Go Bolaya mo Leineng la Modimo

KA MMEGADIKGANG WA TSOGANG! KWA FORA

“Mo Leineng La Modimo Re A Bolaya Mme Re Tla Nna Re Bolaya”

KAFA tlase ga setlhogo se se nopotsweng fa godimo seno, International Herald Tribune e ne ya tlhalosa jaana: “Lekgolo leno la dingwaga le batho ba ba nang le tsholofelo ba le tsayang le tlhabologile, le sentswe ke tlwaelo e e boifisang ya gore batho ba bolaane mo leineng la Modimo fela jaaka makgolo a dingwaga a a tlileng pele ga lone.”

Mokwadi o ne a umaka dikai tsa kgailo e e dirilweng ke bodumedi mo makgolong a dingwaga a a fetileng. Ka jalo, fa a bua ka dikgailo tse di diragetseng mo lekgolong la bo20 la dingwaga, o ne a konela jaana: “Se re se bonang ke tsweletso e e tsitsibanyang mmele ya go se itshokelane mo go setlhogo e leng se se dirilweng mo metlheng e e fetileng. Kobamelo e sa ntse e dirwa seipato sa thubakanyo ya sepolotiki le go tlhaselwa ga mafelo a a mabapi.”

Bangwe ba leka go buelela dintwa tsa gompieno tsa bodumedi ka go bolela gore Modimo o ne wa dumelela go bolawa ga Bakanana ke Baiseraele ba bogologolo. Le fa go ntse jalo, ga se lebaka le ba ba ipolelang gore ke Bakeresete ba ka le dirisang e le seipato sa go tsenela ntwa gompieno. Ka ntlha yang? Ka ntlha ya gore Baiseraele ba ne ba laotswe ka tlhamalalo ke Modimo go dira jaaka badiragatsi ba dikatlholo tsa gagwe tse di siameng kgatlhanong le batho ba ba obamelang badimona, ba kobamelo ya bone e neng e akaretsa boitsholo jo bo leswe jwa tlhakanelodikobo le go dira ditlhabelo ka bana.—Duteronome 7:1-5; 2 Ditirafalo 28:3.

Bosupi jwa gore dintwa tse di neng di lowa kwa Iseraele wa bogologolo e ne e se dikgotlhang fela tse di tlwaelegileng ke jwa diphenyo tse di gakgamatsang tse Modimo a neng a di direla setšhaba seo. Ka sekai, Baiseraele ba bogologolo ka nako nngwe ba ne ba kaelwa go dirisa dinaka, dinkgwana le dipone—didirisiwa tse e seng tsa ntwa le e seng! Mo tiragalong e nngwe diopedi di ne di beilwe kwa pelepele mo masoleng a Baiseraele a a neng a lebane le masole a a thata a a neng a ba tlhasela a ditšhaba di le mmalwa.—Baatlhodi 7:17-22; 2 Ditirafalo 20:10-26.

E bile ka dinako dingwe, fa Baiseraele ba ne ba lwa mo dintweng tse di neng di sa tlhomiwa ke Modimo, o ne a sa ba segofatse mme ba ne ba fenngwa. (Duteronome 28:15, 25; Baatlhodi 2:11-14; 1 Samuele 4:1-3, 10, 11) Ka jalo, dintwa tsa Baiseraele di ka se dirisiwe go buelela dintwa tse di lolweng ke Labokeresete.

Mo leineng la bodumedi, Bahindu ba lwele le Bamoseleme le Ba-Sikh; Bamoseleme ba Ba-Shiite ba lwele kgatlhanong le Bamoseleme ba Ba-Sunni; mme kwa Sri Lanka, Babuda le Bahindu ba ne ba bolaana.

Sekai sa go bolaana mo leineng la Modimo ke dintwa tse di neng tsa lowa kwa Fora mo lekgolong la bo16 la dingwaga. Kgang ya dintwa tseno e akaretsa dingwe tsa ditiragalo tsa tshololo ya madi e e boitshegang go gaisa yotlhe e e kileng ya direga mo hisitoring ya Katoliki ya Roma le madumedi a Porotesetanta mo Yuropa. A re tlhatlhobeng dintwa tseno mme re bone se re ka ithutang sone mo go tsone.

[Motswedi wa Setshwantsho mo go tsebe 3]

U.S. Army photo