Basha ba Botsa Jaana . . .

Nka Emelana Jang le go Lwala Thata Jaana?

JASON o ne a le dingwaga di 18 fela, mme go ne go lebega e kete o ne a se kitla a diragatsa maikaelelo otlhe a gagwe mo botshelong. O ne a solofetse go nna modiredi wa Mokeresete wa nako e e tletseng mme gone jaanong o boleletswe gore o tshwerwe ke bolwetse jwa Crohn—bolwetse jwa mala a a botlhoko jo bo koafatsang. Le fa go ntse jalo, gompieno Jason o emelana ka katlego le maemo a gagwe.

Gongwe le wena o tshwerwe ke bolwetse jo bo masisi. Mo setlhogong se se fetileng, Tsogang! e ile ya bua dikgwetlho tse basha ba ba tshwanang le wena ba lebaneng le tsone.a Mme gone jaanong mma re bone ka fa o ka emelanang ka katlego le boemo jwa gago ka teng.

Mogopolo o o Siameng

Go emelana ka katlego le bolwetse bongwe le bongwe go akaretsa go nna le mogopolo o o siameng. Baebele ya re: “Pelo ya monna e tle e mo itshokisetse seemera sa gagwe; mme mowa o o phatlogileng o ka kakatlololwa e mang?” (Diane 18:14) Megopolo le maikutlo a go tlhoka tsholofelo di dira gore go nne bokete go fola. Jason o ne a fitlhela seno e le boammaaruri.

Kwa tshimologong, Jason o ne a tshwanela go lwa le maikutlo a a sa siamang a a jaaka go galefa, a a neng a mo dira gore a tshwenyege mo maikutlong thata. Ke eng se se mo thusitseng? O tlhalosa gore: “Ditlhogo tsa Tora ya Tebelo le Tsogang! tse di buang ka go tshwenyega thata mo maikutlong di nthusitse go nna le boikutlo jo bo siameng. Jaanong ke leka go lebana le kgwetlho ya letsatsi lengwe le lengwe ka nako ya teng.”b

Carmen wa dingwaga di le 17 le ene o ne a ithuta go leba dilo ka tsela e e siameng. Le fa tota a tshwerwe ke bolwetse jwa sickle-cell anemia, o akanya fa a le lesego. A re: “Ke akanya ka batho ba bangwe ba ba mo maemong a a maswe go feta a me le ba ba sa kgoneng go dira dilo tse ke kgonang go di dira. E bile ke lebogela seo mme ga ke ikutlwe ke hutsafetse.”

Diane 17:22 ya re: “Pelo e e ntseng mokete ke kalafo e e molemo.” Bangwe ba ka nna ba ikutlwa gore ga ba a tshwanela go tshega fa ba lebane le bolwetse jo bo masisi. Mme fela metlae e e siameng le go nna le ditsala tse di itumedisang go ka nonotsha tlhaloganyo ya gago le go oketsa keletso ya go tshela. Tota e bile, boitumelo ke nonofo ya Modimo, nngwe ya maungo a moya wa Modimo. (Bagalatia 5:22) Moya oo o ka go thusa gore o itumele le e leng le fa o lwa le bolwetse.—Pesalema 41:3.

Go Bona Ngaka e e Tlhaloganyang

Go nna le ngaka e e tlhaloganyang basha go thusa thata. Dilo tse basha ba di tlhokang mo mogopolong le mo maikutlong gantsi di farologane le tsa bagolo. Ashley o ne a na le dingwaga di le lesome fela fa a ne a tshwanela go ya kwa bookelong go alafelwa bolwetse jo bo kotsi jwa tlhagala ya boboko. Ngaka ya ga Ashley e ne ya dirisana le ene ka kutlwelobotlhoko le ka moo a neng a tlhaloganya ka teng. O ne a mo bolelela ka fa bolwetse jwa gagwe jwa fa a ne a le monnye bo neng jwa mo tlhotlheletsa gore a nne ngaka ka teng. O ne a mo tlhalosetsa ka bonolo le ka phepafalo ka kalafi e a e akantshang, ka jalo o ne a itse se a tshwanetseng go se solofela.

Wena le batsadi ba gago lo tla senka modiri wa tsa kalafi yo o go tlotlang le yo o tlhaloganyang dilo tse o di tlhokang. Fa e le gore ka mabaka mangwe ga o kgotsofalele dilo tse o tlamelwang ka tsone, ikutlwe o gololesegile go tlhalosetsa batsadi ba gago maikutlo a gago.

Lwela Boitekanelo Jwa Gago!

Go botlhokwa gape gore o lwe le bolwetse jwa gago ka tsela nngwe le nngwe e o ka kgonang ka yone. Ka sekai, ithute go le gontsi ka bolwetse jwa gago. Seane sa Baebele se lemositse jaana: “Monna wa kitso o kokotletsa nonofo.” (Diane 24:5) Go nna le kitso go nyeletsa go boifa se o sa se itseng.

Mo godimo ga moo, mosha yo o itseng go le gontsi ka bolwetse jwa gagwe a ka nna le seabe thata mo kalafing ya gagwe mme a ka kgona go dirisana mmogo le yone. Ka sekai, a ka nna a itse gore ga a tshwanela go tlogela go nwa melemo e a e neetsweng kwantle ga tumelelo ya ngaka ya gagwe. Carmen yo o umakilweng fa godimo, o ne a bala dibuka tse di buang ka sickle-cell anemia, fela jaaka go dirile batsadi ba gagwe. Se ba se ithutileng se ne sa ba thusa go bona kalafi e e ka thusang Carmen thata.

Botsa ngaka ya gago dipotso tse di maleba—fa go tlhokega ka makgetlho a le mantsinyana—fa o sa tlhaloganye dilo dingwe. Go na le go bua dilo tse o akanyang gore ngaka e tla batla go di utlwa, tlhalosa ka boikanyego se se mo mogopolong le mo maikutlong a gago. Jaaka Baebele e bolela, “kwa go senang puisanong ya mo sephiring teng maikaelelo a tle a retelelwe go nna le katlego.”—Diane 15:22, NW.

Ka nako nngwe Ashley o ne a sa batle go bua sepe ka ga bolwetse jwa gagwe. O ne a bua le mmaagwe fela ka jone. Modirediloago mongwe yo o botlhale o ne a mo botsa jaana kwa thoko: “A gongwe o ikutlwa gore ga o bolelelwe dilo tsotlhe?” Ashley o ne a bula mafatlha a gagwe gore go ntse jalo. Ka jalo mosadi yono o ne a bontsha Ashley direkoto tsa gagwe tsa kalafo mme a mo tlhalosetsa tsone. Gape o ne a lopa dingaka go tsaya nako e ntsinyana ba bua le Ashley ka tlhamalalo, go na le go bua ka ene. Ka go bo Ashley kgabagare a ile a kgona go bula mafatlha a gagwe, o ne a kgona go bona thuso e a neng a e tlhoka.

Thuso e e Tswang go Ba ba Go Potologileng

Fa mongwe mo lapeng a lwala thata, e nna kgang ya lelapa, e e tlhokang matsapa a a kopanetsweng. Ba lelapa la ga Ashley le phuthego ya Bokeresete ba ne ba nna seoposengwe go mo ema nokeng. Phuthego e ne e gakololwa gangwe le gape gore o kwa bookelong. Maloko a phuthego a ne a mo etela gantsi, mme ba ne ba thusa lelapa ka ditiro tsa legae le go baakanyetsa dijo go fitlha lelapa le boela gape mo thulaganyong ya ka metlha. Bana mo phuthegong ba ne ba etela Ashley kwa bookelong ka nako ya fa a ne a sa lwale thata gore a ka nna le ditsala. Seno se ne se se molemo fela mo go Ashley mme gape le mo ditsaleng tsa gagwe tse di potlana.

Le fa go ntse jalo, pele batho ba bangwe ba go neela thuso, ba tshwanetse go itse gore o a e tlhoka. Carmen o ne a ikaegile ka batsadi ba gagwe le ka bagolwane ba phuthego go mo nonotsha maikutlo le semoya. Gape o ne a ikaegile ka Bakeresete ba a tsenang sekolo le bone go mo ema nokeng. Carmen a re: “Ba amegile thata ka nna mme ke ikutlwa ke tlhokometswe.”

Sekolo sa gaeno se ka nna sa kgona go go neela dikgakololo tse di molemo tsa kalafi le tsa madi e bile se ka nna sa bo sa kgona go go ema nokeng ka tsela nngwe. Ka sekai, morutisi wa ga Ashley o ne a kgothaletsa tlelase ya gagwe go kwalela Ashley le go mo etela. Fa e le gore barutisi ba gago ga ba tlhaloganye mathata a o lebaneng le one, go ka tlhokega gore batsadi ba gago ba tlotle ka boemo jwa gago ka tlotlo le balaodi ba sekolo.

Dirisa Mogopolo le Mmele ka Botlhale

Fa o lwala thata, o ka nna wa bo o sa kgone go dira sepe fa e se fela gore o dirise nonofonyana e o nang le yone gore e go thuse go tokafala. Fa e le gore ga o a koafala gotlhelele, go na le dilo tse dintsi tse di agang tse o ka di dirang. Mokwadi mongwe e bong Jill Krementz o ne a anela jaana mo go se a se umakileng ka nako ya fa a ne a batlisisa buka ya gagwe ya How It Feels to Fight for Your Life: “Ke ne ka hutsafala thata mo dingwageng tse pedi tsa fa ke ne ke tsamaya mo diphasiking tsa bookelo le go bona bana ba bantsi jaana ba lebile thelebishene. Re tshwanetse go kgothaletsa basha bano go bala mo go oketsegileng. Bolao jwa bookelo ke lefelo le le siameng thata gore motho a ka katisa boboko jwa gagwe.”

O ka tswa o le kwa gae kana kwa bookelong, go katisa boboko jwa gago gantsi go ka go thusa gore o ikutlwe botoka. A o setse o kile wa leka go kwala makwalo kana maboko? Go dira ditshwantsho kana go taka? Go tweng ka go ithuta go tshameka seletswa sengwe sa mmino fa e le gore maemo a a go letla? Le e leng le fa o na le ditlhaelo tsa boitekanelo, go na le dilo tse dintsi tse o ka di kgonang. Ruri, selo se se molemo thata se o ka se dirang ke go itlwaetsa go rapela Modimo le go bala Lefoko la gagwe, Baebele.—Pesalema 63:6.

Fa maemo a gago a go letla, ditiro tsa go itshidila mmele tse di tshwanelang sentle le tsone di ka go thusa gore o ikutlwe botoka. Ka ntlha ya seno mafelo a kalafi gantsi a na le dithulaganyo tsa kalafi ya mmele tsa balwetse ba basha. Mo makgetlhong a mantsi boikatiso jo bo siameng ga bo fodise fela mo mmeleng mme gape bo thusa gore o nne o itumetse.

O Se ka Wa Ineela!

Jesu fa a ne a boga, o ile a rapela Modimo, A mo ikanya le go tlhoma mogopolo mo isagweng ya gagwe e e itumedisang go na le mo botlhokong. (Bahebere 12:2) O ne a ithuta mo maitemogelong a gagwe a a botlhoko. (Bahebere 4:15, 16; 5:7-9) O ne a amogela thuso le kgothatso. (Luke 22:43) O ne a tlhomile mogopolo wa gagwe mo boitekanelong jwa ba bangwe go na le mo botlhokong jwa gagwe.—Luke 23:39-43; Johane 19:26, 27.

Le fa o ka tswa o lwala thata, le wena o ka nna wa tlhotlheletsa ba bangwe. Mogoloe Ashley e bong Abigail o ne a kwala seno mo pegong ya sekolo: “Motho yo o nkgatlhang thata ke nnake. Le fa a tshwanetse go ya kwa bookelong le go tshelwa metsi ka tiripi le go tlhabiwa ka dinale, o boa a ntse a nyenya!”c

Jason ga a ise a tlhoboge mekgele ya gagwe, o e fetotse fale le fale fela. Gone jaanong mokgele wa gagwe ke go ya go dira kwa go tlhokegang bareri ba Bogosi jwa Modimo thata teng. Jaaka Jason, o ka nna wa bo o sa kgone go dira dilo tsotlhe tse o di eletsang. Selo sa botlhokwa ke go ithuta go tshela ka ditlhaelo tsa gago, o sa itshireletse mo go feteletseng kana o se bosutlha. Ikanye Jehofa go go naya botlhale le nonofo ya go dira se o ka se kgonang. (2 Bakorinthe 4:16; Jakobe 1:5) Mme gakologelwa gore nako e tla tla e lefatshe leno le tla nnang paradaise ka yone, mo ‘monni wa gona a se ketlang a re: “Ke a bobola.”’ (Isaia 33:24) Ee, letsatsi lengwe o tla bo o itekanetse gape!

[Dintlha tse di kwa tlase]

[Setshwantsho mo go tsebe 19]

Mogolowe Ashley e bong Abigail o kgatlhiwa thata ke bopelokgale jwa monnawe