Kgopolo E E me Bibeleng
Kgomotso mo Mahutsaneng a Gago
“BOHUTSANA BO RE DIRA BANA GAPE ROTLHE—BO NYELETSA DIPHAROLOGANO DIPE TSA BOTLHALE. BATHO BA BA BOTLHALE GO GAISA BA BANGWE GA BA ITSE SEPE.” —RALPH WALDO EMERSON, MMOKI LE MOKWADI WA DIPOLELO WA LEKGOLO LA BO 19 LA DINGWAGA WA MOAMERIKA.
LEBOLELA la loso ga se fela gore le utlwisa ba ba salang botlhoko mme gape le a ba gamaregisa—monna, mosadi, rre, mmè, morwa, morwadi, kana tsala. Batho ba ba botlhale ba ka nna ba botsa dipotso mme ba tlhoka dikarabo tse di gomotsang, ba ba nonofileng ba ka nna ba lela ka ntlha ya bohutsana mme ba tlhoka nametso. Babadi ba Bibela ba ka nna ba gakologelwa go bokolela ga ga Dafide fa Abesalome wa senokwane a sena go bolawa: “Abesalome, morwaake wè! Abesalome, morwaake wè! A bo ke ka bo ke gu shwetse, Abesalome, morwaake wè! morwaake wè!” (2 Samuele 18:33) Seno e ne e se selelo sa kgosi e lelela motsuolodi; e ne e le selelo sa ga rre a lelela morwawe yo o suleng. Gongwe le wena o kile wa ikutlwa ka tsela e e tshwanang le eo fa o ne o hutsafetse.
Ka nako ya fa o hutsafetse, dipotso tse di tshwenyang di ka nna tsa tla ka makatlanamane mo mogopolong wa gago. ‘Ke eng fa go ne go diragala? A Modimo o ne o itse gore go tla diragala? Fa e le gore o ne o itse, ke eng o ne o sa go thibele?’ Lefa e le gore motho o itse Bibela sentle mme a itse gore baswi ba tla tsosiwa, dipotso tse di tshwenyang di ka nna tsa tlhoka gore a tlhatlhanye ka boteng gore a gomotsege.
Dikarabo tse di phoso ga di kgotsofatse ka boammaaruri, fa e se kgomotso ya maaka fela. Go bolelelwa gore ‘Modimo o ne o tlhoka moratiwa wa gago’ gantsi go dira gore motho a hularele Modimo ka ntlha ya go tenega. Boammaaruri, jaaka bo ntse mo Bibeleng, bo araba dipotso tsotlhe ka bohutsana mme bo dira gore motho a atamalane le Jehofa Modimo, go na le go mo kgoromeletsa kgakala le ene. Mo go 2 Bakorintha 1:3, 4 re tlhomamisediwa gore ke Rara wa mautlwelobotlhoko a manana le Modimo wa kgomotso yotlhe.
Kitso le Nonofo ya Modimo di Tekatekanyo
Jehofa, Mothatayotlhe, o itse sengwe le sengwe se se diragalang mo popong ya gagwe e kgolo. Pesalema 11:4 e re tlhomamisetsa jaana: “Yehofa, setulō sa gagwè sa bogosi se mo legodimoñ; matlhō a gagwè a lebile bana ba batho.” Mo go Bahebera 4:13 moaposetoloi Paulo o ne a kwala jaana: “Ga go na sebopiwa sepè se se sa bōnatshegeñ mo matlhōñ a ōna.” Ga se fela gore Modimo o a itse mme gape o a amega! Jesu o ne a re: “Dithaga di le pedi ga di rekwe ka bontlha ñwe yoa peni? me epè ea cōna ga e ke e wèla ha hatshe [Rraeno a sa itse]: . . . lo tlhwatlhwa e kgolo bogolo go ea dithaga di le dintsi.”—Mathaio 10:29, 31.
A Modimo o ne o ka kgona go thibela loso lwa tshoganetso lwa moratiwa mme ka jalo le bohutsana jo le bo tlisang? Ee, o ne a ka kgona. Jesu o ile a re: “Mo Modimoñ dilō cotlhe di ka dihala.” (Mareko 10:27) Bogologolo tala, Jehofa o ne a utlwa thapelo ya ga Hesekia yo o neng a le gaufi le go swa mme a mo fodisa a bo a mo okeletsa dingwaga tsa botshelo. (Isaia 38:2-5) Ga go belaetse gore Jehofa o ka kgona go dira sengwe le sengwe se a eletsang go se dira, mme lefa go ntse jalo re tshwanetse go tlhaloganya mo gontsi ka thato ya gagwe. Rotlhe re badile ka batho ba ba neng ba golafetse fela thata kana ba ba neng ba gateletswe ke bolwetsi, mme ba bo ba felela ba tshela. A Jehofa o ne a thusa?
Batho bangwe ba na le dinonofo tse di sa tlwaelesegang tsa go fola le keletso e kgolo ya go batla go tshela. Seno e ka nna sone lebaka la go fola ga bone mo o ka reng ga dikgakgamatso. Kana mokgwa mongwe o mosha wa kalafi o ka nna wa bo o atlegile. Ka jalo, re se ka ra swetsa ka bonako fela gore Jehofa o ne a ba thusa.—Bafilipi 4:13.
Lefoko la Modimo le Tlhalosa Gore ke Eng fa Batho baa Swa
Mo go Baroma 5:12, moaposetoloi Paulo o re tlhalosetsa motlhofo fela gore rraaronamogolo e bong Adame o ne a tsuologela Mmopi wa gagwe mme a atlholelwa loso ka tshwanelo. E re ka re le dikokomana tsa gagwe, re baleofi e bile re tshwanetswe ke loso nako nngwe le nngwe fela. Ga re na tshepo ya go tshelela ruri. Kgosi Solomone yo o botlhale o tlhalosa sentle gore metlha le dipaka tse di sa solofelwang di wela mongwe le mongwe ka nako nngwe le nngwe, e ka ne e le kotsi e e masisi kana bolwetsi jwa go lwalela loso. Kana motho o ka nna a tsholwa ka bolwetsi jo bo ka nnang jwa khutshwafatsa botshelo jwa gagwe. Solomone gape o tlhalosa gore mo Modimong go na le nako le motlha wa sengwe le sengwe. Modimo o tlhomile nako ya go alafa, e seng motho a le mongwe kana ba sekaenyana fela, mme e leng batho botlhe ba ba dumelang ka nako ya puso ya ga Keresete Jesu.—Moreri 3:1; 9:11; 1 Bakorintha 15:25, 26.
O se ka wa lebala boammaaruri jono jo bo tlhamaletseng: Bakeresete le bone ba amiwa ke matlhotlhapelo a a wetseng setho mme ka jalo le bone ba tla diragalelwa ke dilo tse di diragalelang setho ka kakaretso. “Diteko tse o ileng wa di itshokela ke tse ka tlwaelo di diragalelang batho.”—1 Bakorintha 10:13, The Jerusalem Bible.
Nako ya go Gomotsega
Loso le lere selelo le nako ya go rapela Jehofa ka tlhoafalo, yo e leng Moutlwi wa thapelo. Ke nako e e di gaisang tsotlhe ya go atamalana le Modimo. Eno ke nako ya go rapelela temogo ka pelo yotlhe, le go nna le nonofo ya go tlwaelana le seemo se sesha. Bibela e re kgothaletsa go dira jalo. Petere a re: “Lo nntse lo latlhèla tlhobaèlō eotlhe ea lona mo go ōna, ka oa lo babalèla.” (1 Petere 5:7) A bo mafoko a Modimo a a mo go Isaia 57:15 a gomotsa jang ne: “Go bua yana Èna eo o godimo, eo o godileñ thata, eo nntseñ mo Bosakhutleñ, eo leina ya gagwè e leñ Boitshèpō: a re, Ke agile mo heloñ ga godimo, le ga boitshèpō, le gōna ke nna le èna eo o mōea o o ñomogileñ.” Motho yo o moya o ngomogileng o ngaparela Rara; go nna le katamalano e e neng e ise e ko e nne teng go le pele. Jakobe o kwala jaana: “Atamèlañ Modimoñ, me o tla lo atamèla.” (Yakobe 4:8) Jakobe o re tlhomamisetsa gore Modimo o rata go re fa botlhale jo bo tlhokegang le nonofo gore re kgone go gomotsega.
Gapegape, o tla lemoga gore o tla nna motho yo o kutlwelobotlhoko fa ba bangwe ba le mo ditekong le mo mathateng. O tla itse mo gontsi kafa batho ba ikutlwang ka teng le kafa o ka buang le bone mafoko a kgomotso le tsholofelo ka teng. O ka nna wa kgona go thusa motho yo o hutsafetseng mo mahutsaneng a gagwe. Ee, o tla kgona go tlhomogela ba bangwe pelo botoka fa ba le mo tlalelong.—Bafilipi 2:1.
Go swelwa ke moratiwa go ka utlwisa botlhoko ka nako e e rileng, gongwe e bile ka nako e telele. Lefa go ntse jalo, go ka nna ga go dira gore o tlhatswege pelo ka tsholofelo e e tla tlogang e tla, tsholofelo ya go direla Modimo go se na se se utlwisang botlhoko. Re ka nna ra bo ra nonotsha botho jwa rona jwa Bokeresete.—1 Petere 1:6, 7.
Ka jalo, le ntswa khutsafalo e le botlhoko o se ka wa ineela! A e nne maikaelelo a gago gore o tla tswelela o direla Modimo ka boikanyegi, o mo galaletsa le go mo tlotla le gore o tle o bone poloko ya bosakhutleng.
[Motswedi wa Setshwantsho mo go tsebe 29]
The Day Before Parting by Jozef Israels: Gift of Alice N. Lincoln, Courtesy, Museum of Fine Arts, Boston