Go Rata Tshingwana ga Rona

A O ITUMELELA thethebalo ya tshingwana e ntle e o ka tshabelang modumo le mabote a botshelo jono kwa go yone? A diparaka tse go se nang modumo kwa go tsone ka majang a tsone, dithunya, ditlhare tsa meriti le makadiba, ke mafelo a o ratang go ya go iketla kwa go one le lelapa la gago kana go itsamaatsamaela le tsala kwa go one? Ee, a bo tshingwana e le selo se se nametsang, se se lapolosang le se se ritibatsang maikutlo jang ne!

Le mororo batho bangwe ba ka ikgogona go dira ditshingwana, gongwe e le ka gonne ba se na nako, rotlhe re itumelela mebalabala, menko, medumo le maungo a tshingwana. Thomas Jefferson—motlhamadipolane, moitsesaense, moitsemolao, motlhami e bile e le poresidente wa United States—o ne a rata tshingwana thata. O ne a kwala jaana: “Ga go na tiro e ke e ratang go gaisa go lema lefatshe. . . . Ke sa ntse ke rata tshingwana thata. Le fa ke setse ke le monnamogolo, ke sa ntse ke le ratshingwana yo mosha.”

Batho ba le bantsi ba dumalana le kgopolo eo ya gagwe. Ngwaga le ngwaga dimilionemilione tsa baeti di ologela kwa ditshingwaneng tsa lefatshe tse di itsegeng thata—Kew Gardens (Royal Botanic Gardens), kwa Engelane; ditshingwana tsa Kyoto kwa Japane; ditshingwana tsa Palace of Versailles kwa Fora; Longwood Gardens, kwa Pennsylvania, U.S.A., fa re nankola di sekae fela. Gape dinaga di le dintsi di na le mafelo a ditoropokgolo a kwa go one matlo a a agilweng go bapa le mebila e e nang le ditlhare tse di tlhomaganeng, a a dikaganyeditsweng ke ditlhatshana, ditlhare le mebalabala ya dithunya—e kete ke paradaisenyana.

Ditshingwana di ka Tokafatsa Boitekanelo

Go etswe tlhoko gore fa batho ba amana thata le dilo tsa tlholego, seo se ka tokafatsa boitekanelo jwa bone, le mororo seo e ka tswa e le go leba fela dithunya, ditlhare, ditlhatshana kana dinonyane ka letlhabaphefo. Seno se ne sa dira gore bookelo bongwe jwa New York City bo jale tshingwana mo marulelong a jone. Molaodimogolo wa bookelo o ne a bolela gore “seo se ne sa amogelwa ka boitumelo jo bogolo. Seo se ile sa rotloetsa balwetse le babereki fela thata. . . . Re lemoga gore go ka nna ga ba thoba fela thata.” Ee ruri, dipatlisiso di bontsha gore batho ba ka thobega mmele, tlhaloganyo le maikutlo ka go jesa ditsibosi tsa mebele ya bone monate ka dilo tsa tlholego.

Gape, motho yo o ratang dilo tsa semoya a ka ikutlwa a tsalana thata le Modimo fa a le fa gare ga dilo tse A di bopileng. Kgang eno e e malebana le tshingwana re kgona go e lemoga mo go se se neng sa direga kwa tshimong ya ntlhantlha mo lefatsheng, Tshimo ya Etene, koo Modimo a neng a simolola go buisana le motho la ntlha teng.—Genesise 2:15-17; 3:8.

Go rata tshingwana ke selo sa lefatshe lotlhe. Mme jaaka fa re tla bona, seno se botlhokwa thata. Le fa go ntse jalo, pele ga re tlotla ka seo, re go laletsa gore o “tsamaatsamaye” le ditshingwana di sekae tse di neng tsa nna teng bogologolo gore o tlo o bone ka fa batho ba eletsang Paradaise thata ka teng.