Go Ithutela Baebele mo Teng ga Zuu!

MO NAKONG nngwe e e fetileng re ne ra tlhopha go tshwarela thuto ya rona ya lelapa ya Baebele ya beke le beke mo lefelong le le sa tlwaelegang—e leng mo teng ga Zuu ya Emmen gaufi le legae la rona mo Netherlands. Seno re ne re se dirile ka ntlha ya lebaka le le utlwalang, le o tla tlogang o le tlhaloganya ka bonako fela.

Jaaka malapa a mantsi a Bakeresete go dikologa lefatshe, re na le thuto ya beke le beke ya Baebele. Mo thutong eno gantsi re bala ka diphologolo tse di dirisiwang mo Baebeleng jaaka matshwao a dinonofo tse dintle le tse di maswe. Re ne ra ipotsa gore a re ka kgona go itse diphologolo tseno sentle mme re ne ra swetsa ka gore lelapa le tshwanetse go dira boiteko jwa go dira jalo. Mongwe le mongwe mo lelapeng o ne a abelwa phologolo e e rileng mme a kopiwa go batla tshedimosetso e e oketsegileng ka ga phologolo eno mo dikgatisong tse di tshwanang le Insight on the Scriptures le mo dibolumong tsa The Watchtower le Awake!

E rile fa re atamela mo kgorong ya Zuu ya Emmen, matlho a bana ba rona, e leng Mari-Claire, Charissa, le Pepijn, a ne a tletse boitumelo. Re tlile go bona dikwena, dibera, dipitse tsa naga, ditshoswane, tota gongwe le e leng diphologolo tse dintsi tse re badileng ka tsone mo Baebeleng. Mme santlha, mma re go bolelele ka zuu eno e e sa tshwaneng le epe.

Go ne go Sena Dirubi Lefa e le Dithibedi

Noorder Dierenpark, e leng leina la Zuu ya Emmen ka Se-Dutch, ke zuu e e kgethegileng ya diphologolo, e e dirilweng ka melao ya bosheng. Mono ga o na go fitlhela diphologolo di le mo dirubing kana di tswaletswe ka dithibedi. Go na le moo, mo Emmen sengwe le sengwe se dirilwe ka tsela ya gore diphologolo di nne mo maemong a a batlileng a tshwana le a di nnang mo go one fa di le kwa nageng. “Ke baeti ba ba tswaletsweng ka terata, e seng diphologolo,” go ne ga bua jalo Wijbren Landman, mongwe wa baithutatshelo ba zuu eo, a ntse a nyenya.

“Diphologolo ga di a bewa ka mefuta ya tsone mme di beilwe go ya ka mafelo a di tswang kwa go one. Ke sone se mo karolong eno e e bulegileng thata e o e bonang fano, ya naga e e bojang ya mo Afrika, diphologolo tse dintsi tseno di beilweng mmogo teng ka mokgwa o di nnang ka one kwa nageng.” Ebu, ke tsele re a di bona—diphologolo tse ditelele go feta tsotlhe mo lefatsheng, dithutlwa tse di thamotelele, tse di kgonang go nna boleele jwa dimetara tse thataro. Di na le ditshephe, diphala, dipitse tsa naga, dikgokong, dikukama, tota le ditshukudu di le mmalwa.

Mme Wijbren o santse a tla re bolelela mo go oketsegileng ka ga naga e e bojang ya Emmen: “Diphologolo tseno di na le sebaka se segolo gore di seke tsa ikutlwa di le mo sekhutlwaneng. Lefa go ntse jalo, gape re dirile gore go nne le ditselana tsa go iphalotsa. A lo bona maje a magolo ale? Ditshephe di kgona go iphitlha mo go one gore ditshukudu di se ka tsa di tshwenya. Le thota e e kwa ele e thusa diphologolo go siela kwa lefelong leo di se kitlang di bonana gone. Mme gantsi diphologolo ga di kgone go lemoga gore tse dingwe di na le tsone. Seno ga se gakgamatse, gonne di godile le go nna mmogo mo Afrika ka diketekete tsa dingwaga.”

Dipitse Tsa Naga Tse di Tshwerweng ke Lenyora

“Bona! Dipitse tsa naga!” Charissa o bua a itumetse tota. O ne a dirile dipatlisiso tse di kgatlhang ka ga dipitse tsa naga. “Methalo ya dipitse tsa naga e fetola tebego ya tsone ya mmele fela thata mo e leng gore gantsi le banni ba lefelo leo ga ba kgone go di bona fa di le bokgakala jwa dikgato tse 130 go ya go tse 160 [40-50 m]. Pono e e bogale, go dupelela le bokgoni jwa dipitse tsa naga jwa go taboga—le eleng go feta dimaele di le 35 ka ura [60 km/hr]—go di sireletsa mo diphologolong tse di jang tse dingwe. Jaaka fa Pesalema 104:11 e tlhalosa, dipitse tsa naga di “itimola lenyora.” Mme ke ka ntlha eo gantsi o ka se kang wa di fitlhela di le bokgakala jwa dimaele tse di fetang tse tlhano [8 km] go tswa kwa metsi a leng gone.” O ne a oketsa jaana: “Le rona re tshwanetse gore ka metlha re itimole lenyora la rona la semoya ka go nna gaufi le phuthego, go ithuta Baebele, le go nna gone kwa dipokanong.”

Fa re sena go tloga mo nageng e e bojang ya Afrika re ne ra tsamaela ntlheng nngwe ya diphologolo tse di kotsi mo lefatsheng, e leng bera ya Kodiak. Bera eno e kgolo go di feta tsotlhe, e kgona go gola go nna boleele jwa dimetara di le tharo le bokete jwa dikilogerama di le 780. Se ba se dirileng gape gore e nne ya tlholego, ke gore ba e diretse melatswana le mafika a magolo. Bera ya Kodiak ke losika lwa bera e thokwa ya Syria, eo e neng e nna kwa Iseraele mo metlheng ya Baebele. Mari-Claire o ne a lemogile gore, dibera di tshela ka go ja dijo tsa mefutafuta. Di ja matlhare le medi ya dimela le eleng maungo, meretlwa, matonkomane, mae, ditshenekegi, tlhapi, diphologotswana tse di nyenyane, le tse dingwe, me di rata mamepe a dinotshe fela thata. Kwa Iseraele wa bogologolo e ne e re fa merogo eo e leng dijo tsa dibera e tlhokafala, badisa ba ne ba tshwanetse go disa dibera gore di seka tsa ja letsomane. Fa a santse a le mosha Dafite o ne a tshwanela go nna sebete sa go bolaya bera gore a sireletse letsomane la ga rraagwe.—1 Samuele 17:34-37.

‘Mo Dinkong Tsa Yone go Tswa Mosi’

Mme go ne go na le diphologolo tse dintsi tse re neng re batla go di bona. Ka letsatsi le lengwe mo thutong ya rona ya Baebele, re ne ra kopana le “Lefiathane,” kwena. Kwa tshimologong, Pepijn o ne a e tlhalositse e le ‘mofuta mongwe wa tlhapi, mme e le e kgolo fela thata!’ E re ka dikwena di sa tlwaela go fetofetoga ga themperetšha, di beilwe mo Ntlong ya Afrika, moo e leng tlelaemete ya boboatsatsi. Fa re re re a tsena re ne ra kganelwa ke mogote le lengola, o o neng wa fufudisa digalase tsa rona tsa matlho. Mo godimo ga moo, re ne ra tshwanela go nna mo lefifing. Fa re ne re tsamaya mo borogong jo bo dirilweng ka dikgong, ka tshoganyetso re ne ra bona dikwena tse dikgolo tseo di neng di pitika mo seretseng mo thoko ga borogo. Di ne di robetse moo, di sisibetse mo e leng gore Pepijn o ne a ba a re: “Ga se tse di tshelang.”

Dikwena ke dingwe tsa digagabi tse ditona tota. Dingwe di ka nna boleele jwa dimetara tse thataro le bokete jwa dikilogerama tse 900. Nonofo ya ditlhaa tsa yone e jesa kgakge—tota le e leng kwena e nyenyane e e nang le bokete jwa dikilogerama di le 50 e na le maatla a go phura a a ka nnang dikilogerama tse 700. Fa kwena e tswela kwa ntle morago ga go nna nako e telele ka fa tlase ga metsi, mme e budulela moya kwantle ka bofefo ka dinko mo letsatsing le le phatsimang la mo mosong, seo ruri go ka nna ga twe ke “ditlhase tsa lesedi” le ‘mosi o o tswang mo dinkong tsa yone’ o lokwalo lwa Jobe le o tlhalosang.—Jobe 41:1, 18-21.

“Botlhale Jaaka Dinoga”

Re ne re sa tswa kwa dikweneng, fa e re mo lefifing—ka lesego, mo teng ga digalase—ra bo re bona dibopiwa tseo di dirisitsweng mo Baebeleng jaaka sesupo sa dinonofo tse di molemo le tse di bosula. Re bua ka noga, phologolo ya ntlha e e biditsweng ka leina mo Baebeleng. (Genesise 3:1) Jesu o ne a dirisa botlhale jwa yone jaaka sekai fa a ne a tlhagisa barutwa ba gagwe malebana le boitsholo jwa bone mo gare ga baganetsi ba ba tshwanang le diphiri. (Mathaio 10:16) Mme, gone, gantsi noga e tlhalosiwa jaaka “noga ya bogologolo,” Satane Diabolo, yoo mo go 2 Bakorinthe 11:3 a tlhalosiwang e le motsietsi le yo o boferefere jaaka noga.—Tshenolo 12:9.

“Ya Kwa Tshoswaneng . . . Mme o Tlhalefe”

Ka tshoganyetso fela re ne ra bona seolo se segolo mo teng ga zuu eno, mo go dulang digopa tse tharo tsa ditshoswane tse di keketang matlhare. Tseno ke ditshoswane tse di dirang mo masingwaneng tota e le ruri mo ditshoswaneng. Re kgona go bona segopa seno re le ka kwantle ga galase; seno se re thusa go ithuta ka mokgwa o dibopiwa tseno tse dinnye di tshelang ka one. Ditshoswane di ne tsa re kgatlha thata gonne mo Baebeleng di dirisitswe e le sekai sa tlhagafalo le botlhale jwa tlholego.—Diane 6:6.

Wijbren Landman ke mankge wa ditshenekegi. O ne a tlhalosa jaana: “Go lekanyediwa gore mo lefatsheng go na le ditshoswane tse di milione ga dimilione tse di sekete, se se rayang gore fa go lekanngwa palo ya batho le ya ditshoswane, fa motho a le mongwe fela, ditshoswane tsone di 200000! Mo mefuteng e e 15000 ya ditshoswane tseo re di bonang mo dikontinenteng tsotlhe kwantle ga kgaolo ya polar, ga di tshwane tsotlhe fela. Tsotlhe di aga mefuta e e farologaneng ya diolo, mme di ja mefuta ya dijo tse di farologaneng, mme lefa go ntse jalo, tsotlhe di rulagantswe ka tsela e e tshwanang.

“Ditshoswane tse di keketang matlhare di jala dithuthuntshwane, fela jaaka batho ba jala dithuthuntshwane tse di jewang. Jaaka fa re bona, go jala gono go diragala kafa tlase ga lefatshe, mme dijo tsa dithuthuntshwane tseno di be di tswa fa godimo ga lefatshe. Ditshoswane tse di dirang ka natla, di tlhola letsatsi lotlhe di isa matlhare kwa sentlhageng sa tsone. Di palama setlhare kana setlhatshana mme di tlhophe letlhare. Di be di dirisa meno a tsone jaaka sekere, ka bonako fela di be di kgetla dikarolwana tsa letlhare leo mme di be di feta di tlhomagane di di isa kwa di nnang teng, di di rwele jaaka sekhukhunyana mo ditlhogong tsa tsone. Ke sone se se tlhalosang go bo leina le lengwe la tsone e le ditshoswane tsa sekhukhunyana. Di keketa matlhare ka bonako fela thata mo e leng gore kwa Amerika Borwa le Bogare di kgona go fetsa ditlhatshana kana ditlhare ka diuranyana fela. Ke sone se go sa gakgamatseng go bo batho ba koo ba sa di rate! Tse dingwe di nna mo seolong di phepafatsa dikarolwana tseno tsa matlhare ka kelotlhoko pele ga di a tšhotlha. Morago ga moo, di tlhakanya matlhare ano a a tšhotlhilweng le di-enzyme le diaminoasiti tse di tswang mo ditshoswaneng tse dingwe. Mme jaanong he matlhare ano a di a tšhotlhileng a tla bo a siametse go dirisiwa e le dijo tsa thuthuntshwane, ka gone seno e tla nna dijo tse di sa feleng tsa segopa sotlhe seno sa ditshoswane.”

Morago ga re sena go kgatlhiwa thata ke matsetseleko le botlhale jo bo bonalang mo dibopiweng tseno tse di farologaneng, re ne ra tloga mo lefelong leno la ditshoswane. Go ne go setse go le motshegare wa maitseboa, ka jalo re ne re tshwanetse go boela gae. Mme go ne go sa ntse go na le dilo tse dingwe tse dintsi tseo re neng re tshwanetse go di bona. Ga re a ka ra bona merubisi (Isaia 13:21), manyebi (Ekesodo 35:23), dikubu (“Behemothe,” Jobe 40:15), bontšhe (Jeremia 50:39), kana diphologolo tse dingwe tse dintsi tse di nnang mono tse di umakilweng mo Baebeleng. Nngwe le nngwe ya tsone e molemo go ithuta ka yone. Tota ruri re tla boa gape re etela Zuu ya Emmen!—E neetswe.

[Motswedi wa Setshwantsho mo go tsebe 16]

Ostrich: Yotvatah Nature Reserve