Tharabololo ke Eng?

BOMANKGE ba ganetsana thata kaga ditharabololo tsa mathata a a raraaneng a batho a metsi. Banka ya Lefatshe e batla gore go dirisiwe diranta di le dibilione di le 2,66 mo go tlameleng batho ka dithulaganyo tsa go tlosa leswe le go ba gogela metsi mo dingwageng tse di lesome tse di latelang. Ditshenyegelo tsa go sa dire jalo di ka nna kgolo go gaisa. Ka sekai, kwa Peru, leroborobo la dibeke di le lesome la kholera, le le bakilweng ke metsi a a kgotletsweng, bosheng jaana le jele diranta di le dimilione di le 4430—madi a a fetang a naga e neng ya a dirisetsa go tlamela batho ka metsi go menagane gararo mo dingwageng tsotlhe tsa bo-1980.

Le fa go ntse jalo, go sa kgathalesege maitlhomo a a siameng a ba ba emang diporojeke tsa metsi nokeng gantsi di dira go le gonnye fela go thusa ba ba dikobo di magetleng. Koketsego ya batho kwa ditoropong tse dikgolo tsa dinaga tse di santseng di tlhabologa e gola thata e bile e le ka tsela e e sa laolesegeng. Batho ba ba humanegileng ba nna mo megwafatsheng e e kgotlaganeng, ya maemo a a kwa tlase e e senang dipeipe tsa metsi kgotsa tsa go tlosa leswe. E re ka ba sa bone ditirelo tsa metsi tse di tlamelwang ke puso, ba tshwanetse go duela batho ba ba ithekisetsang metsi ka tlhwatlhwa e e kwa godimo thata, gantsi e le metsi a a seng phepa.

Ka phepafalo, bothata jwa metsi mo lefatsheng lotlhe bo raraane e bile bo akaretsa dilo tse di farologaneng: tlhaelo ya metsi, kgotlelo, khumanego, bolwetse le a mantsi a a tlhokegang ka ntlha ya go oketsega ga palo ya baagi. Go phepafetse he gore batho ba ka se kgone go rarabolola mathata ano.

Motheo wa go Nna le Tsholofelo

Le fa go ntse jalo, isagwe ga e letobo jaaka bontsi bo bolela. Ka ntlha yang? Ka gonne tharabololo ya bothata jwa lefatshe lotlhe ya metsi ga e a ikaega ka batho; e ikaegile ka Modimo. Ke ene fela yo o nang le bokgoni e bile a rata go rarabolola mathata otlhe a metsi.

Ga go na pelaelo gore Jehofa Modimo o tla rarabolola mathata ano. Ke ene Motlhami le Mmopi e seng fela wa lefatshe mme gape le wa metsi a a mo go lone. Ke ene yo o neng a dira modikologo wa metsi mmogo le medikologo yotlhe ya tlholego e e dirang gore dilo di kgone go tshela mo lefatsheng. Tshenolo 14:7 e bolela fa Jehofa e le “One o o dirileng legodimo le lefatshe le lewatle le metswedi ya metsi.”

Jehofa o na le thata ya go laola metsi a lefatshe. Ke ene “O o nesang pula mo lefatsheng, o tlise metsi mo nageng.” (Jobe 5:10) Baebele ya re ka ga gagwe: “A fetole naga fela mogobe o o metsi, le lefatshe le le omeletseng metswedi ya metsi.”—Pesalema 107:35.

O supile bokgoni jwa gagwe jwa go tlamela ka metsi ka makgetlho a le mantsi. Ka sekai, o ne a tlamela Baiseraele ka metsi mo dingwageng tse 40 fa ba le mo nageng, ka dinako dingwe e le ka kgakgamatso. Baebele e bolela gore “o ne wa phunya metlhodi le yone mo lefikeng, wa eledisa metsi jaaka dinoka. Bona, o ne wa itaya lefika, metsi a ba a phothometsega le meelelo ya penologa.”—Pesalema 78:16, 20.

Se Modimo a Tla se Dirang

Modimo ga a kitla a letla gore bothata jwa metsi bo tswelele ka bosakhutleng. Baebele e bolelela pele gore nako e a tla e ka yone o tla tsayang kgato mo boemong jwa batho botlhe mo lefatsheng lotlhe ba ba eletsang go tshela mo tlase ga bolaodi jo bo lorato jwa puso ya gagwe ya legodimo, jo bo tlogang bo laola lefatshe.—Mathaio 6:10.

Puso kgotsa Bogosi joo, bo tla fedisa malwetse a a anamisiwang ke metsi mmogo le malwetse otlhe a mangwe. Baebele e tlhomamisetsa ba ba ikanyegang ba Modimo jaana: “[Modimo] o tlaa segofatsa dijo tsa [lona], le metsi a [lona]; mme [o tlaa] tlosa bolwetse mo gare ga [lona].” (Ekesodo 23:25) Mo godimo ga moo, ba ba kgotlelang metsi a lefatshe ba tla fedisiwa fa a tla bo a “senyaka ba ba senyakang lefatshe.”—Tshenolo 11:18.

Lefatshe lotlhe le tla segofala mo tlase ga tlhokomelo e e lorato ya Modimo. Batho ga ba kitla ba tlhola ba tshwara bothata jwa go bona metsi a a foreshe le a a phepa. Modimo Mothatayotlhe, yo o buang boammaaruri ka metlha, o ne a tlhotlheletsa moporofeti wa gagwe go kwala jaana malebana le isagwe: “Gonne metsi a tlaa phunyega mo nageng le dinokana mo sekakeng. Meenene e tlaa tswa mogobe wa metsi, le mmu o o nyorilweng metlhodi ya metsi.”—Isaia 35:6, 7; Bahebere 6:18.

[Setshwantsho mo go tsebe 30]

Modimo o solofetsa gore: “Metsi a tlaa phunyega mo nageng, . . . le mmu o o nyorilweng [o tlaa fetoga] metlhodi ya metsi.” —Isaia 35:6, 7