Basha ba Botsa Jaana . . .

A go Nna Tsala ya Modimo go Tla Nthusa?

BASHA ba bantsi gompieno ba golela mo maemong a a ngomolang pelo a kokomana e e fetileng e neng e ka ganela gore a ka nna teng. Bakwadi ba patlisiso nngwe ya bosetšhaba e e neng ya dirwa mo basheng ba le 160 000 ba ne ba tlhalosa jaana: “Bana ba dingwaga tsa bolesome ba re bolelela gore dilo tse di ba tlhakatlhakanyang thata ke kgatelelo e ba ikutlwang ba sa kgone go e itshokela; ba kgobega marapo le go hutsafala ka ditsela tse di dirang gore ba se ka ba itshepa; le batsadi ba ba itlhokomolosang mathata a bone.” Le wena o ka tswa o ikutlwa gore batho ba bangwe ga ba tlhaloganye kafa botshelo jwa mosha bo ka nnang botlhoko ka teng.

Gone mme, o ka tswa o na le tsala e o atamalaneng thata le yone e o ka yang kwa go yone fa o tshwenyegile maikutlo e bile seno se ka go thusa. Mme gone a ga go boammaaruri gore go na le mathata mangwe a a utlwisang botlhoko thata a o tshwanetseng wa lebana le one o le nosi? A bo go le boammaaruri jang ne ka dinako dingwe gore “pelo e ikitse bogalaka [jo e leng mo go jone].” (Diane 14:10) Mme go na le Mongwe yoo a go tlhaloganyang tota e bile o batla go nna tsala ya gago. Basha ba bantsi ba ile ba fitlhela gore botsala jwa gagwe bo thusa thata mo dinakong tsa matlhotlhapelo.

Go Nna Tsala ya Modimo

Mosha mongwe o ne a bodiwa gore ke eng se a se lebogelang Jehofa Modimo thata. O ne a araba jaana: “Ke gore re ka kgona go mo itse le go nna ditsala tse di ntshanang se inong le ene.” Ee, go a kgonega gore re nne le botsalano jo bo molemo thata mo lobopong! Mopesalema o ne a kwala jaana: “Ba ba boifang Jehofa e nna ditsala tse di atamalaneng thata le ene.”—Pesalema 25:14, NW.

“Go atamalana le Jehofa”—a bo e le tshono e e botlhokwatlhokwa jang ne! Lefoko la ntlhantlha la Sehebera le na le kgopolo ya puo e e tlhamaletseng, go bulela motho yo e leng tsala e e kgethegileng mafatlha a gago. Ka jalo, ke botsalano jo bo atamalaneng thata joo bo thailweng mo loratong, katamalano e e kgethegileng e e nnang teng ka ntlha ya go tshepana. Jaaka tsala ya Modimo, o kgona go ikutlwa gore se o leng sone tota jaaka motho se tseelwa kwa godimo ke mongwe yo o go tlhaloganyang tota. Mme ke melemo efe e o e bonang mo botsalanong jono?

‘O Boikanyo Jwa me go Tloga Bokaung Jwa Me’

Basha ba bantsi, le mororo ba lebega ba le pelokgale, ga ba itshepe. “Ke a tle ke bolele kgopolo ya me mme mongwe a bo a tla ka ya gagwe a fetola ya me gotlhelele,” go ne ga ngongorega jalo Judy wa dingwaga tse 13. “Tota ga ke itshepe.” Lefa go ntse jalo, Tsala ya rona ya selegodimo e dirisa Lefoko la yone le le kwadilweng e leng Baebele go re kaela ka tsela e e tlhamaletseng gore re kgone go atlega mo botshelong. E bile tota, kgakololo e e kwadilweng mo bukeng ya Baebele ya Diane e ne e kwaletswe go naya “motho wa lekau kitso le pharologanyo,” gore a kgone go tlhamalatsa ditsela tsa gagwe. (Diane 1:1-4; 3:1-6) Seno se ka dira gore o itshepe! O ka itse tsela e e gaisang ya go tshela.

Baebele, mmogo le dilo tse di thusang go bala Baebele tse di jaaka makasine ono, di re gakolola mo tseleng nngwe le nngwe ya botshelo—kafa o ka tlhophang ditsala ka gone le kafa o ka lebang batsadi ba gago ka gone. (Diane 1:8, 9; 13:20) Botlhe ba ba reetsang kaelo eo ba ka “tlogela diru tsa loso.” (Diane 14:27) Ka sekai, mosetsana mongwe yo o bidiwang Mae o ne a bona morwadiarraagwe a nyatsa melaometheo ya Baebele. O ne a swa botlhoko a sa le mmotlana ka ntlha ya boitsholo jo bo sa siamang. Mae o ne a tlhalosa kafa a neng a kgona ka teng go gana go dira boitsholo joo jo bo sa siamang: “Ke kgona go gakologelwa melaometheo ya ga Jehofa ya boitsholo jo bo sa siamang ka phepafalo, mme seo se a nnonotsha. Melaometheo eno e nthusa go bona gore Jehofa ke wa mmatota le gore tsela ya gagwe e di gaisa tsotlhe.”

Lefa go ntse jalo, go nna tsala ya ga Jehofa go akaretsa se se fetang go ithuta melao ya gagwe. O ka kgona go iponela ka bowena gore o kgatlhegela botshelo jwa gago. Baebele e bolela kaga Kgosi Dafite, yo Modimo o neng wa mo ruta a santse a le mosha. Dafite o ne a nna tsala ya Modimo, mme le mororo a ne a na le “ditlalelo di le dintsi,” totatota o ne a bona gore Modimo o ne o mo thusa mo botshelong jwa gagwe. Dafite o ne a bua ka ‘ditiro tse di gakgamatsang’ tsa Modimo le kafa “nonofo” ya gagwe e neng e dira ka teng mo botshelong jwa gagwe. Dafite o ne a kwala jaana ka ntlha ya dilo tseo tse a neng a di direlwa ka namana: “O tsholofelo ya me, Jehofa, Modimo; o sa le o nna boikanyo jwa me le mo bokaung jwa me.” (Pesalema 71:5, 17, 18, 20; mokwalo o o sekameng ke wa rona.) Le wena o ka tshepa Jehofa jalo fa o ntse o lemoga gore o a go segofatsa mo botshelong. Fa o ntse o leka ka natla go sala dikaelo tsa gagwe morago—le mororo go na le dilo tse di go kgoreletsang—ruri o tla bo o tsamaya le Modimo o le tsala ya one ya botlhokwa.—Bapisa Genesise 6:9.

Modimo o re Thusa go Latela Tsela e e Siameng

Go latela dikaelo tsa Modimo ga go motlhofo ka gore mo botshelong go na le dithaelo le dikgatelelo. Go ne go ntse fela jalo ka Peggy, yoo mo bosheng jwa gagwe a neng a dirisa diokobatsi e bile e le seaka. O ne a kgona go tlogela dilo tse di mo tshwakgotseng a bo a fetola boitsholo jwa gagwe ka go ithuta Baebele mme ka go dira jalo o ne a kgona go nna tsala ya Modimo. Lefa go ntse jalo, Peggy o ne a tswelela a na le mathata ao pele a neng a lekile go a iphalotsa ka diokobatsi. Fa a ne a bodiwa gore o kgonne jang go nna a nonofile, o ne a araba jaana: “Tota nka bolela fela gore ke ka moya wa ga Jehofa.”

Peggy o ne a itse gore Modimo o naya ditsala tsa one moya o o boitshepo kana maatla a a dirang le gore o kgona go ba nonotsha gore ba tshele ka melao ya gagwe. (Ditiro 5:32; 1 Bakorinthe 6:9-11) Peggy o bolela jaana: “Go na le dinako tse ke ikutlwang ka tsela e nkileng ka bo ke ikutlwa ka yone, segolobogolo fa ke le nosi, mme ke simolola go rapela ka bonako. Fa ke kgona go fenya mathata ano ke go itumelela thata go feta sepe se nkileng ka kgona go se dira mo botshelong jwa me.” A bo go kgothatsa jang ne go itse gore jaaka tsala, Modimo a ka re thusa “go dira segolo thata bogolo go tsotlhe tse re di lopang le tse re di gopolang, ka fa nonofong e e dirang mo go rona.”—Baefeso 3:20.

Moya wa Modimo o re thusa go nna le dinonofo tse di tshwanang le bopelotelele, bonolo le boikgapo. (Bagalatia 5:22, 23) Gape mo diphuthegong tsa Basupi ba ga Jehofa, bagolwane kana badisa ba ba tlhophilweng ke moya o o boitshepo ba tlhomilwe ke Modimo gore ba re thuse ka ditsela tse di molemo. Peggy o oketsa jaana: “Ke ne ka thusiwa thata ke phuthego, segolobogolo bagolwane. Ba ne ba nthusa tota.”

“Thata ya Pelo ya Me”

“Tsala e go rata ka dinako tsotlhe, e nna morwarraago fa o na le mathata.” Go bolela jalo Diane 17:17 mo go The Basic Bible. Tsala e tlhokega thata “fa o na le mathata.” Mopesalema Asafe o ne a tlhakatlhakana maikutlo thata, lefa go ntse jalo o ne a tsalane thata le Modimo. Ka jalo, le mororo ‘pelo ya gagwe e ne e le botlhoko’ ka ntlha ya botlhoko jo a neng a bo utlwa, o ne a re: “Modimo ke thata ya pelo ya me.” (Pesalema 73:21, 26, 28) Jehofa, yoo a neng a tlhaloganya maikutlo a ga Asafe tota, o ne a mo tshegetsa mo maikutlong. Jehofa o ne a tlhotlheletsa Asafe a mo nonotsha gore a se ka a latlhegelwa ke tsholofelo le bopelokgale.

Tsala ya rona ya selegodimo le yone e ka nna motheo wa lefika fa o na le mathata. Mosha mongwe o ne a lemoga seno ka se se neng sa mo diragalela. Fa Bonnie a ne a na le dingwaga tse 13, basetsana bangwe kwa sekolong sa kwa magaeng se a neng a tsena kwa go sone ba ne ba mo senya leina. Bonnie o ne a bona e kete mongwe le mongwe o ne a dumela maaka ao. Bontsi jwa ba a neng a tsena sekolo le bone ba ne ba mo itlhokomolosa, ba mmitsa ka maina a a maswe. “Ke ne ke tlhola ke lela maitsiboa fa ke tsena kwa gae,” Bonnie o ne a tlhalosa jalo. “Ke ne ke ikutlwa e kete nka ipolaya gonne ke ne ke utlwile botlhoko thata.” O ne a leka go batla thuso mo ditsaleng tse dingwe tsa gagwe. “Ke lekile go bua le batho mme ba ne ba lebega ba sa ntlhaloganye. Ba ne ba dira e kete bothata jwa me ga se jwa sepe. Ka dinako tse dingwe ke ne ke ikutlwa e kete ga go ope mo letlhakoreng la me.” Ke eng se se neng sa mo thusa gore a se ka a latlhegelwa ke tsholofelo fa a ne a tlhakatlhakane jaana? O tswelela jaana: “Fa e ne e se ka Jehofa, nka bo ke ipolaile. Ke mo rata thata. Ke tsala ya me e kgolo.” Jaanong o a itse gore botsalano jwa gagwe le Modimo bo mo thusitse gore a itshokele selo se se utlwisang maikutlo botlhoko se se neng sa mo diragalela.

Go itse fela gore Jehofa o tlhaloganya maemo a rona le gore o itse sentle se se diragetseng go gomotsa tota fa batho ba sa go utlwele botlhoko jaaka o lebeletse. Gape, go itse gore Tsala ya rona ke “Rra mautlwelobotlhoko” go thusa thata fa re sa tshwarwe sentle kana re sotliwa. Ka dinako tse dingwe dipelo tsa rona di ka re akantsha gore re bosula, mme ‘Modimo o mogolo go feta dipelo tsa rona, mme o itse dilo tsotlhe.’ (2 Bakorinthe 1:3, 4; 1 Johane 3:20) O ka gomotsega thata fa o itse kgopolo ya ga Jehofa ka kgang nngwe. Ka sekai, mosimane mongwe wa dingwaga tse 13 o ne a sotliwa ke banna ba bararo botlhoko ba tlhakanela dikobo le ene. “Morago ga foo, ke ne ke tlhajwa ke ditlhong e bile ke ipega molato ka se se ntiragaletseng,” o ne a dumela jalo. “Ke ne ke tshwenyegile maikutlo tota.” Ke fa a batlisisa mo dikgatisong tse di thailweng mo Baebeleng tsa Mokgatlho wa Watch Tower ka kgang ya go betelelwa. “Fa ke ntse ke bala tshedimosetso eno ke ne ka lela. Ke ne ka ikutlwa e kete ke rotswe mokgweleo o o bokete. Ke ne ke tlhasetswe. Mme ke ne ka kgona go itshokela nako e e maswe eo ka go ikaega ka Jehofa, lelapa la gaetsho le ditsala.” A bo mafoko a a thailweng mo Baebeleng ao a ne a mo thusa jang ne!

Go nna tsala ya Modimo go thusa ka ditsela tse dintsi! Re ka kgona go itshepa mo botshelong, ra nna le nonofo ya go latela ditsela tsa Modimo ra bo ra bona thuso ya one e e nonofileng jaaka lefika fa re le mo matlhotlhapelong. Mme re ka nna jang le botsalano jo bo ntseng jalo? Setlhogo se se tla tlang mo isagweng sa motseletsele ono se tla tlhalosa.

[Setshwantsho mo go tsebe 13]

Modimo a ka nna ‘thata ya pelo ya gago’