Basupi ba ga Jehofa ‘ba Neelwa mo Ditshekong’
BOKERESETE e sa le bo ntse bo ganediwa go tloga tshimologong ya jone. Fa Jesu a ne a neela barutwa ba gagwe ditaelo, o ne a tlhagisa jaana: “Lo itisè mo bathuñ: gonne ba tla lo neèla ditshekoñ, ba tla lo seola mo matluñ a bōnè a thutō; E, lo tla isiwa ha pele ga balaodi le dikgosi ka ntlha ea me, go tla lo nna chupō mo go bōnè le mo go Badichaba.” (Mathaio 10:17, 18) Mo dinageng di le dintsi gompieno, Bogosi bo ganediwa ka ditsela tse di bolalome mo boemong jwa gore bo ganediwe ka go bo kubugela ka pogiso e e matlho mahibidu eo e ileng ya tsoga ka bonako fela morago ga gore Jesu a bolawe. Mo lefatsheng leno le le raraaneng leo re tshelang mo go lone, dikgangkgolo tseo di ileng tsa tsosiwa ke bao ba leng kgatlhanong le jone ga e tlhole e le tse di leng kgatlhanong le mafoko a a molemo a Bogosi fela.
Dikgang Tse Di Amanang le go Fiwa Bana ka Nako ya Tlhalo
Kgotlatshekelo nngwe eo Basupi ba ga Jehofa ba ileng ba isiwa thata kwa go yone ke kgotlatshekelo ya dilo tse di amanang le lelapa. Kwa Austria, Belgium, Canada, Fora, Norway, United States, le kwa dinageng tse dingwe, setlhophanyana sengwe sa bao ba leng kgatlhanong le rona se ile sa leka go dira bodumedi gore e nne jone kgangkgolo fa go dirwa tshwetso mo dikgannyeng tseo di amanang le gore ke motsadi ofe yoo tshwanelang go neelwa bana ka nako ya fa Basupi ba ba ikanyegang ba ga Jehofa ba tlhalwa ke balekane ba bone ba ba sa dumeleng. Batsadi bao eleng Basupi ba ile ba latlhegelwa ke tshiamelo ya go neelwa bana e le fela ka ntlha ya gore e le Basupi ba ga Jehofa.
Mosupi yo mongwe o ne a latlhegelwa ke tshiamelo ya go neelwa morwawe yo o nang le dingwaga di le tharo ebile o ne a bo a thibelwa gore a seka a umaka le go umaka bodumedi ka nako eo a mo etetseng ka yone. Lefapha la Molao la Mokgatlho wa Watchtower le ne la dira boikuelo kgatlhanong le taelo eno mme la latlhegelwa kwa kgotlatshekelong ya boikuelo. E ne ya re morago ga moo la ikuela kwa Kgotlatshekelongkgolo ya Ohio State. Se se itumedisang ke gore, ka April 15, 1992, kgotlatshekelo eo e ne ya dira tshwetso eo e neng e tshegetsa kgololesego ya Mosupi yoo. Dintlha tsa kgotlatshekelo tse di malebana le tshwetso eo tseo di tsereng ditsebe di le 11 e ne ya nna matlhotlhapelo fela mo mosuping mongwe yo go neng go twe ke mankge, yoo tota eleng motho yo o kgaotsweng yoo o iphakang gore ke moithutatlhaloganyo. Kgotlatshekelo e ne ya bolela jaana “o ne a neela bosupi, go ya ka pego ya kalafi eo a e kwadileng, jwa gore Basupi ba ga Jehofa ba le bantsi ba na le bolwetsi jwa tlhaloganyo go feta baagi ka kakaretso. Bosupi jono e ne e le maiteko a a bonwang ke mang le mang a go leka go dira gore go nne le maikutlo a a rileng ka bodumedi jotlhe. . . . Karolo [eno] ya bosupi jo bo bontshiwang ka dipalopalo ga e bolele sepe.”
Kgotlatshekelo eo e ile ya laela gore kgetse eo e sekwe sesha, e bolela jaana: “Motsadi ga a kake a idiwa ngwana e le fela ka ntlha ya gore a se kitla a kgothaletsa ngwana yoo go dumedisa folaga, go keteka malatsi a boikhutso, kana go nna le seabe mo dilong tseo di dirwang morago ga dithuto tsa sekolo. Re fetola ditaelo tse di dirilweng ke kgotlatshekelo eo e neng e seka kgetsi eno tseo di leng malebana le motsadi yo o tshwanelwang go neelwa bana mmogo le tsa go mo etela ka gonne ditshwetso tseno di ne di theilwe ka tsela e e sa tshwanelang mo dilong tseo [motsadi] a di dumelang.” Ka ntlha ya seo, mmè yono o ne a ipelela go nna teng kwa Segopotsong sa loso lwa ga Keresete ka April 17 a na le morwawe kwa Holong ya Bogosi.
Lefapha la Molao la ofisi ya lekala la Canada la Mokgatlho wa Watch Tower le na le dikgetsi tse pedi jaanong tseo di santseng di emetse go sekwa fa pele ga Kgotlatshekelokgolo ya Canada tseo le tsone di leng malebana le yone kgang eno. Lekala la Austria le ile la nna le seabe mo phenyong e e jesang kgakge mo kgetsing nngwe eo e neng e sekelwa fa pele ga Komisi ya Ditshwanelo tsa Batho ya Yuropa. Mo godimo ga moo, Belgium, Fora, le Norway di ile tsa bega diphenyo tseo di ileng tsa nna le tsone mo dikgetsing tseo di neng di sekelwa kwa kgotlatshekelo tsa Basupi bao ba neng ba tsenngwa kgoro tsotlhe mo dikgetsing tse dingwe tseo di neng di amana le gore ke motsadi ofe yo o tshwanetseng a neelwa bana tseo selo se se neng se tlhaselwa segolobogolo mo go tsone e neng e le bodumedi. Mo lekgetlong lengwe le lengwe mo go ano, jaaka fa Jesu a boletse, seno e ile ya nna bosupi eseng mo kgotlatshekelong fela le mo babueleding mme gape le mo merafeng go tswa mo dikgannyeng tseo di phasaladitsweng ke metswedi ya dikgang.
Kgang ya Madi
Selo se sengwe seo Basupi ba tlhaselwang ka sone ke kgang ya madi. Go sa kgathalesege diphenyo tseo di nnileng teng malebana le kgololesego ya bodumedi le go gololesega ka namana ga Basupi ba ga Jehofa kwa Dikgotlatshekelongkgolo tsa kwa Florida, Illinois, Massachusetts, le New York ebile gape go sa kgathalesege maiteko ao a dirwang go sa kgaotswe ke Ditirelo tsa Tshedimosetso ya Dikokelo le ke dikomiti di le dintsi tsa botsereganyi tsa Basupi ba ga Jehofa go ralala naga, kgang eno e e sa jeseng di welang e tswelela pele e ntse e tsosa tlhogo gangwe le gape. Lefa go ntse jalo, batlhokomedi ba tsa kalafi ba amogela bosupi, mme ebile dikokelo dingwe di leka gore di itse ka bonako le ka phepafalo gore ke balwetsi bafe bao eleng Basupi ba ga Jehofa.
Boemo jwa Mosupi mongwe wa Mojapane wa kwa California malebana le madi bo ne jwa tlotliwa ke kgotlatshekelo ya kwa San Diego. O ne a tlhaselwa ke bolwetse jwa go ruruga ga ditshika tsa boboko tsa madi mme o ne a idibala. Karata ya gagwe ya Medical Directive eo e neng e saennwe sentle mmogo le bosupi jwa ngaka nngwe ya malwetse a bana eo e neng e ile ya mmotsa dipotso tse dintsi malebana le kgang eno ya madi ka nako ya fa a ne a kopana le ngaka eno ya malwetsi a bana mo tirong ya ka ntlo le ntlo bo ne bo lekane go ka tlhatswa moatlhodi pelo gore Mosupi yono yoo a neng a idibetse a ka bo a ile a seka a amogela madi kafa tlase ga maemo le fa e ka nna afe.
Kgetsi ya kwa Long Island eo mo go yone Mosupi mongwe a neng a golegwa a bo a tshelwa madi mme monna wa gagwe ene a bo a tshwarwa a isiwa kgolegong e ile ya isiwa kwa Kgotlatshekelong E Kgolo ya New York ke Lefapha la Molao la Mokgatlho wa Watchtower. Go ne ga bonwa taelo eo e emelang ditshwanelo tsa motho ka namana tsa Basupi ba ga Jehofa, mme kgetsi eno jaanong e tswelela mo kgatong ya seo se dirwang pele ga e sekwa kwa kgotlatshekelong ya selegae. Kgetsi e e tlhatlhetsweng mo boemong jwa ngwana wa dingwaga di le 16 mmogo le mmagwe kwa kgotlatshekelong ya feterale kwa Atlanta e gaufi le go sekwa. Mosimanyana yono o ne a golegwa mme a bo a tshelwa madi ka diura tse robedi. Tsheko ya go bona taelo ya kgotlatshekelo eo e letlang mokgwa ono e ne ya tshwarelwa mo kokelong mme ya bonwa mosimane yono kana mmaagwe ba sa itse sepe ka yone. Go na le dikgetsi tse dingwe di le mmalwa tseo di santseng di emetse go ya kwa dikgotlatshekelong tsa boikuelo le tse disha tseo di tsogang letsatsi le letsatsi. Go bonwa phenyo mo dintweng tseno, mme lefa go ntse jalo ntwa ya go lwela ditshwanelo tsa batho ga e ise e fele. Basupi ba ga Jehofa ba lebeletse kwa go Jehofa Modimo gore a tlhatswe molao wa gagwe leina o o malebana le kgang eno, ka nako ya gagwe e e tshwanetseng.
Fa e sale go tloga ka 1943 ke Basupi ba ga Jehofa ba sekae fela bao ba ileng ba isiwa kwa dikgotlatshekelo kwa United States e le ka ntlha ya kgang e e amanang le go rera. Lefa go ntse jalo, beke le beke Mokgatlho wa Watchtower o amogela palo e e seng kana ka sepe ya megala le makwalo a a tswang kwa ditlhopheng tsa bagolwane ba kopa thuso ka nako eo Basupi ba ga Jehofa ba rakanang le mathata ka yone mo bodiheding jwa bone jwa phatlalatsa. Mo pegong e nngwe e e tswang kwa nageng ya Washington dilo di ne tsa tsamaya ka tsela e e tshegisang. Mong wa ntlo yoo a neng a tuka bogale o ne a lotlelela setlhopha sengwe sa Basupi mmogo le koloi ya bone mo jarateng ya gagwe eo e neng e ageletswe ka legora la terata mme a bo a bitsa mapodise. Ereka a ne a tsositse modumo ka bogale le go ba tshosetsa ka gore o tla ba itaya ba ne ba leta ka botlhale mo teng ga koloi ya bone. Ka nako ya fa koloi ya mapodisi eo e golagantsweng ka mogala le ntlokgolo ya bone e goroga, mo boemong jwa gore ba tshware Basupi ba ba tshwarela go sutlhelela moo, mapodise a ne a ba leboga. O a bona ntlha ke gore, mapodise a ne a belaela gore mong yoo wa ntlo e ne e le motshabi, mme lefa go ntse jalo ba ne ba ntse ba sa kgone go ka tsena moo a nnang teng moo go ka tlhomamisa seo. Jaanong ereka a ne a ba laleditse go tla moo a nnang teng, ba ne ba tlhotlhomisa ka ene mme ba mo tshwara mmogo le mosadi yoo a neng a nna le ene ba ba isa kgolegelong, mme Basupi bone ba tswelela pele ka tiro ya bone ya go rera le go ruta.
Maemo a bontsha gore go santse go na le dintwa tse dingwe tsa semolao tseo di tlileng go lowa go lwelwa dilo tseo di amanang le Bogosi. Mokgatlho wa Watchtower o itumelela kgatlhego eo Basupi go dikologa lefatshe ba nang le yone mo go seno mmogo le tsela eo ba amegileng ka yone le go rapelela gore Jehofa a re kaele le go re tsamaisa fa re tshwaragane le dikgang tsa semolao tse di raraaneng tseo re rakanang le tsone gompieno fa re ntse re dira tiro ya Modimo. Jehofa o ne a bolelela morafe wa Iseraele gore o ne o se kitla o fenya Lefatshe la Tsholofetso ka nako e le nngwe fela mme gore go na le moo ba ne ba tla le fenya “ka bonya ka bonya.” (Duteronome 7:22, NW) Kgatelopele eo e dirwang malebana le ditshwanelo tsa batho ba gompieno ba ga Jehofa le yone e ntse fela jalo; ba dira kgatelopele ka bonya ka bonya. Mme lefa go ntse jalo go sa kgathalesege gore a ba a fenya kana ba a latlhegelwa, ke selo se se tlhomameng gore nako le nako fa batho ba ga Jehofa ba isiwa fa pele ga babusi, dikgosi, dikgotlatshekelo, kana fa pele ga ga ope fela, seo se fetoga bosupi mo go bone mmogo le mo merafeng.
Mo isagweng e e fa gaufi Jehofa o tla tlhatswa leina la gagwe ka botlalo eseng fela mo dikgannyeng tseo di amanang le madi le go neelwa bana ka nako ya tlhalo mme gape le mo kgannyeng ya semolao eo e amanang le bolaodi jwa gagwe jwa lebopo lotlhe. Mme he batho ba gagwe ba tla bona boikhutso go tswa mo go botlhe bao ba leng kgatlhanong le bone le go nna le boipelo jo bogolo kafa tlase ga puso ya Bogosi—ka gonne Jehofa o rata tshiamiso.—Pesalema 37:28.
[Mafoko a setshwantsho mo go tsebe 21]
Mosimanyana yono o ne a golegwa mme a tshelwa madi ka diura di le robedi