adame le Efa ba ne ba ja loungo loo tota.

A E Ne E Le go Sa Utlwe?

Fa ba ne ba ja loungo loo, ba ne ba dirang? New Catholic Encyclopedia e akgela jaana ka poifo: “E ka nna ya tswa e le fela gore ba ne ba gwetlha Modimo ka tlhamalalo, le go gana ka bopelokgale go Mo utlwa.” A seno ga se seo Genesise e se bolelang ka phepafalo? Baroma 5:19 e tlhomamisa ntlha eno jaana: “Ka ntlha ya go sa utlwe ga motho a le mongwe ba le bantsi ba ne ba dirwa gore e nne baleofi.” (The New Jerusalem Bible) Boleo jwa kwa tshimologong e ne e le go sa utlwe.

Lemororo boleo jwa go sa utlwe bo ka bonala e le jo e seng jwa sepe, a o ko o sekaseke seo bo neng bo se raya tota. Ntlhanyana e e kwa tlase e e mo go The New Jerusalem Bible e bolela jaana: “[Kitso ya se se molemo le se se bosula] ke maatla a go itirela ditshwetso ka boene malebana le se se molemo le se se bosula le go dira dilo go ya ka tshwetso eo, go bolela gore o ikemetse ka nosi ka mo go feletseng mo boitshwarong . . . Boleo jwa ntlha e ne e le go tlhasela bolaodi jwa Modimo.” Ee, “setlhare sa kitso ya molemo le bosula” se ne se emela tshwanelo ya Modimo ya go tlhomela motho ditekanyetso malebana le seo se amogelwang le seo se kgalwang. Ka go gana go utlwa molao wa Modimo, motho o ne a ganetsa tshwanelo ya Modimo ya go mmusa. Jehofa o ne a araba kgwetlho eno ka tshwanelo ka go letla motho gore a ipuse. A o ne o ka seka wa dumalana gore ditlamorago tsa gone e nnile tsa matlhotlhapelo?—Duteronome 32:5; Moreri 8:9.

Ke ka ntlha ya moo setlhogo sa Bibela, eleng Bogosi jwa Modimo, se re leretse tsholofelo e kgolo jaana. Ka Bogosi jono, Jehofa o solofetsa go fedisa puso ya motho e e gatelelang ka bonako mme a bo a e emisetsa ka puso ya Gagwe—bogosi jo bo tla tsosolosang paradaise ya selefatshe—eo e leng selo seo Adame le Efa ba neng ba latlhegelwa ke sone.—Pesalema 37:29; Daniele 2:44.

[Setshwantsho mo go tsebe 30]

A Adame le Efa ba ne ba dira boleo jwa kwa tshimologong ka go nna le dikamano tsa kafa dikobong?

[Motswedi wa Setshwantsho]

Gustave Doré