Thusa Bana ba Gago Go Emelana le Go Sulafala Maikutlo

“Bana ba le bantsi ga ba ke ba fitlhela ope mo gae—ka sebele kana ka maikutlo—ka nako ya fa go tlhokega gore ba bue.”—Depression—What Families Should Know.

LELAPA le biditswe sentle go twe ke laborothari ya maikutlo. Ke lefelo la patlisiso le ngwana a lekeletsang ditumelo tsa gagwe, a bo a lebelela ditlamorago, mme a bo a simolola go dira ditshwetso dingwe ka botshelo. Batsadi ba ka tlhomamisa jang gore bana ba direla ditekeletso tseo tse di botlhokwa mo maemong a a siameng e seng a a bakang matshwenyego?

Reetsa

Buka e go tweng The Child in Crisis e kgothatsa batsadi jaana: “Tswelelang ka go buisana le ngwana.” Puisano gareng ga motsadi le ngwana e tshwanetse go nna teng jaaka mogomotsi, bogolo jang fa e le gore go diragetse sengwe se se hutsafatsang mo lelapeng. O seka wa tsaya fela gore go bo ngwana a didimetse go raya gore ga a amega ka tsela e e masisi kana gore o amogela seemo. O ka nna a bo a hupeditse tlhobaelo mme a a swa senku, jaaka go ile ga dira mosetsanyana mongwe wa dingwaga tse supa yo o neng a oketsega mmele ka dikilogarama di le 15 mo dikgweding di le thataro morago ga gore batsadi ba gagwe ba kgaogane.

Lefoko “puisano” le bontsha gore batho ba babedi kana go feta ba tshwere kgang. Ka jalo, ga go a tshwanela gore motsadi e nne ene a buang a le nosi fela. Rick le Sue ba ne ba kopa kgakololo fa morwa wa bone wa dingwaga tse thataro a ne a simolola go tlhoka maitseo fela thata mo gae. Morago ga go kopana le lelapa lotlhe, mogakolodi o ne a lemoga sengwe. O ne a re, “Batsadi ba ne ba sekaseka sengwe le sengwe ka boteng, ka ditlhaloso tse ditelele mme gantsi di feteletse. Mo godimo ga moo, batsadi ba ne ba na le go bua ba le nosi ba sa fe bana sebaka, mme ke ne ke kgona go bona bana ba fela pelo.” Go na le mosola go letlelela ngwana go bua mafatlha a gagwe. (Bapisa Yobe 32:20.) Fa a ka seka a kgona go bua ka mathata a gagwe a santse a simologa, o ka nna a a supa ka boitshwaro jwa gagwe mo nakong e e tlang.—Bapisa Diane 18:1.

Puisano e botlhokwa fa go tlhokega kwatlhao. Ngwana o ikutlwa jang ka kwatlhao eo? A o tlhaloganya gore ke eng fa e dirwa? Go na le go bolelela ngwana gore o tshwanetse go ikutlwa jang, leka go utlwa gore ke eng se se mo pelong ya gagwe. Mo fe mabaka gore a thusege go dira tshwetso e e tshwanetseng. Elaine Fantle Shimberg o kwadile jaana, “Mo fe kgakololo e e tla dirang gore a e akanyetse, mme lefa go ntse jalo o mma ngwana wa gago e nne ene a e tšhotlhe.”

Se mo Thibele go Ntsha Maikutlo

Batsadi ba bangwe ba thibela puisano ka go bua mafoko a a tshwanang le: “Didimala.” “Ga o a tshwanela go ikutlwa ka tsela e e ntseng jalo.” “Ga go maswemaswe mo go kalo.” Go botoka thata go lesa ngwana go ntsha maikutlo a gagwe. “Ke bona o ka re sengwe se go hutsafaditse.” “O lebega o kgopisegile fela thata.” “Ke a itse gore o tshwanetse go utlwa botlhoko.” Seno se tla dira gore le tswelele pele le ntse le buisana.

Buka e go tweng How to Talk so Kids Will Listen & Listen so Kids Will Talk e bua sengwe se se utlwalang ka seno: “Fa o leka ka thata go latlhisa ngwana wa gago maikutlo a a seng monate, o dira gore a a kokomele le go feta. Fa o amogela maikutlo a a seng monate motlhofo fela, o dira gore go nne motlhofo mo ngwaneng gore a a latlhe. Ke gore o ka nna wa re gore o tle o nne le lelapa le le itumetseng, o tshwanetse go ikemisetsa go reetsa dingongorego tsa go sa itumele di le dintsi.”—Bapisa Moreri 7:3.

Nna Kutlwelobotlhoko

Mary Susan Miller o kwadile jaana, “Ereka bontsi jwa batsadi ba leba botshelo jwa ngwana ka seemo sa bone, go thata gore ba akanye ka botshelo bo sele jo bo nang le matshwenyego fa e se jwa bone fela.”

Ee, batsadi ba lebala ka bonako kutlobotlhoko le ditlhobaelo tsa bone fa ba santse ba gola. Ka lebaka leo, gantsi ga ba tseye go sulafala maikutlo ga bana ba bone ka masisi. Batsadi ba tshwanetse go gakologelwa gore go ne go ntse jang fa ba ne ba swetswe ke seruiwa, ke tsala, lefa ba ne ba fudugela go sele. Ba tshwanetse go gakologelwa dipoifo tsa bone fa ba santse ba le bannye, le tse di neng di sena tlhaloganyo tota. Go gakologelwa dilo go dira gore o nne kutlwelobotlhoko.

Tlhoma Sekao se se Siameng

Tsela e ngwana wa gago a tla dirisanang ka teng le go sulafala maikutlo go ikaegile thata ka tsela e le wena o dirisanang le one ka yone. A o leka go fokotsa go sulafala maikutlo ka go thubakanya? Jalo he o seka wa gakgamala fa ngwana wa gago a bontsha tlhobaelo ya gagwe ka tsela e e tshwanang le eo. A o swa senku fa o tshwenyegile thata? Jaanong o ka batla jang gore ngwana wa gago a bue a bulegile le go go ikanya? A maikutlo a a sulafetseng a mo lelapeng la gago a fitlhiwa mo eleng gore a a lojwa go na le gore go amogelwe gore a teng mme a rarabololwe? Mme he o seka wa gakgamadiwa ke mathata a go ka nnang ga a tsalela ngwana wa gago mo mmeleng kana mo maikutlong, ka gore maiteko ape a go leka go fitlha tlhobaelo ka tlwaelo a a e oketsa.

Go godisetsa bana mo lefatsheng le le bakang go sulafala maikutlo thata go leretse batsadi kgwetlho e e kgethegileng. Go ithuta Bibela go ile ga thusa ba le bantsi go lebagana le dikgwetlho tseo. Seo ke se re ka se solofelang, ereka Mokwadi wa Bibela ebile e le ene gape Mosimolodi wa botshelo jwa lelapa. Jesu Keresete o ile a re, “Botlhale jwa Modimo bo itshupa ka ditiro tsa jone gore bo siame.” (Mathaio 11:19, The New English Bible) Ka go dirisa melaometheo ya Bibela, batsadi ba tla lemoga gore Dikwalo di “molemō go ruta, le go kgalemèla, le go shokolola, le go kaèla ka tshiamō.”—2 Timotheo 3:16.

[Setshwantsho mo go tsebe 27]

Puisano e e agang e imolola matshwenyego

[Setshwantsho mo go tsebe 28]

Mosimanyana o tsholola mashi, mogolowe o a mo tshega, mme rraagwe ene o a mo gomotsa ka go itse gore ke ngwana