Re ne Ra Tshaba Dibomo—Dingwaga di le 50 Moragonyana!

“Dibomo di tloga di thunya gone jaanong. A mongwe le mongwe a iphitlhe!”

LEPODISI le ne la tlhagisa nna le monna wa me jalo gore re tswe mo ntlong mme re tshabele mo ntlwaneng e e ka fa tlase ga lefatshe ya konkereite. Kitsiso eno e ne ya re tshosa thata. Le fa go ntse jalo, re ne re se mo karolong ya lefatshe e e neng e wetswe ke ntwa; re ne re etetse ditsala tsa rona mo go sengwe sa ditlhaketlhake tse dinnye tse dintle tse di kwa kgakala sa Marshall kwa Micronesia.

Re ne re tlile go fetsa beke le tsala ya rona le monna wa gagwe mo setlhaketlhakeng se sennye sa Tõrwã. Mosadi wa teng e ne e le ene fela Mosupi wa ga Jehofa mo setlhaketlhakeng seno mme re ne re batla go mo thusa go rerela batho ba ba nnang moo.

Ka tlholego batho ba Marshall ke batho ba ba botsalano e bile ba tlhagafalela go bua ka Baebele. E re ka buka ya O Ka Tshelela Ruri mo Lefatsheng la Paradaise e sa tswa go gololwa bosheng jaana ka puo e e buiwang koo, re ne ra kgona go tsamaisa dikhopi tsa yone di le dintsi. Botlhe ba ba neng ba batla buka eno ba ne ba re tlhomamisetsa gore ba tla e bala mme ga ba kitla ba e dirisa e le ken karawan kana “pheko ya masego,” e e kobang badimona. Ngwao e e tlwaelegileng koo ke ya go tsenya tsebe e e golokilweng ya Baebele mo teng ga lebotlele mme ba bo ba e lepeletsa mo ditlhomesong kana mo setlhareng se se gaufi, ka gonne go akanngwa gore seno se tla koba meya e e bosula.

Re ne re feditse malatsi a le mmalwa re itumelela loeto lwa rona le fa go ntse jalo e ne ya re ka Matlhatso ra lemoga gore dilo di tlile go fetoga. Re ne re phakeletse go ya go shapa mo metsing a a phepa, a a bothitho a lekadiba. Fa re tswa mo losing lwa lewatle, re ne ra bona go atamela sekepe sa mmala o mokwebu se se boifisang. Go ise go ye kae fela re ne ra itse gore se ne se tlisitse eng. Lepodisi le ne la tlhalosa gore setlhopha sa masole a le supa a Amerika se ne se gorogile go tla go senya dibomo tsa bogologolo tse di mo setlhaketlhakeng seno. Go tlhomamisa gore baagi ba setlhaketlhake seno ba bolokesegile, ba ne ba tla tswa mo magaeng a bone go ya go tlhola mo matlwaneng a tshireletso a a agilweng ke Bajapane ka nako ya Ntwa ya Lefatshe II.

Matlwana ao a tshireletso a baeng ba ba tlileng mo Tõrwã ba kgonang go a bona fela fa ba goroga, ke bosupi jo bo boifisang jwa nako e e fetileng. Fa o lebile setlhaketlhake seno o le kgakala se tshwana sentle fela le paradaise ya boboatsatsi, le fa go ntse jalo, fa o le gaufi go bonala sentle gore bontle jwa Tõrwã bo ne jwa senngwa ke matsadi a ntwa e e neng ya khutla dingwaga di ka nna 50 tse di fetileng. E re ka pele e ne e le lebala le legolo la difofane tsa masole a Japane, setlhaketlhake seno se leswefaditswe ke masalela a dilo tsa Ntwa ya Lefatshe II. Gongwe le gongwe go na le masalela a dilo tse di rusitseng tsa ntwa—difofane tsa ntwa, mokoa wa ditlhobolo le dikepe tsa ka fa tlase ga metsi—di khurumeditswe ke dijalo tsa boboatsatsi.

Le fa go ntse jalo, dibomo tse di setseng ke tsone di boifisang thata. Ka nako ya ntwa, masole a United States a ne a digela ditone di feta 3600 tsa dibomo, dibomo tsa molelo le dirokete mo Tõrwã le masole a Japane le one a ne a na le mabolokelo a bone a dibomo le dibetsa fa fatshe. Le fa gone go ka se direge thata gore bomo ya dingwaga di le 50 e thunye, di ka nna tsa tsosa kotsi e e rileng, e leng lone lebaka le le dirileng gore ditlhopha tse di tlosang dibomo di etele setlhaketlhake seno mo e ka nnang ka makgetlho a le matlhano fa e sa le go tloga ngwaga e ntwa e khutlileng ka yone e leng 1945.

Re ne re ipotsa gore a tlhagiso eno e ne e le ya boammaaruri, ka jalo re ne ra tsamaela kwa lefelong le setlhopha sa batho ba ba tlosang dibomo se neng se tlhaga teng mme ra bua le bone. Ba ne ba bolela gore ga se fela gore tlhagiso eno e boammaaruri, mme gape dibomo di ne di ka nna tsa simolola go thunya mo lobakeng lwa ura! Re ne ra bolelelwa gore fa re sa batle go tshabela mo ntlwaneng ya tshireletso, re tla tshwanelwa ke go tloga mo setlhaketlhakeng kwa ntle ga tshenyo ya nako.

Tsala ya rona e ne ya swetsa go sala mo Tõrwã mme a itshireletsa mo teng ga lefelo le go neng go bewa ditlhobolo mo go lone le malapa a le mmalwa. Moragonyana o ne a re bolelela gore difensetere tse di neng di le teng mo ntlwaneng eno ya tshireletso ya konkereite e ne e le fela marobana a go tsenngwang ditlhobolo mo go one e bile mo teng ga yone, go ne go le mogote thata mme go tletse batho tota. Go fetsa letsatsi moo go ne ga dira gore ba gakologelwe dingwaga tsa ntwa mme o ne a bolela gore le fa go thunya ga dibomo go ne go mo kgatlha thata fa a ne a sa ntse a le monnye, jaanong e ne e kete di mo boifisa thata.

Monna wa gagwe o ne a dumetse go re isa kwa Setlhaketlhakeng sa Wollet, mo e ka nnang dikilomitara di le robedi ka mokorwana o monnye wa enjene. Re ne re ise re tsamaye le metsotso e sekae go tloga mo lotshitshing fa re utlwa modumo o mogolo. Fa re leba kwa morago kwa Tõrwã, ra bona mosi o kuelela gaufi le lefelo la bonno la setlhaketlhake seno. Morago ga moo, go ne ga utlwala modumo o mongwe gape mme ga utlwala wa boraro, o mogolo thata.

Re ne ra fetsa letsatsi lotlhe re rera mo Wollet mme e ne e le letsatsi le go tlang go utlwala fela medumo ya dibomo kwa kgakala. Dibomo tseno tsa bogologolo di ne tsa bonwa le go tshwaiwa dikgwedi di le mmalwa pele ga foo. Dibomo tsa masole di ne tsa bonwa gotlhe—mo masing a lewatle, mo nageng gaufi le boemeladifofane jo bonnye le e leng mo dijarateng tsa batho tota! Setlhopha se se tlosang dibomo se ne sa fokotsa palo ya go thunya ka go kokoanyetsa bontsi jwa dibomo tse dinnye mo lefelong le le lengwe mme sa di senya di le mmogo.

Letsatsi le ne le setse le phirimile fa re boela kwa Tõrwã. Fa re atamela gaufi le setlhaketlhake, re ne ra lemoga gore mosi o o tlwaelegileng o o dirwang ke molelo wa go apaya o ne o seyo. Re ne ra itse gore go na le sengwe se se phoso. Ka tshoganyetso fela, mokoro o monnye o ne wa tla ka lebelo kwa go rona, go re tlhagisa gore re se ka ra atamela. Go ne go santse go na le bomo e nngwe gape e kgolo e e neng e fitlhegile e e neng e tshwanetse ya senngwa gaufi le lekekema. Ka jalo, fa re ntse re katoga losi ka lotlatlana, re ne ra bona sengwe se bontsi jwa batho ba ba tshelang gompieno ba iseng ba ko ba se bone—go thunya ga bomo ya Ntwa ya Lefatshe II ka fa tlase ga metsi go go neng ga phashaganya metsi le mosi dimetara di ka nna makgolokgolo mo lefaufaung!

Ka lesego, ga go na ope mo Tõrwã yo o neng a gobala letsatsi leo. A setlhopha se se tlosang dibomo se ne sa fetsa go tlosa dibomo tsotlhe tse di setseng mo setlhaketlhakeng seno? Gongwe nnyaa. Moeteledipele wa setlhopha o ne a bolela gore o solofetse gore banni ba mo setlhaketlhakeng ba tla kopana le dibomo tse dingwe tsa bogologolo mo nakong e e tlang. Gone mme, seno se ne sa re dira gore go nne le sengwe se re ka buang le batho ka sone fa re ntse re fetsa tiro ya rona ya go rera mo Tõrwã. E ne e le tshiamelo ruri go bolelela batho ba setlhaketlhake seno ka nako ya fa Bogosi jwa ga Jehofa bo tla bong bo “khutlisa ditlhabano le kwa bokhutlong jwa lefatshe.”—Pesalema 46:9.

Jaaka go boletse Nancy Vander Velde

[Setshwantsho mo go tsebe 25]

Bomo e e iseng e thunye