Pont du Gard Ke Senna Foo

THE New Encyclopædia Britannica e tlhalosa jaana, “lobaka lo loleele morago ga Mmusomogolo wa Roma o sena go nyelela, mesele ya metsi eo o neng o e dirile e ne ya sala e dirisiwa le go kgatlha batho ebile e le selo se se tlhotlheletsang mo baaging ba dingwaga tse di neng tsa latela morago ga moo.” Pont du Gard ke mongwe wa yone. Tota ebile e tshwanetse ya bo e le one o o tumileng go gaisa kwa Fora o o gopotsang ka eo e neng e le teng ka nako ya Roma.

Mesele eno ya metsi ya kwa Roma gantsi e ne e agetswe go isa metsi kwa ditoropong eseng go nosetsa masimo. Ditoropo tseno di ne di na le metswedi ya metsi eo batho botlhe ba neng ba gelela metsi mo go yone, dibata tsa metsi a a bothitho, matangwana a bothumelo, le dibeisene tsa metsi; dingwe tsa ditoropo tse ditona tsone ebile di ne di na le mesele e e kgophang leswe. Ee, ditoropo tsa Roma le mafelo a a neng a le kafa tlase ga yone di ne di tlhoka metsi—le gone ebile di tlhoka a mantsi.

Pont du Gard ke kago e eketeng borogo, e e okameng noka ya Gard ka bogodimo jo bo ka nnang jwa dimetara di le 49, ebile e le yone e e godimo go di gaisa e e kileng ya agiwa ke Baroma go tshegetsa kgogomelo ya metsi. Lemororo e le botelele jwa dimitara di le 275, e dira karolonyana fela ya mosele oo otlhe wa metsi. Mosele oo wa metsi fa o ne o le mmogo, o ne o le boleele jwa dikilometara di le 49. O ne o dirisiwa go isa metsi kwa toropong ya Roma ya Nîmes. Fela jaaka dikago tse dingwe tsa Roma tsa nako eo, mosele oo fa e sale o nna se nna foo ka makgolokgolo a dingwaga o sa senyega mo go kalokalo mme ebile o pakela boleng le tsela e e manontlhotlho eo Baroma ba neng ba dira tiro ka yone le bokgoni joo maenjenere a bone a neng a na le jone. Dipitikwe tsa letlapa la lenyaphiri, tse dingwe tsa tsone di ne di na le bokete jwa ditone di le thataro, di ne di thujwa di bo di betliwa kwa kwaring e e neng e le gaufi ya kwa Vers. Se se bileng se kgatlhisa ke gore, go ne go sa dirisiwe moraga go kopanya dipitikwe tseo.

Go ne go tlhokega go ya ka mabaka a mantsinyana go aga mokolokolo wa dikgogoropo. Go na le bogodimo jo eleng gore fa kago e tsena mo go jone, e tshwanelwa ke gore e tlhofofadiwe, mme dikgogoropo di dirwa ka tsela e eleng gore e dira gore seno se kgonagale. Ponto du Gard e ne gape e le borogo jwa noka. E le gore bo tle bo kgone go emelelana le merwalela e e maatla, baagi ba ne ba bo dira gore bo kgopame go sekae.

Moragonyana go ne ga dirwa diphetogo dingwe mo mokgweng oo borogo joo bo agilweng ka yone, lemororo seo se ne sa se ka sa itumelelwa ke barati ba borogo joo botlhe. Dipilara tsa jone tse dikima di ne tsa gabiwa gore dikara tsa dipitse di tle di kgone go kgabaganya, mme gape erile mo lekgolong la bo 18 la dingwaga, bo ne jwa atolosiwa mo matlhatlaganyaneng a jone a ntlha. Erile dingwaga tse di lekgolo morago ga moo, Mmusimogolo Napoleon III, yo o ileng a buelela tshomarelo ya tlhago ka nako e batho ba neng ba sena sepe le yone ka yone, a bile a kgatlhegela thata gore lefelo leo le babalelwe, o ne a tsaya matsapa otlhe a a tlhokegang gore borogo joo bo shafadiwe.

Batho ba ba fetang dimilione tse pedi ba etela koo ngwaga le ngwaga. Go bo Pont du Gard e kgatlhegelwa mo go kana go a e swafatsa, ka jalo he go na le dithulaganyo tse di dirwang go leka go babalela lefelo leo. Go sa kgathalesege gore bo a go felela kae, se borogo jo bo se bontshitseng ke gore tiro e ka nna se nna foo fa e dirilwe sentle.