Ntwa Kgatlhanong le Dikotsi Tsa Masetlapelo e Fentswe
RURI Lekgotla la Ditšhaba Tse di Kopaneng le dipuso tse di farologaneng di tshwanelwa ke go akgolelwa maiteko a tsone a go fokotsa tshenyo ya dikotsi tsa tlholego. Diporojeke tse di tshwanang le International Decade for Natural Disaster Reduction di supa gore motho ga a tshwanela go itlhoboga fa a lebane le masetlapelo a a ntseng jalo. Fa batho ba ba mo tikologong nngwe le nngwe le dipuso tsa bone ba tsaya dikgato tse di tshwanetseng, matshelo a ka bolokiwa.
Seno se a kgatlha gonne Baebele e re bolelela gore puso e e okametseng batho e tloga e fetolwa. Fa e sale go tloga mo metlheng ya ga Jesu, Bakeresete ba ile ba rapela Thapelo ya Morena (ya “Raetsho”), e e nang le polelwana e e reng: “Bogosi jwa gago a bo tle. Go rata ga gago a go dirwe mo lefatsheng jaaka kwa legodimong.” (Mathaio 6:9, 10) Bogosi jwa Modimo ke puso tota. Boperofeti jwa Baebele bo bolela gore bo tla tloga bo “thubaganya bo nyeletsa magosi ao otlhe [a batho], mme bo tlaa ema ka bosakhutleng.” (Daniele 2:44) Akanya fela batho ba busiwa ke puso e le nngwe e e itekanetseng. A bo seo e tla bo e le phetogo e kgolo jang ne!
Fa dipuso tsa motlha ono di bona go le botlhokwa gore di tseye dikgato tsa go thibela dikgoreletsi tsa tlholego gore di se ka tsa nna dikotsi tsa masetlapelo, re ka tlhomamisa gore puso ya Modimo e tla tlhomamisa gore babusiwa ba yone ga ba kitla ba boga ka tsela eno. Bogosi jwa Modimo bo tla tlisa kagiso e e tla nnelang ruri mo polaneteng eno e le la ntlha fa e sale Kaine a bolaya Abele. Mo Bogosing joo, “bapelonomi ba tlaa rua lefatshe; ba tlaa inatefisa mo letlotlong la kagiso.” (Pesalema 37:11) Bogosi bo tla ruta batho ka tsela ya gore eleruri ‘botlhe ba tla bo ba rutilwe ke Jehofa; mme kagiso ya bone e le kgolo.’—Isaia 54:13.
Gompieno, batho ba bantsi ba ba amiwang ke dikotsi tsa masetlapelo ke ba ba humanegileng. Lefa go ntse jalo, batho ga ba kitla ba tlhola ba boga ka ntlha ya khumanego mo Bogosing jwa Modimo gonne ba tla bo ba okametswe e bile ba rutiwa ka tsela e e tshwanetseng. Moperofeti Isaia o ne a kwala jaana fa a ne a bolelela pele ditiragalo tse di ntseng jalo ka tsela eno e batho ba motlha wa gagwe ba neng ba tla di tlhaloganya ka yone: “Mo thabeng e, Jehofa wa masomosomo o tlaa baakanyetsa ditšhaba tsotlhe modiro wa dilo tse di nonneng, modiro wa majalwa a mafine a a itshekileng, wa dilo tse di nonneng tse di tletseng moko, wa majalwa a a itshekileng a a tlhotlhegileng sentlentle.” (Isaia 25:6) Ee, moletlo wa dilo tse di monate! Mopesalema o ne a kwala jaana fa a tlhalosa kafa botshelo bo tlileng go nna ka teng mo pusong ya Bogosi: “Go tlaa nna letlotlo la mabele mo lefatsheng, mo ditlhoeng tsa dithaba; loungo lwa one lo tlaa ebelega jaaka Lebanone; mme ba e leng ba motse ba tlaa kgaba jaaka bojang jwa lefatshe.”—Pesalema 72:16.
Go phepafetse gore motho o tla bo a sa tlhole a tlhoka go lwa le dikotsi tsa tlholego. Batho ba ba boifang Modimo ba ba kaelwang ke moya wa Modimo le ba ba kaelwang ke Bogosi jwa Modimo ba tla bo ba fentse ntwa eo. A kgololesego ruri!