Tharabololo ke Eng?

GA SE gore seemo sa batshabi se ka se tlhole se siama. Mo lefatsheng lotlhe, mekgatlho e e direlang batho molemo e leka go thusa batho ba ba mo tlalelong ka ntlha ya ntwa le mathata a mangwe. E thusa batshabi tota go boela kwa dinagagaeng tsa bone.

Batshabi ba tlogela magae, metse le dinaga tsa bone ka gonne ba boifa gore ba tla bolawa, ba setlakwa, ba betelelwa, ba tshwarwa, ba dirwa makgoba, ba thukhuthwa kana ba bolawa ke tlala. Ka jalo, mathata a a dirileng gore batho bano ba tshabe a tshwanetse go rarabololwa pele ga ba boela gae ka pabalesego. Tota lefa ntwa ya dibetsa e ka khutla, batho ba boifa go ya gae fa molao le tolamo di seo. Agnes yo e leng motshabi yo o tswang kwa Rwanda e bile e le mmè wa bana ba le barataro o ne a bolela jaana: “Fa ba re busetsa [gape] kwa Rwanda go tshwana fela le fa ba re isa kwa mabitleng.”

Lefa go ntse jalo, go tloga ka 1989, dimilione di le robongwe tsa batshabi di ne tsa boela gae. Ba ba tshwarang dimilione di le 3,6 ba ne ba boela kwa Afghanistan ba tswa kwa Iran le Pakistan. Batshabi ba bangwe ba le dimilione tse 1,6 go tswa kwa dinageng tse thataro ba ne ba boela kwa Mozambique, naga e e neng ya ganyaolwa ke ntwa ya selegae ka dingwaga tse 16.

Go boa ga go motlhofo. Gantsi dinaga tse batshabi ba boelang kwa go tsone di a bo di sentswe—metsana e swafaditswe, marogo a thubilwe, ditsela le masimo di tletse ka dibomo tse di epetsweng. Ka jalo, batshabi ba ba boang ba tshwanetse go simolola botshelo sesha mme gape le go aga matlo a bone, dikolo, ditleliniki le sengwe le sengwe.

Mme gone, lefa ntwa e ka emisa mo lefelong lengwe mme batshabi ba kgona go boela gae, go runya tse dingwe kwa mafelong a mangwe, mo go bakang batshabi ba bangwe gape. Ka jalo, go rarabolola bothata jono jo bogolo jwa batshabi go tlhoka gore go rarabololwe mathata a a amanang le jone a ntwa, kgatelelo, letlhoo, pogiso le dilo tse dingwe tse di bakang gore batho ba boloke matshelo a bone ka go tswa ba sia.

The State of the World’s Refugees 1995 e dumalana jaana: “Ke boammaaruri jo bo mo pepeneneng gore . . . tharabololo [ya bothata jwa batshabi] e ikaegile thatathata ka dilo tsa sepolotiki, tsa sesole le tsa ikonomi tse mekgatlho e e direlang batho molemo e palelwang ke go di rarabolola.” Go ya ka Baebele, dilo tse di ka bo rarabololang, ga se tse mokgatlho ope wa lefatshe o ka di kgonang, e ka ne e le o o direlang batho molemo kana e mengwe.

Lefatshe le le Senang Batshabi

Lefa go ntse jalo, go na le tharabololo. Baebele e bontsha gore Jehofa Modimo o a amega ka batho ba ba kgaogantsweng le magae a bone le malapa. Ga a tshwane le dipuso tsa lefatshe, o na le maatla le botlhale jwa go rarabolola mathata otlhe a a raraaneng a a lebaneng le batho. O tla dira jalo ka Bogosi—puso ya selegodimo e e tla tlogang e laola dilo mo lefatsheng.

Bogosi jwa Modimo bo tla tsaya maemo a dipuso tsotlhe tsa batho. Mo boemong jwa gore go nne le dipuso tse dintsintsi, jaaka go ntse gone jaanong, go tla bo go na le puso e le nngwe fela e e tla busang polanete yotlhe. Baebele e bolelela pele jaana: “Modimo wa legodimo o tlaa tlhoma bogosi jo bo se ketlang bo senngwa gope, mme le mmuso wa [j]one ga o ketla o tlogelelwa tšhaba e sele, mme bo tlaa thubaganya bo nyeletsa magosi ao otlhe, mme bo tlaa ema ka bosakhutleng.”—Daniele 2:44.

O ka nna wa bo o itse thapelo ya sekao e e mo Baebeleng mo go Mathaio 6:9-13. Bontlhanngwe jwa thapelo eo jwa re: “Bogosi jwa gago a bo tle. Go rata ga gago a go dirwe mo lefatsheng jaaka kwa legodimong.” Tumalanong le thapelo eo, Bogosi jwa Modimo bo tla tloga bo ‘tla’ go diragatsa maikaelelo a Modimo ka lefatshe.

Mo pusong eo e e lorato ya Bogosi jwa Modimo, kagiso le polokesego di tla aparela lobopo lotlhe. Batho le ditšhaba mo lefatsheng ga ba kitla ba tlhola ba ilana le go lwantshana. (Pesalema 46:9) Ga go kitla go tlhola go nna le dimilionemilione tsa batho ba ba namolang matshelo a bone ka go nna batshabi kana ba ba tshelang botlhoko kwa dikampeng.

Lefoko la Modimo le solofetsa gore Kgosi ya Bogosi jwa Modimo e bong Keresete Jesu, “o tlaa golola motlhoki mogang o lelang; le mohumanegi yo o se nang mothusi. O tlaa tlhomogela bahumanegi le batlhoki pelo; mme mewa ya batlhoki o tlaa e boloka. O tlaa golola mewa ya bone mo pogisong le mo thubakong; mme madi a bone a tlaa tlotlega mo matlhong a gagwe.”—Pesalema 72:12-14.

[Setshwantsho mo go tsebe 10]

Go ise go ye kae batho botlhe ba tla tshedisana sentle jaaka bana ba motho